ஐயப்பன் அவதாரம் குறித்து பார்த்தோம். அடுத்ததாக சபரிமலை ஐயப்பன் கோயிலை பற்றி பார்ப்போமா? கேரளா... கடவுள் விரும்பி வாழும் இயற்கை வளம் கொண்ட அற்புத பூமி என்பார்கள். அம்மாநிலத்தில் அடர்ந்த காடுகள், நீர்வீழ்ச்சி, பசுமை சூழ்ந்த மலைப்பரப்பு என கண்கொள்ளா காட்சிகளால், உள்ளத்தை கொள்ளையடிக்கும் பத்தனம்திட்டா மாவட்டத்தில்தான் சபரிமலை அமைந்துள்ளது.

பெரியாறு புலிகள் காப்பகத்தில் அமையப் பெற்றுள்ள இக்கோயிலானது, கடல் மட்டத்திலிருந்து 1,260 மீ (4,134 அடி) உயரத்தில் அமைந்துள்ளது. 18 மலைகளுக்கு மத்தியில் ஒரு குன்றின் மீது அமைக்கப்பட்ட இக்கோயிலை பார்த்தாலே மனம் பரவசமடையும். ஆண்டுதோறும் சுமார் 4 கோடி முதல் 5 கோடி வரை பக்தர்கள் வந்து தரிசனம் செய்யும் இடமென்கின்றனர். சில நேரங்களில் கூடுகிறதே தவிர குறையவில்லை.

உலகம் முழுவதும் இருந்து சபரிமலைக்கு வந்த வண்ணம் உள்ளனர். அந்த வகையில் உலக அளவில் அதிகம் பேர் வந்து செல்லும் ஆலயங்களுள் சபரிமலைக்கும் முக்கிய இடமுண்டு. குறிப்பாக, கார்த்திகை, மார்கழி, தை - இந்த 3 மாதங்களில் வருவோர் எண்ணிக்கை மிகவும் அதிகரிக்கும். கோயிலின் மேலே நான்கு தங்க கோபுரங்கள், இரண்டு மண்டபங்கள், பலி பீடம் மற்றும் கொடிக்கம்பம் ஆகியவற்றைக் கொண்ட கருவறை உள்ளது.

இங்குள்ள ஐயப்பன் சிலை பஞ்சலோகத்தால் ஆனது என்கின்றனர். பஞ்சலோகம் என்பது ஐந்து உலோகங்கள் என பொருள்படும். சபரிமலையில் அமைக்கப்பட்டுள்ள 18 படிகளுக்கு மேல் ஏறி சென்றால் ஐயப்பன் சன்னதியை அடையலாம். அங்கு ஐயப்பன் அறிவில் சிறந்தோரை கை விரல்களால் அடையாளம் காட்டும் சின் முத்திரையோடு, ஒரு துண்டு போன்ற ஆடையால் முழங்காலை சுற்றி கட்டி, குத்துக்காலிட்ட நிலையில் காட்சியளிக்கிறார்.

இதுபோன்ற நிலையில் அமர்ந்திருப்பது மிக மிக அரிதான நிலையாகும். ஏனிந்த கோலம் என்பதை பின்னர் விரிவாக பார்ப்போம். கோயில் வளாகத்தில் எந்த ஆலயத்திலும் முதன்மையானவராக திகழும் கன்னிமூல கணபதிக்கு தனி சன்னதி உள்ளது. அருகில் மஞ்சள்மாதா எனப்படும் மாளிகைபுரத்தம்மனுக்கு தனி சன்னதி இருக்கிறது. சபரிமலைக்கு மாலை அணிந்தும், அணியாமலும் செல்பவர்கள் பலர் இருக்கின்றனர்.

ஆனால், முறையாக விரதமிருந்து இருமுடி கட்டிச் செல்லும் பக்தர்களே 18 படிகளின் மீதேறி செல்ல முடியும். மற்றவர் 18 படிகளின் வழியாக ஏறிச் செல்ல அனுமதியில்லை. 18 படி என்பது ஐயப்பனை தரிசிக்க செல்லும் பாதை மட்டுமல்ல... ஒவ்வொரு படியும் ஒவ்வொருவிதமான அர்த்தங்கள், தத்துவங்களை கொண்டிருக்கிறது. அதனைப்பற்றி பார்ப்போமா? தரிசனம் தொடரும்

தா யின் நோயை குணப்படுத்த புலியை தேடி வனத்துக்குள் சென்ற மணிகண்டனுக்கு சிவபெருமான் தரிசனம் அளித்தார். மணிகண்டனின் அவதார நோக்கம் திட்டமிட்டபடியே நடப்பதை உணர்ந்து கொண்டாலும், திருவிளையாடல் நிகழ்த்துவதில் மன்னர் அல்லவா? ஆகையால், எதுவுமே அறியாதது போல மணிகண்டனை பார்த்து, ‘நீ வனத்துக்குள் வந்த நோக்கம் என்ன’ என்றார். அதற்கு மணிகண்டன், ‘‘எனது தாய் தீராத தலைவலியால் அவதிப்படுகிறார்.

அவருக்கு புலிப்பால் அவசியம் வேண்டும். அதற்கு தாங்கள் உதவ முடியுமா’’ என்றான் மணிகண்டன். உடனே சிவபெருமான், ‘‘நிச்சயமாக. உனக்கு இந்திரனும், தேவர்களும் கட்டாயம் உதவுவார்கள்’’ என்று கூறிச் சென்றார். சிறிது நேரத்தில் இந்திரன் பெண் புலியாக உருமாறி வந்தார். அதன் மேல் அமர்ந்து கொண்டான் மணிகண்டன். தேவர்கள் ஆண் புலிகளாகவும் மாறி பின்தொடர்ந்து வந்தனர். புலிகளோடு பந்தளம் அரண்மனை நோக்கிச் சென்ற மணிகண்டனை கண்டு மக்கள் அலறியடித்து ஓடினர்.

தகவலை கேள்விப்பட்ட மன்னர் ராஜசேகரன் உட்பட அனைவரும் அதிர்ச்சி அடைந்தனர். மன்னரை கண்ட மணிகண்டன், ‘‘தாயின் தலைவலி மற்றும் நோய் தீர்க்க பெண் புலியோடு வந்துள்ளேன். புலிப்பாலை சேகரித்து தாயை குணப்படுத்தி விடலாம். கலங்காதீர்கள்’’ என்றான். தனக்காக வனத்துக்குள் சென்று புலியுடன் வந்த மணிகண்டனை கண்ட மகாராணி மனம் கலங்கினார். மன்னரிடம் தான் நாடகம் நடத்திய உண்மையை கூறினார். அமைச்சரின் சூழ்ச்சியால் இப்படி நடந்து கொண்டதாகவும் தெரிவித்தார்.

இதனால் மனம் உடைந்த மன்னர், அமைச்சருக்கு தண்டனை தர முடிவு செய்தார். தடுத்த மணிகண்டன், ‘‘அமைச்சரை தண்டிக்க வேண்டாம். இறைவன் ஆணையிட்டபடியே அனைத்தும் நிகழ்ந்திருக்கிறது. நான் உங்களுடன் இருக்க வேண்டியது 12 ஆண்டுகள் மட்டுமே. அந்த வயதை எட்டி விட்டேன். என் பிறப்பிற்கான தேவையையும் நிறைவேற்றி விட்டேன். இனி இந்த அரண்மனை என் இருப்பிடம் அல்ல.

நான் தேவலோகம் செல்ல வேண்டும். என்னை வழியனுப்பி வையுங்கள் தந்தையே’’ என்றான். மகன் பிரிந்து செல்வதை அறிந்த மன்னர் ராஜசேகரன், மனம் கலங்கி கண்ணீர் விட்டார். அதனை கண்ட மணிகண்டன், ‘‘என் மீது நீங்கள் செலுத்திய அன்பு, பாசத்தை நான் ஒருபோதும் மறக்க மாட்டேன். நீங்கள் என்னிடம் வரம் கேளுங்கள். தருகிறேன்’’ என்றார்.

மணிகண்டனை முதன்முதலாக கையில் தூக்கியபோது, முனிவர் கூறியது போலவே அனைத்தும் நடப்பதையும், தன் மகன் தெய்வீக அம்சமாக காட்சி தருவதையும் கண்டு மெய்சிலிர்த்தார் மன்னர் ராஜசேகரன். இறைவன் நிலையை அடைந்த மணிகண்டனிடம், மன்னர் ராஜசேகரன் ஒரேயொரு வரம் கேட்டார். அந்த ஒரு வரம்....? தரிசனம் தொடர்வோம்

பாற்கடலில் கிடைத்த அமிர்தம் தான் சாஸ்தாவான ஐயப்பனின் அவதாரத்திற்கு ஆரம்பப் புள்ளியாக அமைகிறது. அமிர்தம் கிடைத்ததும், வலிமையாக இருந்த அரக்கர்கள் அமிர்தத்தை முழுமையாக அபகரித்து, முழுவதும் அருந்த எண்ணி, தேவர்களை தாக்குகின்றனர். இதனை அறிந்து கொண்ட சிவன், திருமாலை மோகினி தோற்றத்தில் சென்று, அரக்கர்களை மயக்கி தேவர்களுக்கு வாழ்வு அளிக்கும்படி கூறுகிறார். பேரழகு தோற்றமுடைய மோகினி அவதாரம் எடுக்கிறார் திருமால். பாற்கடலுக்குச் செல்கிறார் மோகினி. ஆவேசமாக இருந்த அரக்கர்களை மோகினி சமாதானம் செய்து, சமமாக பிரித்து வழங்குவதாக கூறுகிறார். மோகினியின் அழகில் மயங்கிய அரக்கர்கள், மோகினி சொல்வதை கேட்கத் தொடங்குகின்றனர்.

முதலில் தேவர்களிடம் இருந்து வருகிறேன் எனக்கூறி, முழுமையான அமிர்தத்தையும் தேவர்களுக்கே வழங்கி முடிக்கிறார். அரக்கர்களுக்கு பிறகே தெரிந்தது தாங்கள் ஏமாற்றப்பட்டிருப்பது. அமிர்தத்தை முழுவதும் அருந்திய தேவர்களுக்கு வலிமையும், இழந்த சக்தியும் மீண்டும் கிடைக்கிறது. இதனால் அரக்கர்களை அடித்து விரட்டி விட்டு, மீண்டும் தேவலோகத்தை கைப்பற்றி, அரியணை ஏறுகிறார் தலைவன் இந்திரன். தோல்வியுற்று பயந்தோடிய அரக்கர்கள், தங்களின் அரசியான மகிஷியை தேடி அலைகிறார்கள். பூலோகத்தில் சுந்தர மகிஷனுடன், மகிஷி இல்லற வாழ்க்கையில் இருப்பதை கண்டு அதிர்ச்சியடைகின்றனர். பிறகு மகிஷியை சந்தித்து, நடந்த அனைத்தையும் கூறி, தேவர்கள் சூழ்ச்சி செய்து, உங்களை சுகபோக வாழ்விற்கு அடிமையாக்கி, பாற்கடல் அமுதத்தை அருந்தி மீண்டும் அரியாசனத்தில் அமர்ந்துவிட்டார் இந்திரன் என விளக்கி கூறுகின்றனர்.

இதில் ஏதோ மறைமுக சூழ்ச்சி இருக்கிறது என அறிந்து கொண்ட மகிஷி, சுந்தர மகிஷத்தை ஒதுக்கிவிட்டு, தனது வரத்தின் பலத்தால் அசுர பலத்துடன் கூடிய படையை உற்பத்தி செய்து, மீண்டும் தேவலோகத்தை அடைகிறாள். சுந்தர மகிஷம் மும்மூர்த்திகள் தனக்கு கொடுத்த கடமை முடிந்ததை எண்ணி மகிழ்ந்து, தனது உருவத்தை துறந்து மீண்டும் மூல சக்திகளான மும்மூர்த்திகளிடம் தத்தாத்ரேயராக சரணாகதி அடைகிறார்.நேரடியாக இந்திரனை நோக்கி போரை துவங்குகிறாள் மகிஷி. தேவர்களும் எதிர்தாக்குதல் நடத்துகின்றனர். ஆனால் அசுர பலம் பொருந்திய மகிஷியை வெல்ல முடியவில்லை. மகிஷியை வெல்வதற்கு, தர்மசாஸ்தாவின் அவதார நோக்கம் நிறைவேற வேண்டி, சாஸ்தாவின் தலை பகுதியான ‘பிரம்மாந்திரம்’ அமைந்துள்ள காந்தமலை பொன்னம்பல மேட்டில் சாஸ்தாவை நோக்கி பிரார்த்தனையில் ஈடுபடுகின்றனர் தேவர்கள். சுவாமியே சரணம் ஐயப்பா... நாளையும் தரிசிப்போம்.