New Indian-Chennai News + more

பிரதமரின் அடுத்த பேட்டி – சத்யா

கேள்வி : லோக்பால் சட்ட வரம்புக்குள் பிரதமரைக் கொண்டு வர எதிர்ப்பு தெரிவிப்பது ஏன்?

பிரதமர் : நானா எதிர்க்கிறேன்? என் மந்திரி சபை சகாக்கள்தான் எதிர்க்கிறார்கள். அவர்கள் உரிமையில் நான் குறுக்கிட முடியாது. அவர்கள் உரிமையில் மட்டுமல்ல, யாருடைய உரிமையிலும் நான் குறுக்கிட முடியாது. காங்கிரஸ் –அதாவது சோனியா – கட்டளையிட்டால் மட்டுமே நான் குறுக்கிட முடியும்.

கேள்வி : தனிப்பட்ட முறையில் – பிரதமரை லோக்பால் வரம்புக்குள் கொண்டு வருவது பற்றி – உங்கள் கருத்து என்ன?

பிரதமர் : தனிப்பட்ட முறையில் எனக்கு எந்த விஷயத்திலுமே கருத்து கிடையாது. நான் சொந்த கருத்துகளுக்கு அப்பாற்பட்டவன். காங்கிரஸ் எதை கட்டளையாக இடுகிறதோ – அதுதான் என் கருத்து. அந்த ஆட்சி தர்மத்தைத்தான் நான் பின்பற்றுகிறேன்.

கேள்வி : லோக்பால் அமைப்பு பிரதமரை விசாரித்தால் என்ன தவறு?

பிரதமர் : என்னைப் பொறுத்தவரை நான் எந்த விசாரணைக்கும் பயப்படவில்லை. நான் ஏதாவது செய்திருந்தால்தானே பயப்பட வேண்டும்? நான்தான் எதையுமே செய்யவில்லையே? யார் என்ன செய்து கொண்டிருக்கிறார்கள் என்பதை காங்கிரஸ் கட்டளைப்படி பார்த்துக் கொண்டிருக்கிறேன். பார்க்க வேண்டாம் என்று சொன்னால் நிறுத்தி விடப் போகிறேன். அவ்வளவுதான்.

கேள்வி : மத்திய மந்திரி தயாநிதி மாறன் மீதும் 2ஜி ஒதுக்கீட்டில் ஊழல் புரிந்ததாகக் குற்றச்சாட்டுகள் எழுந்துள்ளனவே? அவர் நீக்கப்படுவாரா?

பிரதமர் : ‘அவர் எந்த ஊழலும் செய்யவில்லை; எல்லாம் முறையாகத்தான் நடந்துள்ளன’ என்று கூறி, அவர் முதுகில் தட்டிக் கொடுக்கலாமா, வேண்டாமா என்பது குறித்து காங்கிரஸ் தலைமையிடமிருந்து இன்னும் கட்டளை வரவில்லை. அதற்குப் பிறகு, தேவைப்பட்டால் சட்டம் தன் கடமையைச் செய்யும். என் மனசாட்சி மேலிடத்துக்குக் கட்டுப்பட்டு இருப்பதால்தான் என்னால் இப்படி தெளிவாக பதிலளிக்க முடிகிறது.

கேள்வி : நீங்கள் பலவீனமான பிரதமர் என்று எதிர்க்கட்சிகள் குற்றம் சாட்டுகின்றனவே?

பிரதமர் : அது தவறு. ஆட்சியில் எது நடக்க வேண்டுமென்றாலும் சோனியா பெரும்பாலும் என்னிடம்தான் கூறுகிறார். அந்த அளவுக்கு என் பலத்தின் மீது அவருக்கு நம்பிக்கை இருக்கிறது. அப்படிப்பட்ட என்னைப் பார்த்து, சோனியாவால் இயக்கப்படுகிறேன் என்று கூறுவது என்ன நியாயம்? மத்திய மந்திரிகளை சேர்க்கிற, நீக்குகிற அதிகாரத்தை சம்பந்தப்பட்ட கூட்டணிக் கட்சிக்கு வழங்க சோனியா என்னைத்தான் அனுமதித்து வருகிறார். நானா பலவீனமான பிரதமர்? 

அவ்வளவு ஏன்? மத்திய மந்திரிகளை மாற்றுவது குறித்து நிரா ராடியாவுடன் யார் யாரோ ஃபோனில் பேசியிருக்கிறார்கள். இன்னாரை மந்திரியாக்குங்கள் என்று ஒருமுறையாவது நான் நிரா ராடியாவிடம் கேட்டிருப்பேனா?

கேள்வி : ராகுல் பிரதமராக வேண்டும் என்று காங்கிரஸில் கோரிக்கைகள் எழுந்துள்ளதே?

பிரதமர் : காங்கிரஸின் மற்ற தலைவர்களுக்கு சோனியா வழங்கிய கட்டளை இன்னும் என்னை வந்தடையவில்லை. கட்டளை வந்ததும், ‘என்னை விட விவரம் தெரிந்த, நாட்டின் மீது அக்கறை கொண்ட, சுயமாகச் சிந்தித்துச் செயல்படுகிற ராகுல்தான் பிரதமர் பதவிக்குத் தகுதியானவர்’ என்று அறிவிக்க நானே தயாராக இருக்கிறேன். அதற்குப் பிறகு, சோனியா கட்டளையிட்டால், துணைப் பிரதமராகி ராகுல் கட்டளைகளை நிறைவேற்றவும் தயங்க மாட்டேன். ஆகவே, என்னை யாரும் இயக்கவில்லை என்பதை இப்போதாவது புரிந்து கொள்ளுங்கள்.

பிரதமர் மன்மோகன் சிங் இனி அடிக்கடி ஊடக நிருபர்களைச் சந்திக்க வேண்டும் என்று அகில இந்திய காங்கிரஸ் செயற்குழு அறிவுறுத்தியதையடுத்து, பேட்டி அளித்திருக்கிறார் பிரதமர். ஆனாலும், எதிர்பார்த்த பலன் கிடைக்கவில்லை. ‘நான் பலவீனமானவன் அல்ல, செயல்படாத பிரதமர் அல்ல; என்னை யாரும் இயக்கவில்லை’ என்று மனிதர் கரடியாகக் கத்தியும் பா.ஜ.க.வினர் அதை நம்பாமல் கேள்வி கேட்டுக் கொண்டிருக்கிறார்கள். பேட்டியில், பிரதமர் தன்னிலை விளக்கமாகக் கூறிய அனைத்து கருத்துகளையுமே ஏற்க மறுத்து, எதிர்க் கட்சிகள் தொடர்ந்து குறை கூறி வருகின்றன. இவர்களுக்கெல்லாம் சூசகமாகச் சொன்னால் புரியாது. தலைக்கு மேல் போன பிறகு ஜாண் என்ன? முழம் என்ன? பிரதமர் தமது அடுத்த பேட்டியில், இப்படி தெளிவாகவே கூறி விடலாம்.

பொது அறிவு போதனை – சத்யா

“பசங்களா... எல்லாரும் கவனிங்க! பாடப் புத்தகங்கள் தயாராகிற வரைக்கும் உங்களுக்கெல்லாம் ‘பொது அறிவு’ கற்றுக் கொடுக்கப் போறேன். புத்தகத்துக்குப் பதிலா இனிமே தினமும் தவறாம பேப்பர் படிக்கணும்னு சொன்னேனே, படிச்சீங்களா? யாருக்காவது அது சம்பந்தமா சந்தேகம் இருந்தா கேக்கலாம்.”

“சமச்சீர்னா என்ன ஸார்?.”


“எல்லாம் சமமா ஏற்றத் தாழ்வில்லாம இருக்கிறதுதான் சமச்சீர். யாரும் அதிகமா படிச்சுடாம தடுத்து, எல்லாரையும் ஒரே அளவா படிக்க வெக்கறதுதான் சமச்சீர் கல்வி. அப்பதான் யாரும் மற்றவங்களை ஏமாத்தி தனியா முன்னேறிடாம, எல்லாரும் சமமா முன்னேறுவாங்க.”

“சமச்சீர் கல்வியிலே எல்லாருக்கும் சமமா மார்க் போடற சமச்சீர் மார்க் திட்டம் உண்டா ஸார்?”

“மடத்தனமா கேக்காதே. அப்புறம் அதுக்காக யாராவது போராட ஆரம்பிச்சுட்டாப் பிரச்சனையாப் போயிடும். உட்கார்.”

“பேப்பர்லே ‘இன்றைய மின்தடை’ன்னு போட்டிருக்குதே ஸார், அந்த இடங்களைத் தவிர மற்ற இடங்களிலே கரண்ட் போகாதா?”

“அப்படியெல்லாம் இல்லை. ‘இன்றைய மின்தடை’ன்னு போட்டிருக்கிற இடங்களிலே கண்டிப்பா கரென்ட் போகும். மற்ற இடங்களிலே போனாலும் போகலாம். போகாமலும் இருக்கலாம். குறிப்பிட்ட இடங்களிலே மட்டும் குறிப்பிட்ட டைம்லே போகும். மற்ற இடங்களிலே எப்ப வேணாலும் போகும். சில இடங்களிலே போயிட்டு போயிட்டு வரும். சில இடங்களிலே வந்துட்டு வந்துட்டுப் போகும்.”

“மின்சாரம் ஏன் ஸார் போகுது?”

“அதுக்கு பல காரணங்கள் இருக்குது. மின்வெட்டு, மின்பழுது, மின் பற்றாக்குறை, லோ வோல்டேஜ்... இப்படிப்பட்ட காரணங்கள் இருந்தாலோ இல்லைன்னாலோ கரெண்ட் அடிக்கடி போகும். மற்ற சமயங்களிலே அப்பப்ப போகும்.”

“லோக்பால், லோக்பால்ன்றாங்களே, அப்படின்னா என்ன ஸார்? வாலி பால், ஃபுட் பால் மாதிரி பந்தா?”

“ஒரு வகையிலே அதுவும் பந்துதான். சமூக ஆர்வலர்கள் குழு அடிக்கிற பந்தை அரசாங்க தரப்பு திருப்பி அடிக்கும். அரசாங்கம் அடிக்கிற பந்தை சமூக ஆர்வலர்கள் குழு திருப்பி அடிக்கும். இப்படி மாத்தி மாத்தி அடிச்சுக்குவாங்க.”

“அந்த விளையாட்டு எப்ப முடியும் ஸார்?”

“விளையாட்டு முடியாது. போரடிச்சு தானா நின்னுடும். அப்ப மக்கள் வேறே விளையாட்டைப் பார்க்கப் போயிடுவாங்க. மடையா! ஒரு உதாரணத்துக்குச் சொன்னா, நிஜமாவே அதை விளையாட்டுன்னு நினைச்சுட்டியா? ஊழலை ஒழிக்க ஒரு சட்டம் கொண்டு வரணும்னு அன்னா ஹஸாரே ஆளுங்க போராடறாங்க. அந்தப் போராட்டத்தை ஒழிக்க மத்திய அரசு போராடுது”

“ஊழல்னா என்ன ஸார்?” 


“ஊழல்னா திட்டம். திட்டத்தை நிறைவேற்றினா ஊழல் நடக்கும். ஊழலைத் தடுக்க நினைச்சா திட்டம் நிறைவேறாது. எந்த வேலையும் செய்யாம இருந்தாத்தான், ஊழல் அளவோட இருக்கும்.”

“இமாலய ஊழல்னா என்ன ஸார்?”

“ஒருத்தர் மட்டும் தனியா செஞ்சா அது ஊழல். ஒரு கூட்டமே சேர்ந்து செஞ்சா அது இமாலய ஊழல். அதெல்லாம் அரசியல். உனக்குப் புரியாது. வேறே கேள்வி கேளு.”

“கறுப்புப் பணம்னா என்ன ஸார்? ரூபா நோட்டுலே கறுப்புப் பெயின்ட் அடிச்சிருப்பாங்களா?”

“அதாவதுப்பா... அநியாயமான வழியிலே சம்பாதிக்கிற பணம் கறுப்புப் பணம். அப்படி சம்பாதிச்ச பல லட்சம் கோடி ரூபாய் பணத்தை சில பேர் வெளிநாட்டு பேங்குகளிலே பதுக்கி வெச்சிருக்காங்க. அந்தப் பணம் வந்தா, நம்ம நாட்டு கஷ்டமெல்லாம் தீர்ந்துடும்.”

“அநியாயமான வழியிலே சம்பாதிக்கிற பணத்தாலேதான் நம்ம கஷ்டம் தீருமா? நியாயமான வழி யிலே சம்பாதிக்கிற பணத்தாலே நம்ம கஷ்டம் தீராதா? அப்படின்னா நாம ஏன் ஸார் நியாயமா சம்பாதிக்கணும்?”

“அயோக்கிய படவா! அதிகப் பிரசங்கி மாதிரி கேள்வி கேக்காதே உட்கார்.” 

“அந்தப் பணம் வருமா ஸார்?”

“வரும்... ஆனா, வராது. வந்தாலும் தெரியாது. ஏன்னா அது அரசாங்க ரகசியம். மிஞ்சிப் போனா, கறுப்புப் பணம் எத்தனை லட்சம் கோடிங்கற புள்ளி விவரத்தை மட்டும்தான் நாம தெரிஞ்சுக்க முடியும். அத்தோட விட்டுடணுமே தவிர, அந்த கொள்ளைப் பணத்துக்கு மக்கள் ஆசைப்படக் கூடாது.”

“கொள்ளை, கொள்ளைன்றீங்களே. கொள்ளைன்னா என்ன ஸார்? டொனேஷனா?”

“ஏய், மெதுவா கேளு. மேனேஜ்மென்ட் காதுலே விழுந்தா ஆபத்து. டொனேஷன் வேறே. கொள்ளை வேறே. அதிகாரமா கேட்டு வாங்கறது டொனேஷன். கேக்காமலே அதிகாரமா எடுத்துக்கறது கொள்ளை. கொள்ளைக்காரங்களைப் பிடிச்சா நடவடிக்கை எடுக்க ஓரளவு சான்ஸ் உண்டு. டொனேஷன் வாங்கறவங்களைப் பிடிச்சாலும் நடவடிக்கை எடுக்க முடியாது. ஏன்னா, இதுலே அரசியல் சம்பந்தப்பட்டிருக்குது.”

“சோமாலிய கடல் கொள்ளைக்காரர்களிடமிருந்து மாலுமிகள் மீட்புன்னு போட்டிருக்காங்களே, அந்தக் கொள்ளைக்காரங்களும் அரசியல்வாதிகளா ஸார்?”

“குட் கொஸ்டின். அவங்க ஒரிஜினல் கொள்ளைக்காரங்க. அவங்களுக்கு அரசியல் தெரியாது. கொள்ளை மட்டும்தான் தெரியும். ஆனா, அரசியல்வாதிகளுக்கு பல விஷயங்கள் தெரியும். அதுலே கொள்ளையும் ஒண்ணு. கொள்ளைக்காரங்க கிட்டேயிருந்து மாலுமிகளை மீட்ட மாதிரி, அரசியல்வாதிகள் கிட்டேயிருந்து மக்களை மீட்க யாராலேயும் முடியாது.”

“ஏற்கெனவே அரசாங்கம் டி.வி., கேஸ் ஸ்டவ், இலவசமா கொடுத்தது. இப்ப மிக்ஸி, கிரைண்டர், ஃபேன், லேப்டாப், ஆடு, மாடு, அரிசி எல்லாம் இலவசம்னு பேப்பர்லே போட்டிருக்குதே. நம்ம அரசாங்கம் பணக்கார அரசாங்கமா ஸார்?.” 

“அரசாங்கம் தான் பணக்கார அரசாங்கம். ஆனா, மக்கள் ஏழைகள். அவங்களாலே காசு கொடுத்து எதுவும் வாங்க முடியாது. அதனாலேதான் அரசாங்கம் எல்லாத்தையும் இலவசமா கொடுக்குது. ஆடி தள்ளுபடி, விழாக்கால தள்ளுபடி மாதிரி, இது தேர்தல் கால தள்ளுபடி.”

“அப்படின்னா தேர்தல் சமயத்திலே எங்களுக்கு மார்க் இலவசமா போடுவாங்களா ஸார்?.”

“சீ வாயை மூடு! உனக்கென்ன ஓட்டா இருக்குது? ஒழுங்கா படிச்சு மார்க் வாங்கற வழியைப் பாரு.”

“சரி. மக்கள்தான் ஏழைகளா இருக்காங்களே. டீஸல், சமையல் கேஸ் விலையை எல்லாம் அரசாங்கம் ஏன் அடிக்கடி உயர்த்துது? அதையும் இலவசமா கொடுக்கலாமே? ஏன் மக்களைக் கஷ்டப்படுத்தணும்?”

“அது வந்து, இந்த எண்ணெய் வர்த்தக நிறுவனங்களை கஷ்டப்படுத்தக் கூடாதேங்கற நல்ல எண்ணத்தின் அடிப்படையிலேதான், அரசாங்கம் மக்களைக் கஷ்டப்படுத்துது. எதையெல்லாம் இலவசமா கொடுக்கணும், எதையெல்லாம் அநியாய விலையிலே விற்கணும்ன்றது கவர்மென்டோட கொள்கை முடிவு.”

“கொள்கைன்னா என்ன ஸார்?”

“கவர்மென்ட் என்ன செய்யுதோ, அதான் கவர்மென்டோட கொள்கை. அடுத்து வர்ற கவர்மென்டுக்கு அந்தக் கொள்கை பிடிக்கலைன்னா, அதை மாத்திரும். அது அந்த கவர்மென்ட்டோட கொள்கை.” 

“யாரோ ஒரு கலெக்டர் தன் மகளை கார்ப்பரேஷன் ஸ்கூல்லே சேர்த்ததை அதிசயமா போட்டிருக்காங்களே. அதுலே என்ன ஸார் ஆச்சரியம்?”

“சொல்றேன். கார்ப்பரேஷன் ஸ்கூல்லே எதுவுமே ஒழுங்கா நடக்காது. வாத்தியாருங்க வர்றதே அதிசயம். வந்தாலும் அக்கறையா பாடம் நடத்த மாட்டாங்க. டாய்லெட் கூட இருக்காது. குப்பை கூளங்கள் இருக்கும். ஆடு, மாடு, நாய் திரியும். நாட்டுக்கே தெரிஞ்சிருக்கிற இந்த விஷயம் அந்த கலெக்டருக்கு தெரியலையேன்னு ஆச்சரியப்படறாங்க.”

“அந்தப் பள்ளிக்கூடம் மட்டும் ஏன் அப்படி இருக்குது?.”

“அதான் சொன்னேனே. அது கார்ப்பரேஷன் பள்ளிக்கூடம். அப்படித்தான் இருக்கும். கார்ப்பரேஷன் ஆஸ்பத்திரி மாதிரிதான், கார்ப்பரேஷன் பள்ளிக்கூடமும். ஏற்கெனவே கஷ்டப்படறவங்க மட்டும்தான் அந்த மாதிரி இடங்களுக்குப் போய் கஷ்டப்படணும். அதான் நியாயம். மத்தவங்க போனா அநியாயத்துக்குப் புதுசா கஷ்டப்படணும்.”

“ஸார்... பேப்பர்லே நிறைய இடங்களிலே நகை பறிப்பு, கற்பழிப்பு, திருட்டு வி.ஸி.டி. டாஸ்மாக்குன்னு வருதே... அதெல்லாம் என்ன?”

“படவா ராஸ்கல்! பிஞ்சுலேயே பழுத்துட்டியா? பேப்பர் படிச்சு ஒரு நல்ல விஷயமாவது கத்துக்கறீங்களா? நாளையிலேர்ந்து யாராவது பேப்பரைத் தொட்டா பிச்சுப்பிடுவேன் பிச்சு. உருப்படற வழியைப் பாருங்க.”

{சமச்சீர் கல்வித் திட்டத்தைத் தொடர்வதா, வேண்டாமா என்று எழுந்துள்ள பிரச்சனையால் எந்த பாடத் திட்டத்தைப் பின்பற்றுவது என்று புரியாமல், ஆசிரியர்களும், மாணவர்களும் தவிக்கும் நிலை தாற்காலிகமாக ஏற்பட்டுள்ளது. இப்பிரச்சனையில் ஒரு முடிவு தெரியும் வரை, நேரத்தை வீணாக்காமல் ஆசிரியர்கள், மாணவர்களுக்கு இப்படி பொது அறிவை போதிக்கலாமே...!}

வருங்கால சாதனைகளை வரவேற்போம் – சத்யா 

மத்திய அரசு தனது இரண்டாண்டு கால ஆட்சியின் நிறைவு விழாவைக் கொண்டாடி, கூட்டணி கட்சிகளுக்கு விருந்தளித்து மகிழ்ந்துள்ளது. அத்துடன் நிற்காமல், விழாவில், சோனியா தங்கள் ஆட்சியின் இரண்டாண்டு சாதனை அறிக்கையை வெளியிட்டு, ‘சாதனைகள் தொடரும்’ என்று வேறு எச்சரித்திருப்பதுதான் கவலையை ஏற்படுத்துகிறது. மத்திய அரசின் சாதனைகள் அடுத்த மூன்றாண்டுகளும் இதே ரீதியில் தொடர்ந்தால், ஐந்தாவது ஆண்டுவிழாவில் தலைவர்களின் பேச்சு இப்படியல்லவா இருக்கும்! 



1. பிரணாப் முகர்ஜி

விலைவாசி உயர்வு, ஊழல்கள், நக்ஸலைட் பிரச்சனை, விவசாயிகள் பிரச்சனை போன்ற பல சவால்களைச் சந்தித்தும் இதுவரை எதற்கும் பலியாகாமல், ஒரு வழியாக ஐந்தாண்டு கால ஆட்சியைப் பூர்த்தி செய்கிற அசுர சாதனையை இந்த அரசு நிறைவேற்றியுள்ளது. எதிர்க் கட்சிகளும் மீடியாவும்தான் இப்பிரச்சனைகள் பற்றி கவலைப்பட்டுக் கொண்டிருந்தனவே தவிர, மத்திய அரசு சற்றும் மனம் கலங்காமல், ஆனது ஆகட்டும் என்று தன் போக்கிலேயே சென்றதுதான் இந்த மாபெரும் வெற்றிக்குக் காரணம். 

ஐந்தாண்டு காலத்தில் 137 முறை பெட்ரோல், டீஸல் விலையை உயர்த்தி எண்ணெய் நிறுவனங்கள் அழிந்து விடாமல் காப்பாற்றி இருக்கிறோம். உலகம் முழுவதும் பொருளாதாரச் சீரழிவு ஏற்பட்டு, விலைவாசி தாறுமாறாக உயர்ந்திருக்கிற இந்தக் காலகட்டத்தில் கூட, நமது நாட்டில் ஒரு லிட்டர் பெட்ரோல் 350 ரூபாய்க்கே கிடைக்கிறது என்பதிலிருந்தே இந்த ஆட்சியின் நிர்வாகத் திறனை மக்கள் புரிந்து கொள்ளலாம். 

வெளிநாட்டு வங்கிகளில் இந்தியர்கள் போட்டுள்ள கறுப்புப் பணம் ஒரு கோடியே எண்பத்தெட்டு லட்சம் கோடி ரூபாய் என்பதையும் இந்த அரசு கண்டுபிடித்திருக்கிறது. கண்டுபிடிக்கப்படாத கறுப்புப் பணம் எவ்வளவு என்பது மட்டும்தான் இன்னும் கண்டுபிடிக்கப்படவில்லை. அதையும் கண்டுபிடித்து விட்டால் நமது நாட்டு மக்கள் மொத்தமாக ஏமாந்த பணம் எவ்வளவு என்பதைத் துல்லியமாக சுப்ரீம் கோர்ட்டில் தெரிவித்து, வழக்கை முடித்து விடலாம். அதற்காகத்தான் இந்த அரசு பாடுபட்டுக் கொண்டிருக்கிறது. 

2. சிதம்பரம்

நம்மைச் சுற்றி பயங்கரமான நாடுகள் இருக்கின்றன. அந்நாடுகள் எல்லாம் திருந்திய பிறகு நம் நாட்டில் எந்தப் பிரச்சனையும் இருக்காது. உலக வரைபடத்தில் இந்தியா வேறு பகுதியில் இருந்திருந்தால் - குறைந்த பட்சம் பாகிஸ்தானாவது சற்று தள்ளி அமைந்திருந்தால் கூட - உலக அளவில் இந்தியா முதல் இடத்தைப் பிடித்திருக்கும். 

நாட்டில் எத்தனை லட்சம் கோடி ரூபாய் கள்ள நோட்டுகளை தீவிரவாத அமைப்புகள் புழங்க விட்டிருக்கின்றன என்பதைக் கண்டுபிடித்த பிறகுதான் பொருளாதார நிலையை சீர் செய்ய முடியும். எனவே, தீவிரவாத ஒழிப்புப் பந்து, தீவிரவாதிகள் பக்கம்தான் இருக்கிறது. 

போதை மருந்து கடத்துபவர்கள், கம்ப்யூட்டர் மூலம் தகவல் திருடுபவர்கள் விரைவில் தாங்களாகத் திருந்த வேண்டும். இல்லாவிட்டால் அவர்களையும் திருத்த நேரிடும் என்று எச்சரிக்கிறேன். எனவே, பத்திரிகைகளும் டி.வி. சேனல்களும் பிரச்சனைகளைப் பெரிதுபடுத்தாமல் பொறுப்போடு நடந்து கொள்ள வேண்டும். 

நக்ஸலைட்கள் கோழைத்தனமாக பல மாநிலங்களில் டி.ஜி.பி.யையே கடத்திச் சென்று அரசை மிரட்டத் தொடங்கியதையும் நான் இங்கு குறிப்பிட்டாக வேண்டும். மத்திய அரசு உடனே தலையிட்டு நக்ஸலைட்களுடன் பேச்சுவார்த்தை நடத்தியதின் விளைவாக, அவர்கள் கோரிக்கைகள் ஏற்கப்பட்டு நூற்றுக்கணக்கான நக்ஸலைட்களை சிறையிலிருந்து விடுவித்து, டி.ஜி.பி.க்களை மீட்டுக் காட்டியிருக்கிறோம். இந்தத் தொடர் நடவடிக்கைகளின் பலனாக, தற்சமயம் நமது நாட்டு சிறைகளில் தீவிரவாதிகளே இல்லாததால், அதிகாரிகளைக் கடத்துவதை நக்ஸலைட்களும் தாற்காலிகமாக நிறுத்திக் கொண்டு விட்டனர். இப்படி நக்ஸலைட் பிரச்சனைகளுக்கும் இந்த அரசு தீர்வு கண்டுள்ளது. 

நமது புலனாய்வுத்துறை, நிரா ராடியாவை தொடர்ந்து மூன்றாண்டுகளாகத் துருவித் துருவி விசாரித்ததன் அடிப்படையில், பல கவர்னர்களையும், அட்வகேட் ஜெனரல், ஆடிட்டர் ஜெனரல் உள்ளிட்ட பல மத்திய அரசு அதிகாரிகளையும் அவரே நியமித்து வந்திருப்பதையும் இந்த அரசு கண்டுபிடித்துள்ளது. இதுபோன்று இன்னும் மறைந்திருக்கும் பல அதிகார மையங்களையும் முடிந்த வரை கண்டுபிடித்து தண்டிக்க, இந்த அரசு தயங்காது. 

மும்பைத் தாக்குதலுக்குப் பிறகு, நாம் பயந்து விடுவோம் என்று தீவிரவாதிகள் கணக்கிட்ட காலம் ஒன்று இருந்தது. ஆனால், மும்பை மட்டுமல்ல, அதற்கு பிறகு டெல்லி, கல்கத்தா, ஹைதராபாத், சென்னை, பெங்களூரு, பூனா, ஒரிஸ்ஸா ஆகிய பல இடங்களில் தீவிரவாதத் தாக்குதல்கள் நடத்தப்பட்டும் கூட, அத்தனை தாக்குதலையும் துணிவோடு எதிர்கொண்டு, கண்டித்து கண்டித்தே அவர்களை வெளிநாடுகளுக்கு விரட்டி அடித்திருக்கிறோம். அவர்கள் வெளிநாடுகளில் பதுங்கி வாழலாமே தவிர, இங்கே அவர்களுக்கு இடமில்லை என்பதை உணர்த்தி விட்டோம். எதிர்பாராத விதமாக நமது காவல் துறையிடம் மாட்டிக் கொண்ட 57 தீவிரவாதிகளுக்கு மரண தண்டனை விதிக்கப்பட்டு அத்தனை பேரும் ஜனாதிபதிக்கு கருணை மனு போட்டு காத்திருக்கிறார்கள் என்பதே நமது தீவிரவாத ஒழிப்புக்கொள்கைக்கு கிடைத்துள்ள வெற்றி. 

ஊழலை ஒழிப்போம், வாரீர்! – சத்யா

பிரதமர், நீதிபதிகள் உள்ளிட்ட அனைவரையும் லோக்பால் மசோதா வரம்புக்கு உட்படுத்தும் வகையில், கடுமையான ஊழல் ஒழிப்புச் சட்டத்தை உருவாக்குவது; வெளிநாட்டு வங்கிகளில் போடப்பட்டுள்ள பல லட்சம் கோடி ரூபாய் கறுப்புப் பணத்தை முழுமையாக மீட்பது – போன்ற கோரிக்கைகளை முன்வைத்து பாபா ராம்தேவ் தொடங்கிய உண்ணாவிரதம், மத்திய அரசின் தலையீட்டால் களேபரத்தில் முடிந்திருக்கிறது. 

ஊழலை ஒழிக்கும் விஷயத்தில் மத்திய அரசால் எது முடியும், எது முடியாது என்று ஊழல் எதிர்ப்பாளர்கள் புரிந்து கொள்ளாததுதான் இதற்குக் காரணம். அதிகபட்சமாக மத்திய அரசு எந்த அளவுக்கு ஊழலை ஒழிக்க முன்வரும் என்பதைத் தொலைநோக்கோடு சிந்தித்து, பட்டியலிட்டிருக்கிறோம். இதை ஏற்றுக் கொண்டு சமரசத்திற்கு முன் வந்தால், ஊழல் ஒழிப்புப் பிரச்சனை முடிவுக்கு வரும். இல்லாவிட்டால் ஊழல் எதிர்ப்பாளர்களுக்குத்தான் பிரச்சனை.


1. பிரதமர் மீதான அனைத்து ஊழல் புகார்களும் விசாரணைக்கு உட்படுத்தப்படும். அதன்படி, பிரதமரால் நியமிக்கப்படும் விசாரணைக் குழு, பிரதமர் மீதான ஊழல் குற்றச்சாட்டுகளை விசாரிக்கும். பிரதமரிடம் எந்தக் கேள்வியையும் கேட்கும் அதிகாரம் இக்குழுவுக்கு உண்டு. அதே நேரத்தில், பதில் சொல்லாமல் மௌனமாக இருக்கும் உரிமை பிரதமருக்கும் உண்டு. கமிஷனின் இறுதி அறிக்கை பிரதமரின் பரிந்துரையோடு, அமைச்சரவையின் பரிசீலனைக்கு அனுப்பப்படும். இக்குழுவின் தலைவரையோ, குழுவின் அறிக்கையையோ மத்திய அரசு எந்த நேரத்திலும் மாற்றலாம். அல்லது ரத்து செய்யலாம். பிரதமர் தொடர்பான குற்றச்சாட்டுக்களை விசாரிக்கும் இக்குழுவில் பிரதமரும் ஒரு உறுப்பினராக இருப்பார்.

2. நீதிபதிகள் மீதான ஊழல் குற்றச்சாட்டுக்களை விசாரிக்கவும் தனி அமைப்பு ஏற்படுத்தப்படும். அந்த அமைப்பு, நீதிபதிகளின் சொத்து, வருமான விபரங்களை மக்களுக்குத் தெரியாமல் பாதுகாக்கும். நீதிபதிகளின் பழைய ஊழல்கள், நில அபகரிப்பு மோசடி போன்றவை குறித்து கேள்வி கேட்காது. நீதிபதிகளின் உறவினர்களின் முறைகேடுகளை விசாரிக்காது. நீதிபதியின் ஊழல் நிரூபிக்கப்பட்டாலும் படாவிட்டாலும், அவர் ஓய்வு பெற்றபின் மத்திய அரசின் வேறு ஏதாவது அமைப்புக்குத் தலைவராக நியமிக்கப்படுவார்.

3.வெளிநாட்டு வங்கிகளில் போடப்பட்டிருக்கும் கறுப்புப் பணத்தை என்றாவது ஒருநாள் முழுமையாக மீட்க வேண்டும் என்பதை மத்திய அரசு கொள்கை அளவில் ஏற்றுக் கொள்கிறது. முழுமையான கறுப்புப் பணம் எவ்வளவு என்பதை அறிய முதல் கட்டமாக ஐவர் குழு ஏற்படுத்தப்படும். அந்த ஐந்து நபர்கள் மீது லஞ்ச ஊழல் குற்றச்சாட்டு ஏதேனும் உள்ளதா, அவர்கள் கிரிமினல் வழக்குகளில் சம்பந்தப்பட்டிருக்கிறார்களா என்பதை அறிந்தவுடன், ஐவர் குழு நியமனம் பூர்த்தியாகும். அதற்குப் பிறகு, அந்த ஐவர் குழு எப்போது தங்கள் பணியைத் தொடரலாம் என்பதைப் பற்றி ஆராய இரு நபர் குழு அமைக்கப்படும். அந்த இரு நபர் குழுவின் அதிகாரங்கள் கடமைகள் ஆகியவற்றை மத்திய அரசால் நியமிக்கும் ஒரு நபர் குழு முடிவு செய்யும். மத்திய அரசு உத்திரவிட்டதும் அந்த ஒரு நபர் குழு தன் பணியை ஆரம்பிக்கும்.

4. ஒரே ஊழலில் ஐம்பது லட்சம் கோடி ரூபாய்க்கு மேல் ஊழல் செய்து மாட்டிக் கொள்ளும் ஊழல் பேர்வழிகளை மன்னிக்க அரசு தயாராக இல்லை. அவர்களுக்கு மரண தண்டனை விதிக்கப்பட வேண்டும் என்ற கோரிக்கையை மத்திய அரசு ஏற்றுக் கொள்கிறது. ஆனால் மரண தண்டனை பெறும் அத்தகைய ஊழல்வாதிகள் ஜனாதிபதிக்கு கருணை மனு அனுப்ப, மத்திய அரசு மனிதாபிமானத்தோடு அனுமதிக்கும். ஜனாதிபதி, வரிசைக்கிரமமாகவும், ஐந்து வருடங்களுக்கு ஒரு மனு என்ற நெறிமுறைப்படியும் மனுவைப் பரிசீலிப்பார். பிறகு தனது உத்தரவை சம்பந்தப்பட்ட மாநில முதல்வருக்கு அனுப்புவார். மாநில முதல்வர் அதை கவர்னருக்கும், கவர்னர் அதை மீண்டும் முதல்வருக்கும், முதல்வர் அதை மீண்டும் கவர்னருக்கும், பக்கத்து மாநில முதல் வருக்கும் சில காலம் அனுப்பிக் கொண்டிருப்பார்கள். அதற்கு பிறகு ஜனாதிபதி மறு உத்தரவு பிறப்பிக்கும் வரை அந்த ஊழல் ஆசாமி ஆயுள் முடியாமல் உயிரோடிருந்தால், அடுத்த ஜனாதிபதி மறுபடியும் முதலிலிருந்து நடவடிக்கையைத் தொடங்குவார்.

5. வெளிநாட்டு வங்கிகளில் பதுக்கி வைக்கப்பட்டிருக்கும் மொத்த கறுப்புப் பணம் எவ்வளவு என்று ஒவ்வொரு வருடமும் மத்திய அரசு கண்டுபிடித்து மக்களுக்குத் தெரிவிக்கும். இந்தப் பணத்தை மீட்பது குறித்து அனைத்து மாநில முதல்வர்கள் மற்றும் அனைத்துக் கட்சிகளின் கருத்தை அறிந்தவுடன், அந்த கறுப்புப் பணம் கிரிமினல் செயல்கள் மூலம் ஈட்டப்பட்டதா, வருமான வரித் துறையை ஏய்த்து சம்பாதிக்கப்பட்டதா என்று அறிய பொருளாதார நிபுணர் குழு, சம்பந்தப்பட்ட உலக நாடுகளில் சுற்றுப்பயணம் செய்து விசாரணை நடத்தும்.

பிறகு அவர்களது அறிக்கை சட்ட வல்லுனர்களால் பரிசீலிக்கப்படும். அதற்குப் பிறகும், அந்த கறுப்புப் பணத்தை உரியவர்கள் எடுத்துச் செல்லாமல் வங்கிகளிலேயே வைத்திருந்தால் அவர்கள் மீது என்ன நடவடிக்கை எடுப்பது என்பது குறித்து ஆராய்வது பற்றி பரிசீலிக்க ஆவன செய்ய உயர்மட்ட அமைச்சர்கள் குழு நடவடிக்கை எடுக்கும். இதற்காக ‘கறுப்புப் பணக் கண்டுபிடிப்புத் துறை’ உருவாக்கப்படும். இச் செலவுகளுக்காக முதல் நிதியாண்டில் 3735 கோடி ரூபாய் ஒதுக்க முடிவு செய்யப்பட்டுள்ளது.

6. எதிர்காலத்தில் வெளிநாட்டு வங்கிகளில் கறுப்புப் பணத்தைப் பதுக்குவதைத் தடுப்பதற்காக, 1.1.2012-க்குப் பிறகு கறுப்புப் பணத்தை நம் நாட்டு வங்கிகளிலேயே முதலீடு செய்ய சட்டம் கொண்டு வரப்படும். அவ்வாறு முதலீடு செய்பவர்களுக்கு ஒவ்வொரு ஆண்டும் 12 சதவிகிதம் ஊக்கத் தொகை வழங்கப்படும்.

7.பிரதமர் நேரிடையாக தேர்ந்தெடுக்கப்பட வேண்டும் என்ற கோரிக்கை ஏற்கெனவே நடைமுறைப்படுத்தப்பட்டு வருகிறது. இப்போதைய பிரதமர், சோனியாவால் நேரிடையாகத் தேர்ந்தெடுக்கப்பட்டவர்தான் என்பது குறிப்பிடத்தக்கது. இதே நடைமுறை எதிர்காலத்திலும் தொடரும் என்று மத்திய அரசு உறுதியளிக்கிறது.

ஜனாதிபதி ஆற்ற வேண்டிய ஆறுதல் உரை – சத்யா 

நமது நாட்டுத் தலைவர்கள் சுதந்திர தினம், குடியரசு தினம், தீபாவளி, பொங்கல் உள்ளிட்ட முக்கிய தினங்களில், ‘வறுமை ஒழிந்து வளம் பெருகட்டும்; எங்கும் மகிழ்ச்சி பொங்கட்டும்’ என்ற வகையில் நாட்டு மக்களுக்கு தெரிவிக்கும் வாழ்த்துச் செய்திகள் எந்த லட்சணத்தில் பலிக்கிறது என்பது தெரிந்த விஷயம்தான். எனவே, நாடும் நாட்டு மக்களும் இன்று இருக்கிற நிலையில், குடியரசு தினத்தையொட்டி, ஜனாதிபதி, நாட்டு மக்களுக்கு வழக்கமான முறையில் வாழ்த்து தெரிவிப்பதை விட, இப்படி யதார்த்தமான முறையில் உரை நிகழ்த்துவதுதான் பொருத்தமாக இருக்கும் என்பது நம் கருத்து. 

எனதருமை இந்தியக் குடிமக்களே! உங்களையெல்லாம் நினைத்தால் மிகவும் பாவமாக இருக்கிறது. நான் எப்படியோ ஜனாதிபதியாகி விட்டேன். என் பிரச்சனை தீர்ந்துவிட்டது. பெரிய பங்களா, பல்லாயிரக்கணக்கில் சம்பளம், கார்கள், ஏராளமான வேலைக்காரர்கள் – என சகல வசதிகளோடும் வாழ வழி கிடைத்து விட்டது. வேலை மட்டும்தான் இல்லை. மரண தண்டனை பெற்ற குற்றவாளிகளின் கருணை மனுக்களைக் கூட வருஷக் கணக்கில் பரிசீலித்துக் கொண்டிருந்து விட்டு, அப்படியே அடுத்த ஜனாதிபதியிடம் ஒப்படைத்துவிட்டு நைஸாக வெளியேறி விடலாம். கேட்பார் யாருமில்லை. என் முன்னேற்றத்தை மட்டும் வைத்து, பெண் இனமே முன்னேறி விட்டது என்று சொல்லிக் கொள்ளவும் முடிகிறது. 

ஆனால், பாவம் உங்கள் பிரச்சனைகளைத் தீர்க்கத்தான் யாரும் இல்லை. இருந்தாலும் இந்த நன்னாளில், நீங்கள் எப்படியெல்லாம் கஷ்டப்படுகிறீர்கள் என்பதை உங்களுக்கு நினைவுபடுத்தி, ஆறுதல் கூற வேண்டியதை என் கடமையாகக் கருதுகிறேன். 

விலைவாசி உயர்வு உங்களை மட்டும்தான் பாடாய்படுத்துகிறது என்று நினைக்க வேண்டாம். பல மாநிலங்களில் சட்டசபைத் தேர்தல் நெருங்குவதால், பிரதமர் உள்ளிட்ட பல தலைவர்களும் உங்களைப் போலவே விலைவாசியை நினைத்து கவலைப்பட்டு கொண்டுதானிருக்கிறார்கள். எனவே, அத்தலைவர்களுக்கு ஒத்துழைப்பு தரும் வகையில், இப்போதைய விலைவாசியை அடுத்த வருஷ விலைவாசியோடு ஒப்பிட்டுப் பார்த்து, இப்போது பொருட்கள் எவ்வளவு சீப்பான விலையில் கிடைக்கின்றன என்பதைப் புரிந்து கொண்டு மகிழ்ச்சியடைய நீங்கள் பழகிக் கொள்ள வேண்டும். 

அரிசி குறைவான விலையில் கிடைத்தால், சோறாக்கி அதை மட்டும் சாப்பிட்டுப் பசியாறலாம். சோறாக்கவும் வசதியற்றவர்கள் அரிசியாகவே சாப்பிடத் தொடங்கி விட்டால், விலைவாசிக் கஷ்டம் அவ்வளவாகத் தெரியாது. வறுமையை ஒழிப்பதற்காக 65 ஆண்டுகளாக பாடுபட்டு வரும் உங்கள் அரசு தொடர்ந்து, இதே போல இன்னும் பல ஆண்டுகள் உங்களுக்காக பாடுபடும். அதுவரை சற்றுப் பொறுத்துக் கொள்ளும்படி கேட்டுக் கொள்கிறேன். 

நாடு முழுவதும் லட்சக்கணக்கான வாலிபர்கள் வேலை தேடி தவித்துக் கொண்டிருக்கும் நிலையும் மிகவும் கவலையளிக்கிறது. காஷ்மீரில் கலவரம் செய்து கல்லெறிய, வாரம் நானூறு ரூபாய் கொடுக்கப்படுவதாகத் தெரிகிறது. ஆனால் துரதிருஷ்டவசமாக இத்தகைய வேலை வாய்ப்புகள் எல்லா மாநிலங்களிலும் கிடைப்பதில்லை. கள்ளச் சாராயம், திருட்டு வி.சி.டி., போலி சர்ட்டிஃபிகேட் தயாரிப்பு போன்ற குடிசைத் தொழில்களுக்கோ கடும் போட்டி நிலவுகிறது. எனவே, இனியும் நல்ல வேலை தேடி நேரத்தை வீணாக்காமல், காலாகாலத்தில் ஏதாவது ஒரு அரசியல் கட்சியில் சேர்ந்து விட இளைஞர்களை நான் அழைக்கிறேன். மாநாடு, மீட்டிங்குகளுக்குச் சென்றால் பிரியாணி, பேட்டா கிடைக்கும். தொடர்ந்து அப்படியே பணியாற்றி படிப்படியாக முன்னேறி எம்.எல்.ஏ.வாகவோ மந்திரியாகவோ கூட ஆகிவிடலாம். அதற்குப் பிறகு உருப்படியான வேலைதான் இருக்காதே தவிர, வருமானம் கொட்டு கொட்டென்று கொட்டும். நீங்களும் உங்கள் குடும்பங்களும் மட்டுமாவது அமோகமாக வாழ முடியும். நாட்டில் ஏராளமான அரசியல் கட்சிகள் இருப்பதால், இத்தகைய வேலை வாய்ப்புகளுக்கு பஞ்சமில்லை. 

அரசியல்வாதியாக இருப்பதில் இன்னொரு வசதியும் இருக்கிறது. எவ்வளவுதான் சொத்து, நிலம் உங்கள் வசம் இருந்தாலும், அவற்றுக்கு எந்த ஆபத்தும் ஏற்படாது. வேறு வகையில் முன்னேறி சொத்து சேர்த்தால்தான், எந்த அரசியல்வாதி உங்களை மிரட்டி குறைந்த விலைக்கு நிலத்தை விற்கும்படி கட்டாயப்படுத்துவார்களோ, பிள்ளையைக் கடத்தி லட்சக்கணக்கில் பணம் கேட்டு யாராவது கொலை மிரட்டல் விடுப்பார்களோ என்று கவலைப்பட வேண்டியிருக்கும். ஆனால் அத்தகைய செல்வந்தர்களும் ஆளும் கட்சிக்கு அவ்வப்போது கணிசமாக நிதி கொடுத்து வந்தால், அத்தகைய ஆபத்துகளிலிருந்து தங்களைத் தற்காத்துக் கொள்ள இந்த ஜனநாயக நாட்டில் வசதி செய்யப்பட்டுள்ளது. 

ஆளும் கட்சியினரோடு சமாதானமாகப் போய்விடும் சினிமாக்காரர்கள் தைரியமாகத் தங்கள் படத்தை ரிலீஸ் செய்ய அனுமதிக்கப்படுவார்கள். திருட்டு வி.சி.டி. பயம் இருக்காது. அவர்களோடு நட்பு கொண்டிருக்கும் கல்வி நிறுவனங்கள் எவ் வளவு வேண்டுமானாலும் கல்வி கட்டணமும் நன்கொடையையும் வசூலித்துக் கொள்ள முடியும். அரசை ஆதரிக்கும் பத்திரிகைகளுக்கு அரசு விளம்பரங்கள் தாராளமாக வழங்கப்படும். எனவே, அரசியல் தொடர்பு இல்லாதவர்களைத் தவிர மற்றவர்கள் இந்த நாட்டில் வளமாகவே வாழ்கிறார்கள். எனவே, ஆளும் கட்சிகளுக்கு அடங்காதவர்களும், விரைவில் நாட்டு நடப்பைப் புரிந்து கொண்டு திருந்தி விட்டால், இந்த நாடு உலகில் முன்னணி நாடாக இருக்கும் என்பதில் எனக்கு ஐயமில்லை. 

எண்ணற்ற கொலை, கொள்ளைகளுக்கு இடையேயும் நீங்கள் மட்டும் எப்படியோ உயிர் தப்பி வாழ்வது எனக்கு வியப்பை அளிக்கிறது. சட்டம் – ஒழுங்கை ஓரளவாவது சீர்படுத்தும் நோக்கத்தோடுதான், நமது ஆட்சி முறையில் பல கிரிமினல்கள் எம்.பி.க்களாகவும், எம்.எல்.ஏ.க்களாகவும் ஆகியிருக்கிறார்கள். அவர்கள் முழுநேர கிரிமினல்களாகவே தொடர்ந்திருந்தால் உங்கள் கதி என்னவாகியிருக்கும் என்று தயவு செய்து நினைத்துப் பாருங்கள். 

இந்த அரசு அடிக்கடி கவலைப்படுகிற விஷயங்களில் தீவிரவாதமும் ஒன்று. தீவிரவாதிகளை இந்த அரசு துணிவோடு எச்சரிக்கிறது. கடுமையாகக் கண்டிக்கிறது. அத்தோடு விட்டுவிடாமல், அச்சமும் படுகிறது. இதற்கு மேல் ஒரு அரசு என்னதான் செய்ய முடியும்? தீவிரவாதிகளும் இந்த நாட்டு மக்கள்தான். நம் நாட்டு மக்களைக் கொல்லும் நம் நாட்டு மக்கள் மீதே எப்படி நடவடிக்கை எடுக்க முடியும்? பிடிபட்டவர்கள் மீதே நடவடிக்கை எடுக்க முடியவில்லை எனும்போது, பிடிபடாதவர்கள் மீது நடவடிக்கை எடுப்பது நியாயமா? 

எனவே, தீவிரவாதிகளுடன் பேச்சுவார்த்தை நடத்தி, அவர்களையும் அரசியலுக்கு கொண்டு வருவது ஒன்றுதான் இப்பிரச்சனைக்கு ஒரே தீர்வு. அரசியல்வாதிகளும், தீவிரவாதிகளும் ஒரே அணியில் வந்துவிட்டால், தீவிரவாதம் தனியாக இயங்குவது தடுக்கப்பட்டு விடும் என்று திட்டமிட்டு, இந்த அரசு செயலாற்றிக் கொண்டிருக்கிறது. அதற்குள் தீவிரவாதத்துக்கு பலியாகி அரசுக்கு கெட்ட பெயர் ஏற்படுத்தாதபடி மக்கள் எச்சரிக்கையோடு இருக்க வேண்டும். 

ஊழலை ஒழிக்கவும் இந்த அரசு அரும்பாடுபட்டுக் கொண்டிருக்கிறது. எப்படி முயன்றும் ஊழலை ஒழிக்க முடியாததால், கடைசி முயற்சியாக முள்ளை முள்ளால் எடுப்பது போல, ஊழல் குற்றச்சாட்டுக்கு உள்ளானவரையே ஊழல் கண்காணிப்பு துறை இயக்குனராக நியமித்து, ஊழலை ஒழிக்க இந்த அரசு முற்பட்டுள்ளது. 

அரசியல் ஊழலைத் தாங்கிக் கொள்ள முடியாத இதய பலவீனம் உள்ளவர்கள் பத்திரிகை படிப்பதையோ, செய்தி கேட்பதையோ நிறுத்திக் கொள்வது உத்தமம். லட்சம் கோடி ரூபாய் ஊழல் போன்ற செய்திகளை அன்றாடம் படித்து, ரத்தக் கொதிப்பு அதிகரித்து விடாமல் உங்களைக் காத்துக் கொள்ள வேண்டிய பொறுப்பு உங்களுக்கு இருக்கிறது. அத்துடன், ஊழலால் பாதிக்கப்பட்டு நஷ்டமடைவதற்கு என்று ஒரு கணிசமான தொகையை மாதா மாதம் ஒதுக்கி வைப்பது நல்லது. 

இன்னொரு விஷயம். பல நீதிபதிகளே ஊழல் ஜோதியில் கலந்து விட்ட நிலையில், நீங்கள் மட்டும் திருந்த மறுப்பது சரியல்ல. உங்களைத் திருத்தும் முயற்சியாகத்தான், ஊழல் மூலம் நீங்கள் ஏமாந்த தொகையில் ஒரு சிறு பகுதி, தேர்தல் சமயத்தில் உங்களுக்கே திருப்பித் தரப்படுகிறது.

மக்கள் இப்படி பலவகையிலும் கஷ்டப்படுவதை பார்க்க இந்த அரசு உண்மையில் விரும்பவில்லை. ஆகவேதான், பரவலாக மதுக் கடைகளைத் திறந்து வைத்து, மக்கள் தங்கள் கஷ்டங்களை தாற்காலிகமாக மறக்கவும் இந்த அரசு தன்னால் இயன்ற உதவியைச் செய்து வருகிறது. 

ஏழை, நடுத்தர மக்களை இந்த அரசு சரியாகக் காப்பாற்றவில்லை என்பதற்காக, அது யாரையுமே காப்பாற்றுவதில்லை என்று குற்றம்சாட்டுவதும் நியாயமல்ல. பெட்ரோல் விலையை அடிக்கடி ஏற்றி, கச்சா எண்ணெய் நிறுவனங்களைக் காப்பாற்றுவது இந்த அரசுதான். பல லட்சம் கோடி ரூபாய் கறுப்புப் பணத்தை வெளிநாட்டு வங்கிகளில் போட்டுள்ளவர்களைக் காட்டிக் கொடுக்க விரும்பாமல், அவர்களையும் இந்த அரசுதான் பாதுகாத்து வருகிறது. தனக்கு வேண்டிய எந்த அமைச்சராவது ஊழல் செய்து மாட்டிக் கொண்டால், ‘அவர் ஊழலே செய்யவில்லை’ என்று நற்சான்றிதழ் அளித்து சட்டத்தின் பிடியிலிருந்து காப்பாற்றுகிறது. நக்ஸலைட், மாவோயிஸ்ட், தீவிரவாதிகளை மட்டுமல்ல, தூக்குத் தண்டனை பெற்ற தீவிரவாதியைக் கூட காப்பாற்றுகிற இரக்க சிந்தனை இந்த அரசிடம்தான் உள்ளது. 

இப்படி எவ்வளவு பேரைத்தான் இந்த அரசாங்கம் காப்பாற்றும்? அதற்கு ஒரு அளவு இல்லையா? அதனால்தான் பொது மக்களை மட்டும் கைவிட்டு விடுகிறது. ஆகவே எனதருமை குடிமக்களே! அரசாங்கம் காப்பாற்றா விட்டாலும் ஆண்டவன் எப்படியாவது உங்களைக் காப்பாற்றி விடுவார். தைரியமாக இருங்கள். 

கஜானா மூலம் கட்சி வளர்க்கும் கலை – சத்யா 

பெருமழையால் பாதிக்கப்பட்ட நெற்பயிர்களுக்கு நிவாரணத் தொகையாக ஹெக்டேருக்கு 10,000 ரூபாய், மற்ற வகை பயிர்களுக்கு ரூ.7500, மானாவரிப் பயிர்களுக்கு ரூ.4000, குடிசைகள் முழுமையாக சேதம் அடைந்திருந்தால் ரூ.5000, பகுதி சேதம் அடைந்திருந்தால் ரூ.2500, மாடு செத்தால் ரூ.10,000, கன்றுக்குட்டிக்கு ரூ.5000, ஆட்டுக்கு ரூ.1000 – என்றெல்லாம் அறிவித்திருக்கிறார் முதல்வர். ‘ஆட்டுவித்தால் ஆடுகிறேன்’ என்று கிறிஸ்தவர்களிடையே உரையும் ஆற்றியிருக்கிறார். ஸ்பெக்ட்ரம் பிரச்சனையால் பாதிக்கப்பட்டதிலிருந்து ஏதோ ஒரு முடிவோடுதான் இருகிறார் என்று நன்றாகவே புரிகிறது. இழந்த செல்வாக்கை ஈடுகட்ட அரசு இன்னும் என்னவெல்லாம் செய்யக் கூடும் என்று அவர்கள் வழியிலேயே சிந்திக்கிறோம். 

ஆற்காடு வீராசாமி : காங்கிரஸ் மாநாட்டிலே சோனியா பேசினதை கவனிச்சீங்களா? ‘ஊழலுக்கு எதிராக போர் தொடங்கி விட்டது’ன்னு பேசியிருக்காங்க. கழகத்தோட மோதத் தயாராயிட்டாங்களோன்னு சந்தேகம் வரலை? இதைச் சும்மாவிடக் கூடாதுங்க. 

கருணாநிதி : அனாவசியமா நீங்களும் பயந்து என்னையும் பயமுறுத்தாதீங்க. ஊழலுக்கு எதிரான போர்னா, கர்நாடக பா.ஜ.க. ஊழலுக்கு எதிரான போர்னுதான் அர்த்தம். நம்ம கூட்டணி இன்னும் உடையலைன்னுதான் நினைக்கிறேன். அதுக்குள்ளே குழப்பாதீங்க. 

அன்பழகன் : இருந்தாலும் அம்மையார் – அதாவது சோனியா அம்மையார் – போற போக்கே சரியில்லைங்க. ஸி.பி.ஐ. ரெய்டு, சம்மன், விசாரணைன்னு நடக்கிறதைப் பார்த்தா, வில்லங்கமா ஏதாவது திட்டம் போடறாங்களோன்னு ஒரு பயம் வரத்தான் செய்யுது. சுயமரியாதைக் கொள்கைப்படி, கழகம் எந்த அளவுக்கு அடங்கிக் கிடக்கலாம்னு ஒரு முடிவெடுக்கிறது நல்லதுதான். 

கருணாநிதி : நாம அவசரப்பட்டு எடுக்கிற எந்த நடவடிக்கையும் அம்மையார்கள் இணைப்புக்குக் காரணமா இருந்துடக் கூடாது. நம்ம அணியிலே எந்தக் கட்சி இருந்தாலும் இல்லைன்னாலும், கழகம் மறுபடியும் அரியணை ஏறணும். பதவி முக்கியமில்லை. ஆனா முக்கியமான பல விஷயங்கள் பதவி இருந்தாத்தான் கிடைக்கும். பதவியை வெறுக்கணும். ஆனா பதவியிலே இருந்தாத்தான் பதவியை வெறுக்க முடியும். 

துரைமுருகன் : மறுபடியும் நமக்கு இன்னொரு சான்ஸ் கிடைக்கும்ங்களா? மக்கள் ஸ்பெக்ட்ரம் பிரச்சனையை மறக்கணும். மின்வெட்டை மறக்கணும். விலைவாசி உயர்வு, சட்டம் – ஒழுங்கு சீர்கேடுன்னு ஏராளமான விஷயங்களை மறக்கணுமே. எப்படி முடியும்? 

கருணாநிதி : அதுக்கான நடவடிக்கைகளை நான் எடுக்க ஆரம்பிச்சுட்டேன். வெள்ளத்தால் பயிர்கள் சேதமடைஞ்சா எவ்வளவு, குடிசைகள் சேதம் அடைஞ்சா எவ்வளவு, ஆடு மாடுகள் செத்தா எவ்வளவுன்னு யாரும் கேக்காமலேயே அறிவிச்சுட்டேனே. அதுலே எப்படியும் அஞ்சு சதவிகித ஓட்டாவது ஏறியிருக்கும். ஆனா இது போதாது. இப்படி இன்னும் பல வளர்ச்சித் திட்டங்களைத் தீட்டணும்.

பொன்முடி : பயிர்ச் சேதம், குடிசை சேதம் மாதிரியே பல சாலைகளும் சேதம் அடைஞ்சிருக்குதுங்க. சேதம் அடைஞ்ச சாலைகளிலே இருக்கிற ஒவ்வொரு வீட்டுக்கும் தலா ரெண்டாயிரம் கொடுத்துடலாம். கவர்ன்மென்ட் பணத்தை கையிலே வெச்சுக்கிட்டு ஏன் கஞ்சத்தனம் பண்ணனும்? 

துரைமுருகன் : கரெக்ட். தேர்தல் கமிஷன் கெடுபிடியாலே, ஓட்டுக்கு பணம் தர முடியாத சூழ்நிலை வந்துட்டா, ஆபத்தாப் போயிடும். அதுக்குப் பதில் இப்படிக் கொடுத்துடலாம். 

எ.வ. வேலு : அதே மாதிரி, ஏப்ரல், மே சமயத்திலே மக்கள் வெயிலால கஷ்டப்படுவாங்க. வெள்ள நிவாரண நிதி மாதிரி, வெயில் நிவாரண நிதியும் அறிவிச்சுடலாம். ரேஷன் கார்டு இருக்கிற எல்லா குடும்பத்துக்கும் கலைஞர் படம் போட்ட இலவச குடையும் கொடுக்கலாம். 

ஆற்காடு வீராசாமி : வெங்காய விலை ஏற்றத்துக்கும் ஏதாவது செய்யணும். 

கருணாநிதி : விலையைக் குறைக்கிறதெல்லாம் கஷ்டம். அதுக்குப் பதிலா, அந்த 50 ரூபாய் பாக்கெட்டிலே இலவசமா ஒரு வெங்காயத்தைப் போட்டுருவோம். அதே அம்பது ரூபாதான். கூடுதலா ஒரு வெங்காயம். பல லட்சம் தாய்மார்களும், கழகமும் பயன் அடையற திட்டம். 

அன்பழகன் : திரைப்படங்களுக்கு தமிழ்ப் பெயர் வெச்சா கேளிக்கை வரி ரத்துன்னு ஒரு தமிழ் வளர்ச்சித் திட்டம் கொண்டு வந்தோமே... 

கருணாநிதி : அதைப் பத்தித்தான் நானும் சிந்திச்சுக்கிட்டிருக்கேன். தமிழ் பேர் வெக்க முடியாம திரையுலகத்தினர் கஷ்டப்படறதாலே, ‘தமிழ் திரைப்படத்துக்கு எந்த மொழியிலேயும் பேர் வெக்கலாம். ஆனா, அந்த பேர்லே ஒரே ஒரு தமிழ் எழுத்தாவது இருந்தாத்தான் வரிச் சலுகை’ன்னு ஆணை வழங்கி திரையுலகத்தினர் ஓட்டைத் திரட்டிடறேன்.

துரைமுருகன் : அருமையான ஐடியாங்க. திரையுலகத்தினர் வசமா மாட்டிக்கிட்டாங்க. பாராட்டு விழா நடத்தாம தப்பிக்கவே முடியாது. 

அன்பழகன் : வியாபாரிகள் ஓட்டும் முக்கியம். வணிக நிறுவனங்கள் தமிழில் போர்டு வெச்சா விற்பனை வரி ரத்துன்னு அறிவிச்சுடலாம். கணிசமா நஷ்டப்பட்டாத்தான் தமிழ் வளரும். இதன் மூலம் அரசுக்கு 4858 கோடி ரூபாய் இழப்பு ஏற்பட்டாலும், நமக்கு லாபம்தான். கழகத்துக்கு பல லட்சம் ஓட்டுகள் குவியும். 

ஸ்டாலின் : தமிழ் மூலம் கட்சியை வளர்க்க இன்னொரு வழியும் இருக்குது. குழந்தைகளுக்கு தமிழ் பேர் வெச்சா, பிரசவச் செலவை அரசே ஏற்கும்னு உத்திரவு போட்டுடலாம். ஏற்கெனவே இருக்கிற வேற்று மொழிப் பெயரை தமிழ்லே மாத்திக்கிற ஒவ்வொரு வாக்காளருக்கும் ஊக்கத் தொகை வழங்கிடுவோம். 

எ.வ. வேலு : குழந்தைகள்னதும் ஞாபகத்துக்கு வருது. இப்ப தினமும் ஒரு முட்டை போடறோம். இனிமே மூணு வேளையும் முட்டை போட்டுருவோம். முட்டை கான்ட்ராக்டருக்கும் நல்லது. கழகத்துக்கும் நல்லது. 

ஆற்காடு வீராசாமி : வேலை இல்லாத இளைஞர்கள், வேலையில்லாத பட்டதாரிகளுக்கு உதவித் தொகை கொடுக்கிறோம். தேர்தல் நெருங்கற சமயத்திலே கூடுதலா ஏதாவது எதிர்பார்ப்பாங்க. இந்த ஆண்டு முதல், வேலையில்லாதவர்களுக்கும் இன்க்ரிமென்ட். பாராளுமன்றத் தேர்தல் நெருங்கும்போது ‘ப்ரமோஷன்’னு அறிவிச்சா இளைஞர்கள் ஓட்டு வேறே எங்கேயும் போகாது. 

துரைமுருகன் : தை முதல் நாள் கழகத்துக்கு தனியா புத்தாண்டு பிறக்கிறதை முன்னிட்டு, சிறையில் இருக்கிற 2011 கைதிகளை விடுதலை பண்ணி, அவங்களுக்கு ஊக்கத் தொகையா இறுதிக் காலம் வரை ஓய்வூதியம் வழங்கிடலாம். எப்படியும் தேர்தல் பணியாற்ற நமக்கு ஆட்கள் தேவைப்படும். இதன் மூலம் அந்த கைதிகள் குடும்பத்து ஓட்டும் கிடைக்கும். 

பொன்முடி : வழக்கமா பொங்கலுக்கு இலவச வேஷ்டி, சேலை கொடுக்கிறோம். அதுமட்டும் எப்படிப் போதும்? உள்ளாடைகளுக்கு மக்கள் சொந்தப் பணத்தை செலவு பண்ண முடியுமா? தேர்தல் நெருங்கும்போது நாம செலவைப் பார்க்க கூடாது. இந்த வருஷம் வேஷ்டி, சேலையோட உள்ளாடைகளையும் இலவசமா கொடுத்துடுவோம். 

ஸ்டாலின் : விவசாயிகளுக்கு இலவச பம்ப் செட் கொடுத்து இலவச மின்சாரமும் கொடுக்கிறோம். மின்சாரம் வராம பம்ப் செட்டை எப்படி பயன்படுத்தறதுன்னு அடாவடியா கேக்கறாங்க. அதனாலே, விவசாயிகள் ஓட்டை வாங்க ஏதாவது செய்யணும். 

கருணாநிதி : மின்வெட்டுப் பிரச்சனை நான் எட்டாவது முறை முதல்வராகும்போதுதான் தீரும். அதனாலே, விவசாயிகளுக்கு இலவச ஜெனரேட்டர் கொடுத்துத் தொலைக்கிறேன். 

எ.வ. வேலு : போலி மருந்துகள் புழக்கத்தைத் தடுக்கிறதும் கஷ்டம்தான். அதனாலே போலி மருந்துகளால் உயிரிழப்பவர்களின் ஈமச் சடங்கை அரசே ஏற்கும்னு அறிவிச்சுடலாம். ஏதோ, நம்மாலான உதவி. 

அன்பழகன் : சட்டம் – ஒழுங்கு பிரச்சனையையும் நம்மாலே சரி பண்ண முடியலை. கொலை, கொள்ளைகள் நடக்காத நாளே இல்லை. யாருக்கு எவ்வளவு பணம் கொடுத்தா இந்தப் பிரச்சனை தீரும்னு நாம கண்டுபிடிக்கணும். 

கருணாநிதி : அதுக்கும் ஒரு வழி இருக்குது. கலைஞர் மருத்துவக் காப்பீடு திட்டம் மாதிரி, கலைஞர் சட்டம் ஒழுங்கு ஆயுள் காப்பீடு திட்டத்தையும் கொண்டு வந்து, மக்களுக்கு இன்ஷ்யூரன்ஸ் பாலிஸி எடுத்துக் கொடுத்துருவோம். சட்டம் – ஒழுங்கு பாதிப்பால் உயிர் இழப்பவர் குடும்பங்களுக்கு இன்ஷ்யூரன்ஸ் நிறுவனமே பணம் வழங்கிடும். பலன் அடையறவங்க எனக்கு நன்றி தெரிவிப்பாங்க. 

துரைமுருகன் : ஏங்க, ஒரே ஒரு சந்தேகம். பணத்தைப் பற்றிக் கவலையே படாம கருணை உள்ளத்தோட எவ்வளவோ இலவசங்களை அறிவிக்கறீங்க. இந்த கேபிள் இணைப்பையும் இலவசமா கொடுத்தா, மக்கள் ஓட்டை அப்படியே அள்ளிடலாமே? 

கருணாநிதி : ஏன் இப்படி விவரமில்லாம பேசறீங்க? என் குடும்ப உறுப்பினர்கள் வருமானத்திலே நஷ்டத்தை ஏற்படுத்த எனக்கு என்ன உரிமை இருக்குது? நம்ம இஷ்டத்துக்கு ஆட்டம் போட அது என்ன அரசு கஜானாவா? குடும்ப கஜானாவை, அரசு கஜானாவா நினைக்கிறவன் நான் இல்லை

பதிலளிக்கிறார் பிரதமர் – சத்யா (2 மார்ச் 2011 இத‌ழ்)

2-ஜி ஸ்பெக்ட்ரம் ஊழல், எஸ்-பாண்ட் விவகாரம் போன்ற மெகா ஊழல்கள் வெளியானதால், தொலைக்காட்சி சேனல்களுக்கு நேரடியாகப் பேட்டியளித்து, தன் மீதான களங்கத்தைத் துடைத்துக் கொள்ளப் பெரிதும் முயன்றிருக்கிறார் பிரதமர். ஆனால், பிரதமரின் மீது இரக்கப்பட்டோ என்னவோ, நிருபர்கள் எந்தக் கேள்விக்குள்ளும் ஆழமாகச் செல்லவில்லை. நிரா ராடியா டெலிஃபோன் பேச்சு தொடர்பான கேள்விகளை எழுப்பவும் இல்லை. பேட்டியில் அந்தக் குறையும் இல்லாமல் இருந்திருந்தால், பிரதமரின் நேர்மையில் இருந்த கொஞ்சநஞ்ச சந்தேகமும் இப்படித் தீர்க்கப்பட்டிருக்கும். 


கேள்வி : வெளிநாட்டு வங்கிகளில் போடப்பட்டுள்ள இந்தியர்களின் கறுப்புப் பணம் நூறு நாட்களில் மீட்கப்படும் என்று கூறினீர்கள். ஆனால், கறுப்புப் பணத்தை வைத்திருப்பவர்களின் பட்டியல் கிடைத்தும்கூட, பணத்தை மீட்க நடவடிக்கை எடுக்காதது ஏன்?

பிரதமர் : நூறு நாட்களில் நான் மீட்பேன் என்று கூறவில்லை. மத்திய அரசு மீட்கும் என்ற அர்த்தத்தில்தான் சொன்னேன். கறுப்புப் பணத்தை மீட்க மத்திய அரசு நடவடிக்கை எடுக்கிறதா இல்லையா என்பது எனக்குத் தெரியாது. அது நீங்கள் மத்திய அரசைக் கேட்க வேண்டிய கேள்வி. 

கேள்வி : 2-ஜி ஸ்பெக்ட்ரம் ஒதுக்கீடு ஊழல் இரண்டு வருடங்களுக்கு முன்பே வெளியாகி விட்டது. ஆனால், ஸி.பி.ஐ. விசாரணை, ரெய்டு எல்லாம் தாமதமாக நடத்தப்பட்டுள்ளது. இது, குற்றவாளிகளைத் தப்ப விடும் செயல் அல்லவா? 

பிரதமர் : எல்லா ஊழலையும் ஒரே மாதிரியாக பார்க்க முடியாது. கூட்டணிக் கட்சிகளின் ஊழல் தொடர்பான நடவடிக்கைகளை கூட்டணிக் கட்சிகள்தான் மேற்கொள்ள வேண்டும் என்பதுதான் கூட்டணி தர்மம். அதற்காகத்தான் ஸி.பி.ஐ. காத்திருந்தது. எனினும், சுப்ரீம் கோர்ட், அரசு நிர்வாகத்தில் அநாவசியமாகக் குறுக்கிட்டு நெருக்கடி தந்ததால், சம்பந்தப்பட்ட கூட்டணி கட்சியின் அனுமதியோடு, கூட்டணிக்கு பாதிப்பு வராத வகையில் ஊழல் குற்றவாளிகளைக் கண்டுபிடிக்க நடவடிக்கை எடுக்கப்படுகிறது. இதிலிருந்தே யாரையும் தப்ப விடும் எண்ணம் மத்திய அரசுக்கு இல்லை என்பதை நீங்கள் புரிந்து கொள்ளலாம். 

கேள்வி : 2-ஜி ஸ்பெக்ட்ரம் ஊழலை தடுக்க மத்திய அரசு தவறியது ஏன்?

பிரதமர் : மத்திய அரசைப் பொறுத்தவரை ஒருவருடைய வேலையில் மற்றவர் குறுக்கிடும் வழக்கமில்லை. அந்த அளவுக்கு எல்லா அமைச்சர்களுக்கும் நிர்வாக சுதந்திரம் வழங்கப்பட்டிருக்கிறது. அதே சமயத்தில், 2-ஜி ஒதுக்கீட்டில் ஊழல் நடக்கப் போகிறது என்று ராசா என்னிடமோ அமைச்சரவையிலோ தெரிவிக்கவில்லை. தெரிவித்திருந்தால் நிச்சயமாகத் தடுத்திருப்போம். பா.ஜ.க. ஆட்சியிலும் இப்படித்தான் யாரிடமும் சொல்லாமல் ஊழல் செய்யப்பட்டது. அதை மறைக்கத்தான் எதிர்க் கட்சிகள் இப்போது இப்பிரச்சனையை எழுப்புகின்றன. பா.ஜ.க.வின் வழிமுறையைத்தான் ராசா பின்பற்றியிருக்கிறார். அதில் என்ன தவறு? 

கேள்வி : ஜே.பி.ஸி. விசாரணையைச் சந்திக்க, மத்திய அரசு இந்த அளவுக்குத் தயங்குவதற்கு என்ன காரணம்?

பிரதமர் : மத்திய அரசு தயங்குகிறதா இல்லையா என்பது பற்றி நான் பதில் சொல்ல முடியாது. ஆனால் எந்த விசாரணைக்கும் நான் தயங்கவில்லை. யாருடைய கேள்விக்கும் பதிலளிக்க நான் எப்போதும் தயார் நிலையிலேயே இருக்கிறேன். சொல்லப் போனால், என்னுடைய வேலையே மற்றவர்களுக்கு பதில் சொல்வதுதான். ஆனால் யாரையும் கேள்வி கேட்கும் அதிகாரம் எனக்கில்லை. ஆஃப்டர் ஆல், நான் ஒரு பிரதமர். என்னால் சில விஷயங்களைப் பார்த்துக் கொண்டிருக்கத்தான் முடியும். அப்படியும் நான் எல்லா விஷயங்களையும் பார்த்துக் கொண்டிருக்கிறேன். 

கேள்வி : மந்திரிசபையில் யாருக்கு எந்த இலாகா என்று நிரா ராடியாவும், வேறு சிலரும் முடிவு செய்தது எப்படி?

பிரதமர் : ஜனநாயக நாட்டில் யாரும் எந்தச் செயலிலும் ஈடுபடலாம். கூடுமானவரை அது சட்ட விரோதமாக இருக்கக் கூடாது என்பதுதான் முக்கியம். மந்திரிசபை உருவாக்கம் என்பது தனிப்பட்ட ஓரிருவர் செய்து விடக் கூடியதல்ல. அது ஒரு கூட்டுப் பொறுப்பு. மந்திரிகளை நியமிப்பதில் நிரா ராடியாவின் அனுபவம் மத்திய அரசுக்கு பயன்பட்டிருப்பது வரவேற்கத் தகுந்ததுதான். 

கேள்வி : மத்திய மந்திரிசபை மாற்றம் எப்போது இருக்கும்?

பிரதமர் : அது எனக்கு எப்படித் தெரியும்? நான் நிரா ராடியா அல்ல. என் அதிகாரத்திற்கு உட்பட்டவற்றை மட்டும்தான் நான் தெரிந்து கொள்ள முடியும். மந்திரி சபை மாற்றப்படுவதற்கு சற்று முன்போ அல்லது மாற்றப்பட்ட பிறகோ, பிரதமர் என்கிற முறையில் முதலில் என்னிடம்தான் தெரிவிக்கப்படும். அப்போது உங்களை அழைத்து அறிவிப்பேன். 

கேள்வி : தொலைத் தொடர்பு இலாகாவின் மந்திரியாக இருந்த ராசா மீது ஏற்கெனவே ஊழல் குற்றச்சாட்டுகள் இருந்த நிலையில், மீண்டும் அதே இலாகாவை அவரிடமே ஒப்படைத்தது ஏன்?

பிரதமர் : ஒருமுறை ஊழல் செய்தவர் அடுத்த முறையும் ஊழல் செய்வார் என்று முடிவு கட்டிவிடுவது தவறு. முதல்முறை என்னை நேர்மையான பிரதமர் என்று நினைத்த பலர், இப்போது தங்கள் கருத்தை மாற்றிக் கொள்ளவில்லையா? தவிர, ஊழல் செய்யாத நபர்களைத்தான் மந்திரிகளாக்க வேண்டும் என்றால், அப்படிப்பட்ட நபர்கள் கிடைக்க வேண்டாமா? மீண்டும் ராசாவுக்கே தொலைத் தொடர்பு இலாகா தரப்பட வேண்டும் என்பது தி.மு.க. எடுத்த முடிவு. தி.மு.க.வின் உள்கட்சி விவகாரங்களில் நான் எப்படித் தலையிட முடியும்? அவ்வளவாக ஊழல் செய்யாத ஓரிருவரும் மத்திய அமைச்சரவையில் இடம் பெற்றிருக்கிறார்கள் என்பதை நீங்கள் மறந்து விடக் கூடாது. 

கேள்வி : 2ஜி ஒதுக்கீட்டில் ஊழல் நடக்கவே இல்லை என்கிறீர்களா?

பிரதமர் : ஏதோ அந்த ஒரு ஒதுக்கீட்டில்தான் ஊழல் நடந்துள்ளது என்பதுபோல் திட்டமிட்டு பிரச்சாரம் செய்யப்படுகிறது. இந்தியா ஊழலற்ற நாடு என்பதை இந்தியர்களே ஏற்க மறுத்தால், உலக நாடுகள் நம்மை எப்படி மதிக்கும்? அர சுக்கு எதிரான ஊழல் வழக்குகளை ஏற்காமல் நீதிமன்றங்கள் அரசுடன் ஒத்துழைக்க வேண்டும். ஊழல் பற்றி கேள்விகள் கேட்டு நீதிமன்றங்களும் மீடியாவும் அரசை ஹிம்சிப்பது வருத்தம் அளிக்கிறது. இத்தகைய குறுக்கீடுகள் நாட்டின் முன்னேற்றத்தைப் பாதிக்கும் என்பதை உணர வேண்டும். 

கேள்வி : மத்திய மந்திரி பதவியை பெறுவதற்காக தயாநிதி மாறன், தயாளு அம்மாவுக்கு 600 கோடி ரூபாய் கொடுத்ததாக, நிரா ராடியா டெலிஃபோன் பேச்சில் வரும் தகவல் குறித்து உங்கள் கருத்து என்ன...?

பிரதமர் : நிதி சம்பந்தப்பட்ட விஷயங்களை நிதி அமைச்சர் விளக்குவதுதான் முறை. ஆனால், மீடியா நேர்மையைக் கடைப்பிடிக்க வேண்டும். மந்திரிசபையில் இடம் பெறுவதற்காக மற்ற மந்திரிகள் யாருக்கு எவ்வளவு கொடுத்தார்கள் என்று உங்களுக்குத் தெரியுமா? அவர்களை எல்லாம் விட்டு விட்டு, ஒரு குறிப்பிட்ட மந்திரி கொடுத்ததைப் பற்றி மட்டும் கேள்வி கேட்பது, மீடியாவின் உள்நோக்கத்தைக் காட்டுகிறது. 

கேள்வி : 2-ஜி ஸ்பெக்ட்ரம் ஒதுக்கீடு தொடர்பான ஆவணங்கள் சிலவும், கேஸ் டைரியும் காணவில்லை என்று ஸி.பி.ஐ.யே கூறியிருக்கிறது. இதன் மூலம் குற்றவாளிகளைத் தப்புவிக்க முயற்சி நடக்கிறதோ என்ற சந்தேகம் எழுகிறதே? 

பிரதமர் : 2-ஜி ஆவணங்கள் மட்டும் காணாமல் போனால் நீங்கள் சந்தேகப்படலாம். ஏற்கெனவே காமன்வெல்த் விளையாட்டுப் போட்டி ஊழல், ஆதர்ஷ் குடியிருப்பு ஒதுக்கீடு ஊழல் தொடர்பான ஆவணங்களும் காணாமல் போயிருக்கின்றன. அரசுக்கு எந்த பாரபட்சமான எண்ணமும் இல்லை என்பதற்கு இதைவிட என்ன ஆதாரம் வேண்டும்? போஃபர்ஸ் ஊழலில் எந்த ஆவணமும் காணாமல் போகவில்லை. குற்றவாளி பிடிபட்டு விட்டாரா? எனவே, ஆவணங்கள் காணாமல் போவதற்கும் குற்றவாளிகள் தப்புவதற்கும் முடிச்சு போடுவது சரியல்ல. 

கேள்வி : உங்கள் பொறுப்பிலுள்ள இலாகாவைச் சேர்ந்த இஸ்ரோ, உங்களுக்கே தெரியாமல் தேவாஸ் மல்டிமீடியாஸ் கம்பெனிக்கு சாட்டிலைட்களை செலுத்த ஒப்புக் கொண்ட வகையில், அரசுக்கு இரண்டு லட்சம் கோடி ரூபாய் இழப்பு என்று ஸி.ஏ.ஜி. கூறியிருக்கிறதே? 

பிரதமர் : நீங்கள் குறிப்பிடும் விவகாரம் எனக்குத் தெரியாமல்தான் நடந்ததா என்பது பற்றி எனக்குத் தெரியாது. அது விசாரணைக்குப் பிறகு தான் தெரியும். ஆனால் இரண்டு லட்சம் கோடி ரூபாய் நஷ்டம் என்பதை ஏற்க முடியாது. அது யூக மதிப்பீடுதான். அது 1.99 லட்சம் கோடியாகவோ அல்லது 1.98 லட்சம் கோடியாகவோ கூட இருக்கலாம். அதை மறைத்து ஒரேயடியாக இரண்டு லட்சம் கோடி நஷ்டம் என்று குற்றம்சாட்டுவது, ஸி.ஏ.ஜி.யின் பொறுப்பின்மையைக் காட்டுகிறது. அதற்காக அவர்களிடம் விளக்கம் கேட்கப்படும். 

கேள்வி : பிரதமர் பதவியிலிருந்து விலகுவீர்களா?

பிரதமர் : நானாக விலகும் அதிகாரம் எனக்கு இல்லை. யாராவது விலக்கும் வரை, விலகும் பேச்சுக்கே இடமில்லை. அடுத்தமுறை, யாராவது என்னை பிரதமராக ஆக்கினால்தான் பிரதமராவேன். இல்லாவிட்டால் ஆக மாட்டேன்.

ஞாபகம் வருதே... ஞாபகம் வருதே...! – சத்யா

தி.மு.க. அரசை மிகக் கடுமையாக விமர்சித்து வந்த பா.ம.க. நிறுவனர் ராமதாஸ், திடீரென கருணாநிதியைச் சந்தித்து, தி.மு.க. கூட்டணியில் பா.ம.க.வை இடம் பெறச் செய்திருக்கிறார். இருவரின் பெருந்தன்மையையும் நினைத்தால் உடல் சிலிர்க்கிறது. நாம் அவர்களைப் போல் இல்லாமல், சாதாரண மனிதர்களாக இருப்பதால், ராமதாஸின் பழைய பேச்சுக்கள் எல்லாம் தேவையில்லாமல் நமது ஞாபகத்திற்கு வருகின்றன. ராமதாஸ் அவற்றையெல்லாம் முற்றிலும் மறந்துவிட வேண்டும். இல்லாவிட்டால், தேர்தல் பிரச்சார மேடையில் அவரது பேச்சு – பல நிலைப்பாடுகளும் கலந்து – இப்படி அமைந்து விடக் கூடிய ஆபத்து இருக்கிறது.


‘இந்தத் தேர்தல்லே கலைஞரும் நானும் வெற்றிக் கூட்டணி அமைத்திருக்கிறோம். இரண்டுகோடி வன்னியர்களும் நான் சொல்றபடி ஓட்டு போட்டா, தி.மு.க.வுக்கும் அ.தி.மு.க.வுக்கும் டெபாஸிட்டே கிடைக்காது. ஆனால், வன்னியரை முதல்வராக்கணும்ன்ற எண்ணம் வன்னியர்களுக்கே இல்லை. அதனாலதான் நான் கோபாலபுரத்துக்கும் போயஸ் தோட்டத்துக்கும் மாறி மாறி காவடி தூக்க வேண்டியிருக்குது. இன்னும் எத்தனை காலத்துக்குத்தான் நாம் நாற்பது ஸீட்டுக்கும் ஐம்பது ஸீட்டுக்கும் திராவிடக் கட்சிகளிடம் கையேந்திக் கொண்டிருப்பது? ஆகவேதான், கலைஞர் நமது பலத்தை உணர்ந்து 31 தொகுதிகளை ஒதுக்கியிருக்கிறார்.

அடிக்கடி கூட்டணி மாறுகிறோம்னு விமர்சிக்கிறாங்க. மற்ற கட்சிகள் மாறலையா? தி.மு.க. மாறி மாறி கூட்டணி வைக்கலையா? மத்தியிலே எந்த ஆட்சி நடந்தாலும் ஓடிப் போய் ஒட்டிக்கிறவர்தானே கலைஞர்?

தமிழ்நாட்டிலே இப்ப ஆட்சியா நடக்குது? தமிழ்நாடே குடிகார நாடாகி விட்டது. தமிழ்நாட்டுக்கு குடிகார நாடுன்னு பேரை மாத்தணும். அப்படி ஒரு போதைப் புரட்சி நடக்குது. டாஸ்மாக் ஊழியர்களை அரசு ஊழியர்களாக்கினால்தான் இந்தப் பிரச்சனை தீரும். இந்த கோரிக்கையை வலியுறுத்தி, தேர்தல் முடிஞ்ச மறுநாளே டாஸ்மாக் கடைகளை அடித்து நொறுக்கி, பூட்டுப் போடும் போராட்டத்தை பா.ம.க. நடத்தும்.

2009 பாராளுமன்றத் தேர்தல்லே அ.தி.மு.க.வும் தி.மு.க.வும் மறைமுகக் கூட்டணி வைத்து பா.ம.க.வை ஏழு இடங்களிலும் தோற்கடித்தன. பச்சை, பச்சை துரோகம் செய்த கட்சி தி.மு.க.. பென்னாகர இடைத் தேர்தல்லே ஓட்டுக்கு பணம் கொடுத்து ஜெயித்த கட்சிதான் தி.மு.க. இதுலே அண்ணன் கட்சி, தம்பி கட்சி வேறே. இது மதுரை தி.மு.க.ன்றாரு. யாரு? அழகிரி. கலைஞர் நல்லவர்தான். ஆனால் தி.மு.க. தொண்டர்கள் நம்ப வைத்து கழுத்தறுப்பவர்கள். அ.தி.மு.க. தொண்டர்கள் அப்படியில்லை. கூட்டணிக் கட்சிக்காக உயிரையும் கொடுப்பவர்கள். நான் இதை இப்ப சொல்லலை. உள்ளாட்சித் தேர்தல்லே, பா.ம.க. முதுகிலே தி.மு.க. குத்தினப்பவே சொன்னேன். கலைஞரைப் பார்க்க வேஷ்டியோட போனா, துண்டையும் உருவிகிட்டு அனுப்பிடுவாரு.

அன்புமணி சாதனைக்காக அமெரிக்காவே பாராட்டினாலும், கலைஞருக்கு மட்டும் பாராட்ட மனம் இல்லை. நான் எந்தக் கட்சியிடமும் பிச்சைக் கேட்கத் தயாரா இல்லை. தி.மு.க., அ.தி.மு.க. நம்மை தேடி வர வேண்டும். பா.ம.க. கூட்டணி அமைத்துத்தான் தேர்தலைச் சந்திக்கும். தனி அணி அமைக்கும் எண்ணம் இல்லை. ஏனென்றால், பா.ம.க.வை விட நல்ல கொள்கை உள்ள கட்சி இந்தியாவிலேயே கிடையாது.

தமிழ்நாட்டில் தமிழ் எங்கும் இல்லை, எதிலும் இல்லை. தமிழை வளர்க்கிறோம்னு சொல்லிட்டு மானாட மயிலாட நடத்தறவங்க ‘மக்கள் டி.வி.’யைப் பார்த்துக் கத்துக்கணும். இலவச டி.வி. கொடுக்கிறார்கள். டி.வி. இல்லாமல் மக்கள் வாழ முடியாதா? கொள்ளை அடித்த பணத்திலிருந்து ஒரு பகுதியைக் கிள்ளிக் கொடுக்கிறார் கலைஞர். இலவசம் கொடுப்பதற்கு தேர்தல் ஆணையம் தடை விதிக்க வேண்டும். தமிழ்நாட்டு மக்களை பிச்சைக்காரர்களாக்கியதுதான் இந்த ஆட்சியின் சாதனை. தமிழக அரசு குஜராத்தைப் பார்த்துக் கற்றுக் கொள்ள வேண்டும். வீரமணி மாதிரி ஜிங்ஜாங் போட என்னாலே முடியாது. 

இடஒதுக்கீட்டுக்காக குரல் கொடுக்கும் ஒரே கட்சி பா.ம.க.தான். கலைஞருக்கு கடிதம் எழுத மட்டும்தான் தெரியும். நதிநீர் பிரச்சனைகளில் மத்திய - மாநில அரசுகள் கூட்டாக தமிழகத்துக்கு துரோகம் செய்கின்றன. தமிழகத்தின் ஒரு உரிமையைக் கூட கலைஞரால் காப்பாற்ற முடியவில்லை. ஜாதிவாரி சென்ஸஸ் எடுக்கணும்னு கலைஞர் மத்திய அரசை வற்புறுத்தணும். ஒரு நீதிபதி கூட வன்னியர் இல்லை. வயிறு எரியுது. நீதிபதிகளை ஜாதி அடிப்படையில் நியமிக்க கலைஞர் மத்திய அரசை வலியுறுத்த வேண்டும். அவரால்தான் அது முடியும். மத்திய அரசு மறுத்தால், மத்திய அமைச்சரவையிலிருந்து தி.மு.க. வெளியே வர வேண்டும்.

கூட்டணிக்கு வந்த சோதனை! – சத்யா 

திருச்சியில் நடைபெற்ற காங்கிரஸ் கூட்டத்தில் தி.மு.க.வுக்கோ கருணாநிதிக்கோ முக்கியத்துவம் தராத வகையில் சோனியா பேசியது தற்செயலானதுதானா அல்லது திட்டமிட்ட ஒன்றா என்று புரியாமல் தி.மு.க. தரப்பு குழம்பிக் கொண்டிருக்கிறது. இதையடுத்து “அரசியலில் எதுவும் நடக்கலாம்” என்று பெரிய எழுத்துக்களில் அடிக்கோடிட்டு தி.மு.க. தலைவர் கருணாநிதி உடன்பிறப்புக்கு கடிதம் எழுதியிருக்கிறார். எதுவும் நடக்கலாம் என்று பொதுவாகச் சொன்னால் எப்படிப் புரியும்? ‘என்னவெல்லாம் நடக்கலாம்’ என்று தெரிந்து கொள்ள தி.மு.க. தலைவர்களின் ஆலோசனைக் கூட்டத்திற்கு வாசகர்களை அழைத்துச் செல்கிறோம். 

கருணாநிதி : நானும் நூறு தடவைக்கு மேலே சிந்திச்சுப் பார்த்துட்டேன். இந்தக் கூட்டணி நீடிக்கணும்னு சோனியா அம்மையார் உள்ளபடியே விரும்பறாங்களா, இல்லே வெளிநாட்டுப் புத்தியைக் காட்ட ஆரம்பிச்சுட்டாங்களான்னு கண்டுபிடிக்கவே முடியலை. உங்களுக்கு ஏதாவது புரியுதா? 

அன்பழகன் : கொஞ்சம் விஷமத்தனத்தைக் காட்டியிருக்கிற மாதிரிதாங்க தெரியுது. வழக்கமா, ‘மூத்த தலைவர் கலைஞரின் வழிகாட்டுதலின்படி அரசு நடக்குது’, ‘இந்தக் கூட்டணியின் வெற்றி தொடரணும்’னு பேசறவங்க, திடீர்னு மூளை மழுங்கின மாதிரி தன் சொந்தக் கட்சியைப் பத்தி மட்டும் பேசற அளவுக்கு ஆணவத்தைக் காட்டியிருக்காங்களே? 

கருணாநிதி : 2006 தேர்தல்லே ஜெயிச்சதுக்கு, அரசியல் நாகரிகப்படி எனக்கு நன்றி தெரிவிச்சிருக்கணும். குறைஞ்சபட்சம் கழகத்துக்காவது நன்றி தெரிவிச்சிருக்கலாம். ரெண்டையும் விட்டுட்டு மக்களுக்கு நன்றி தெரிவிக்கிறாங்களே. நன்றி கெட்டத்தனமா இல்லே இருக்குது? 

துரைமுருகன் : அப்படியென்ன திடீர்னு நம்ம மேலே அவங்களுக்கு கோபம்? இலங்கைத் தமிழர் பிரச்சனையிலே கூட மத்திய அரசுக்கு எதிரா நாம ஒரு வார்த்தை பேசலையே. மீனவர்கள் பலியாகும்போது கூட பொறுமையாத்தானே இருக்கோம்? மத்திய அரசு பண்ற அக்கிரமங்களுக்கு ஒரு மாநில அரசு இதுக்கு மேலே எப்படி ஒத்துழைப்பு தர முடியும்? 

அன்பழகன் : ‘காங்கிரஸ் புதிய சரித்திரத்தைத் துவங்கும்’னு வேறே பேசியிருக்காங்க. என்ன அர்த்தம்? ‘புதிய கூட்டணியைத் துவக்கும்’ன்ற மாதிரியில்லே இருக்குது? பதிலுக்கு, கழகம் பழைய சரித்திரத்தை ஆரம்பிச்சா இவங்களாலே தாங்க முடியுமா? 

ஸ்டாலின் : இன்னைக்கு நாலுமணி நேரம் மேடையிலே நின்னுகிட்டே 1250 பேருக்கு பணி நியமன ஆணை வழங்கப் போறேன். அப்படியே ‘மாநில சுயாட்சிதான் கழகத்தின் உயிர் மூச்சு’ன்னு பேசட்டுமா? 

கருணாநிதி : ஆட்சிக்கு நெருக்கடி ஏற்படும் அளவுக்கு ஒரு அவல நிலை ஏற்படாத வரை மாநில சுயாட்சி பற்றியும், சுயமரியாதை பற்றியும் அவசரப்பட்டுப் பேசறதை நான் அனுமதிக்க மாட்டேன். அண்ணா கற்றுக் கொடுத்த பொறுமையை நாம கடைப்பிடிக்கணும். 

ஆற்காடு வீராசாமி : ஆமாங்க. காங்கிரஸ் உறவு இல்லைன்னா, தேர்தல் கமிஷன் கொடுக்கிற சவால்களை நாம தனியாவே சந்திக்க வேண்டியிருக்கும். ஸி.பி.ஐ., மத்திய லஞ்ச ஒழிப்புத்துறை எல்லாம் நம்ம கூட்டணியை விட்டுப் போயிடும். வேறே வழியே இல்லைன்னாத்தான் சுயமரியாதையைப் பத்தி சிந்திக்கணும். 

துரைமுருகன் : காங்கிரஸ்காரங்க பங்கு கேட்டுத்தானே கழுத்தறுக்கிறாங்க? பேசாம கொடுத்துத் தொலைச்சுடுவோம். பாதி பங்கை வெச்சுக்கிட்டு, மீதி வாழ்க்கையை – வழக்கு கோர்ட்டுன்னு அலையாம – கழிச்சிடுவோம். காங்கிரஸ் வெளியே போயிடாம பாத்துக்குங்க தலைவரே! 

அன்பழகன் : போன தேர்தல்லே சொன்ன மாதிரி, ‘கூட்டணி ஆட்சிக்கும் தயார்’னு சும்மா சொல்லி வைப்போம். ஜெயிச்சா, ‘சோனியா கேட்டால் தருவோம்’னு சொல்லிடலாம். அவங்க கடைசி வரைக்கும் கேக்கவே மாட்டாங்க. 

ஆற்காடு வீராசாமி : மேடையிலே இளங்கோவன் சிரிச்சுக்கிட்டே இருந்தாரு. தங்கபாலு சோகமா இருந்தாரு. அதனாலே, காங்கிரஸ் போற போக்கு சந்தேகமாத்தான் இருக்குது. எதுக்கும் ‘இலங்கைத் தமிழர் பிரச்சனை பற்றி பேசப் போறேன்’னு சொல்லிட்டு ஒரு நடை டெல்லிக்குப் போய் கூட்டணி பத்தி பேசிட்டு வந்துடறது நல்லதுங்க. 

ஸ்டாலின் : அதே சமயத்திலே காங்கிரஸ் நமக்கு எதிர் நிலை எடுத்துட்டா எப்படி சமாளிக்கிறதுன்னும் யோசிச்சு வெச்சுக்குவோம். ஏதாவது கல்யாண வீட்டுலே, ‘ஹிந்தி எதிர்ப்புக்காக கழகத் தொண்டர்களை பலி கொடுத்த வரலாறு, கழக வரலாறு! அந்த வரலாறு திரும்ப வேண்டுமா?’ன்னு மணமக்களை எச்சரிச்சுட்டு வரேன். 

கருணாநிதி : காங்கிரஸ் நமக்கு எதிரா விஷம் கக்க ஆரம்பிச்சா எப்படி பதிலடி கொடுக்கணும்னு கழகத்துக்கா தெரியாது? ‘முகாம்களில் மூர்க்கத்தனமாக அடைக்கப்பட்டிருக்கிற மூன்று லட்சம் தமிழர்களைக் காப்பாற்றக் குரல் கொடுப்பது தவறா? இரக்கமில்லாமல் தமிழர்களைக் கொன்று குவித்த இலங்கை அதிபருக்கு இந்தியத் துணைக் கண்டம் சாமரம் வீசுவதைக் கூட கழகம் கண்டிக்கக் கூடாதா?’ன்னு பேச முடியாதா? ஆனா பேச மாட்டேன். கூட்டணிக்கு சான்ஸே இல்லைன்னாத்தான் அப்படிப் பேசணும். 

துரைமுருகன் : காங்கிரஸ் நம்ம அணியிலேதான் இருக்குதுன்னு உறுதியாத் தெரிஞ்சா தமிழ் உணர்வைக் கொஞ்சம் தளர்த்திக்கலாம். ‘முகாம்களில் முப்பதாயிரத்துக்கும் குறைவானவர்கள்தான் இருக்கிறார்கள். நாம் தொடர்ந்து வலியுறுத்தி வருவதன் விளைவாக மேலும் ஒரு தூதர் இலங்கை செல்லவிருப்பதாக சிதம்பரம் அவர்கள் என்னை சந்தித்துக் கூறினார்’னு மாத்திக்கலாம். 

ஆற்காடு வீராசாமி : கரெக்ட். கூட்டணி இருந்தா, பிரதமருக்கு மாசத்துக்கு ஒரு லெட்டர் எழுதி, அதை நிருபர்களுக்குக் காட்டினாக் கூடப் போதும். அனுப்பனும்ன்ற அவசியம் கூட இல்லை. 

அன்பழகன் : கூட்டணியிலே இருக்கும்போது ராமதாஸ் கழகத்தைக் குறைவாத்தான் திட்டறாரு. அதனாலே, காங்கிரஸ் நம்ம கூட்டணியை விட்டுப் போயிட்டா, பா.ம.க.வை நம்ம பக்கம் இழுத்துக்கணும். அதிக ஸீட்டுக்காகத்தான் காங்கிரஸ் இப்படி அடாவடி பண்ணுதுன்னா, ராமதாஸ் சந்திப்புக்கும் கூட்டணிக்கும் சம்பந்தமில்லை’ன்னு சொல்லிடலாம். பா.ம.க.வுக்குக் கொடுக்கிற ஸீட் மிச்சமாகும்.

கருணாநிதி : இருந்தாலும், காங்கிரஸ் மேலே எனக்கு கொஞ்சம் சந்தேகமாத்தான் இருக்குது. ‘கர்நாடகத்திலே ஜனநாயக முறையிலே தேர்ந்தெடுக்கப்பட்ட பா.ஜ.க. அரசை வீழ்த்திட காட்டுத்தனமாக முனைந்திட்ட காங்கிரஸ் கவர்னரின் போக்கு கவலை அளிக்கிறது’ன்னு கருத்து சொல்றது, பிற்காலத்திலே பா.ஜ.க.வோட சேர்றதுக்கு உதவியா இருக்கும். 

துரைமுருகன் : அம்மையார் கட்சியோட காங்கிரஸ் கூட்டு வெச்சுக்கிட்டா, கம்யூனிஸ்ட்களை நம்ம பக்கம் இழுத்துக்கலாம். ‘முதல்வர் பதவியை விட ‘கம்யூனிஸக் கொள்கைகள் கருணாநிதியின் ரத்தத்தில் கலந்திருக்கின்றன’ – என்று கல்யாணசுந்தரம் சொன்னதைத்தான் நான் பெரிதாக நினைக்கிறேன்’னு சொல்லி வையுங்க. கம்யூனிஸ்ட் காரங்க நிஜம்னு நம்பி ஏமாந்துடுவாங்க. 

கருணாநிதி : கூட்டணியிலே பிரச்சனை எதுவும் வராதுன்னு தெரிஞ்சா, ‘பா.ஜ.க.வின் ஆயாராம் காயாராம் அரசியலை ஜனநாயகத்தில் நம்பிக்கை உள்ள எவரும் ஏற்க மாட்டார்கள். தியாகத் திருவிளக்கு சோனியா உரிய நேரத்தில் தலையிட்டு, ஜனநாயகத்தைக் காப்பாற்றியதற்கு நன்றி’ன்னு அறிக்கை விட்டுடறேன். 

ஆற்காடு வீராசாமி : ‘தமிழகத்தின் எதிர்காலம் காங்கிரஸின் கையில்தான் இருக்கும்’னு சோனியா பேசி இளங்கோவன் கை தட்டறாருன்னா, ஏதோ உள்நோக்கம் இருக்கிற மாதிரிதானே தெரியுது? ‘காவிரி நீருக்காக இன்னும் எத்தனை நாளைக்குத்தான் பேசிக்கொண்டிருப்பது? இனியும் விவசாயிகள் பட்டினி கிடப்பதை வேடிக்கை பார்க்க என்னால் முடியாது’ன்னு எச்சரிக்கறது நல்லதுங்க

அன்பழகன் : விஜயகாந்தும் அம்மையாரும் போடற நிபந்தனைகளைக் கேட்டு பயந்து மறுபடியும் கழகத்தை நாடி சோனியா வந்துட்டா, ‘நதிநீர் பிரச்சனைகள் தீர பேச்சுவார்த்தைதான் ஒரே வழி. அம்மையாரைப் போல அண்டை மாநிலங்களைப் பகைத்துக் கொண்டு அரசியல் நடத்த எனக்குத் தெரியாது’ன்னு சொல்லிடுங்க. 

கருணாநிதி : சேது திட்டத்தையும், டி.ஆர். பாலுவையும் நினைச்சா எனக்கு கண்ணீரே வருது. ‘தமிழன் சோற்றாலடித்தப் பிண்டமாக இருப்பதால்தானே, தமிழகத்துக்கு நலன் தரக் கூடிய சேது திட்டத்தை மத்திய அரசு தடுத்து நிறுத்துகிறது’ன்னு கேட்க என் தமிழ் இதயம் துடிக்குது. கூட்டணி விஷயத்திலே சோனியா என்ன முடிவு எடுக்கப் போறாங்கன்னு தெரியலை. அதனாலே, ‘சேது திட்டத்தில் மத்திய அரசு விரைவில் ஒரு நல்ல முடிவு எடுக்கும் என்று நம்புகிறோம்’ன்னு சொல்ல வேண்டிய அவல நிலை. 

துரைமுருகன் : இந்த அளவுக்கு நாம தியாக உணர்வோட விட்டுக் கொடுத்தும் காங்கிரஸ் நம்ம உறவை முறிச்சுக்கிட்டா என்னங்க பண்றது? ஜெயிக்க என்னதான் வழி? 

கருணாநிதி : ஒரே வழிதான். ரேஷன் கார்டு உள்ள எல்லோருக்கும் இலவச உதவிப் பணம், பஞ்சப்படி, போனஸ்னு தேர்தல் அறிக்கையிலே சொல்லிடறேன். அப்படியும் தோல்வி அடைஞ்சா ‘நன்றிகெட்ட தமிழனுக்கு இதுவும் வேண்டும் இன்னமும் வேண்டும். எல்லாவற்றுக்கும் என் ஜாதகம்தான் காரணம்’னு விளக்கம் சொல்ல வேண்டியதுதான்.

 உருவாக மறுத்த உடன்பாடு – சத்யா 

தி.மு.க.வும் காங்கிரஸும் தொகுதிப் பங்கீடு தொடர்பாக நடத்திய பேச்சுவார்த்தையில் உறவை முறித்துக் கொள்கிற அளவுக்கு அப்படி என்னதான் சிக்கல் எழுந்திருக்கும் என்று – நமது அறிவுக்கு(!) எட்டிய வகையில் சிந்தித்துப் பார்க்கிறோம். 

குலாம் நபி ஆஸாத் : வணக்கங்க. நீங்க சொன்னதையெல்லாம் சோனியா கிட்டே சொன்னேன். ரொம்ப வருத்தப்பட்டாங்க. ஆட்சியிலே காங்கிரஸுக்கு பங்கு கொடுத்தா, குறைந்தபட்ச செயல் திட்டப்படி மூணு மாசத்துக்கு ஒருமுறை சோனியாவும் பிரதமரும், தமிழ்நாட்டுக்கு வந்து பாராட்டு விழாவிலே கலந்துக்குவாங்க. இல்லைன்னா பிரச்சனையை ராகுல்கிட்டே விட்டுடலாம்னு சொல்றாங்க. 

கருணாநிதி : பங்கா? எதுலே வேணும்னாலும் பங்கு கொடுக்க கழகம் தயாராயிருக்குது. ஆட்சியிலே மட்டும் பங்கு கேக்காதீங்க. அஞ்சு வருஷமா தமிழகக் காங்கிரஸுக்கு ஆட்சியிலே பங்கு கொடுக்காமலேயே, காங்கிரஸ் எம்.எல்.ஏ.க்கள் எல்லாம், கழக எம்.எல்.ஏ.க்களுக்கு சமமா ஓஹோன்னு இல்லையா? அவங்களுக்கு கழகம் எதுலேயாவது குறை வெச்சுதுன்னு சொல்ல முடியுமா? அந்த நல்லாட்சி தொடர வேண்டாம்னு முடிவு பண்ணிட்டீங்களா? 

குலாம் நபி : வந்து... மத்தியிலே உங்களுக்கு பங்கு இருக்குது... அதே மாதிரி மாநிலத்திலே எங்களுக்கும்... 

கருணாநிதி : உங்களுக்கு எங்களுக்குன்னு தயவு செஞ்சு பிரிச்சுப் பேசாதீங்க. மொத்த பங்கையும் பொதுவிலே வெச்சுட்டு, அவங்கவங்க பங்கை அவங்கவங்க உரிமையா எடுத்துக்கலாம். 

குலாம் நபி : புரியலை... ஸ்பெக்ட்ரம் பத்திப் பேசறீங்களா? 

கருணாநிதி : இல்லைங்க. 234 தொகுதியிலே, கூட்டணிக் கட்சிகளுக்கு ஒதுக்கினது போக, பாக்கியிருக்கறதிலேர்ந்து, கழகம் உங்களுக்கு ஒதுக்கற பங்கை நீங்க உரிமையோட எடுத்துக்கலாம். கடைசியா மீதியிருக்கிறதை மட்டும்தான் கழகம் எடுத்துக்கும். 

குலாம் நபி : காங்கிரஸ் முன்னே மாதிரி இல்லைங்க. ராகுல் தலையிட்ட பிறகு எக்கச்சக்கமா வளர்ந்திருக்குது. பழைய கோஷ்டிகளோட இப்ப இளைஞர் காங்கிரஸ், மாணவர் காங்கிரஸ் கோஷ்டிகளும் சேர்ந்திருக்குது. அதனாலே 70 இடமாவது வேணும். 

கருணாநிதி : கழகமும் வரலாறு காணாத வகையிலே வளர்ந்திருக்குதே. அழகிரி, ஸ்டாலின், கனிமொழி அணிகளுக்கு ஒதுக்கறது போக, கழக அமைச்சர்களுக்கும், அவங்க வாரிசுகளுக்கும் ஒதுக்க ஒரு முப்பது தொகுதியாவது வேண்டாமா? 53 தரோம். 

குலாம் நபி : எங்க பலத்தைக் குறைச்சு மதிப்பிடறீங்களே. உங்களுக்கு தெரியாததா? 250 கோடி ரூபாய் செலவு பண்ணியும் 64 கோடி ரூபாய் போஃபர்ஸ் ஊழல் குற்றவாளி கடைசி வரைக்கும் சிக்கலை. ஒழிஞ்சு போகட்டும்னு நீதி மன்றமே க்வாட்ரோக்கியை விடுவிச்சுடலையா? அதே தத்துவப்படி, 2.76 லட்சம் கோடி செலவு பண்ண பிறகு, ராசா நிரபராதியா வெளியே வரத்தான் போறார். அதனாலே, 69-க்குக் கையெழுத்துப் போட்டுடலாம். 

கருணாநிதி : கழக பலத்தையும் நீங்க சாதாரணமா நினைக்கறீங்க. தமிழ்நாட்டிலே ஆறு கோடி மக்களும் இலவசத்தாலே பயனடைற வகையிலே கடுமையா உழைச்சுக் காட்டியிருக்கோம். கொசுறா, அழகிரியும் வாக்காளர் மத்தியிலே வலம் வரப் போறார். அழகிரி செய்யறதை காங்கிரஸாலே செய்ய முடியுமா? 54 வாங்கிக்குங்க. 

குலாம் நபி : ஸ்பெக்ட்ரம் பிரச்சனையை காலாகாலத்திலே முடிக்கணும்ன்ற எண்ணமே இல்லாம பேசறது நியாயமா? தயாநிதி மாறன் மேலே அருண் ஷோரி சொல்லியிருக்கிற குற்றச்சாட்டுகள் தொடர்பா ஸி.பி.ஐ. விசாரிக்கிறதுக்குள்ளே நாம ஒரு நல்ல முடிவு எடுக்க வேண்டாமா? ஏற்கெனவே உங்களுக்கு இருக்கிற பிரச்சனைகள் போதாதா? 68-க்குக் குறைக்காதீங்க. 

கருணாநிதி : மத்திய அரசின் வலிமை எனக்குத் தெரியாதா? முதல்வர் பதவியை விட, தமிழ் செம்மொழியாக அறிவிக்கப்பட நான்தான் காரணம்னு சோனியா எழுதிய கடிதத்தைத்தான் நான் பெரிசா மதிக்கிறேன். அதை விடுங்க. கடிதம்னதும் ஞாபகத்துக்கு வருது. உருப்படியா எதுவும் நடக்காதுன்னு தெரிஞ்சே, காவிரி, முல்லைப் பெரியாறு, மீனவர் பிரச்சனை, இலங்கைத் தமிழர் பிரச்சனைகளுக்காக எத்தனை லெட்டர் எழுதியிருக்கேன். அதுக்கு நன்றி காட்டற வகையிலே நீங்க 55-க்கு சம்மதிக்கணும்னு நான் எதிர்பார்க்கிறது தவறா? 

குலாம் நபி : காங்கிரஸும் உங்க ஆட்சிக்கு உறுதுணையா இருந்திருக்குதே! அரிசி கடத்தல், மணல் கடத்தல், தினகரன் எரிப்பு, மின்வெட்டு, ஹைகோர்ட்டில் வக்கீல் – போலீஸ் மோதல்.... எதைப் பத்தியாவது காங்கிரஸ் வாயைத் திறந்திருக்குமா? இந்த மக்கள் பணியைத் தொடரத்தான் 67 கேக்கறோம்.

கருணாநிதி : பொறுப்பில்லாம அள்ளிக் கொடுக்க இது என்ன அரசு நிதியா? கழக ஆட்சிக்கு எதிரா இளங்கோவன் எவ்வளவோ பேசினார். சோனியா என்னை எட்டுமணி நேரம் காக்க வெச்சாங்க. ராகுல் இங்கே வந்தபோதெல்லாம் என்னைப் பார்க்காமயே போனார். அவ்வளவு ஏன்? ராசா பதவி பறிப்பு, ஸி.பி.ஐ. ரெய்டு, கைதுன்னு எவ்வளவு நடந்தது? கழகம் எப்பவாவது ரோஷத்தைக் காட்டிச்சா? சுயமரியாதையை விட கூட்டணிதான் முக்கியம்னு சும்மா இருந்ததுக்குப் பரிசா, 56-க்கு சம்மதிக்கக் கூடாதா? 

குலாம் நபி : நீங்க சோனியா உணர்வுகளைப் புரிஞ்சுக்காம பேசறதை நினைச்சா வருத்தமா இருக்குது. நிரா ராடியா பேச்சுலே வெளியான தகவல்களை பி.ஏ.ஸி.யோ, ஜே.பி.ஸி.யோ குடையக் கூடாதேன்ற அக்கறையிலே நான் பேசிகிட்டிருக்கேன். காங்கிரஸ் தனியாத்தான் நிக்கணும்னு பிடிவாதம் பிடிக்கிற ராகுலை வேறே சம்மதிக்க வைக்கணும். இந்தக் கஷ்டத்துக்கு 66-ஆவது கொடுக்கணும். 

கருணாநிதி : ராசா பொங்கியெழுந்து சீற ஆரம்பிச்சா, மத்தியில் உள்ளவர்களுக்கு எவ்வளவு சிக்கல் ஏற்படும்ன்றதையும் நாம சிந்திக்கத் தவறிடக் கூடாது. நான் மானமிகு சுயமரியாதைக்காரன். தொடர்ந்து அவமானப்படுத்திகிட்டேயிருந்தா ஒரு கட்டத்திலே என்னையும் மீறி பதிலடி கொடுத்துடுவேன். அந்த நிலை வராம இருக்கணும்னா 57-க்கு மேலே ஆசைப்படாதீங்க. 

குலாம் நபி : காங்கிரஸோட நல்ல மனசை நீங்க புரிஞ்சுக்கணும். ரெண்டு வருஷம் டைம் கொடுத்த பிறகுதான் ராசா வீட்டிலே ரெய்டு நடந்தது. ‘சோதனை பண்ண வரலாம்’னு கலைஞர் டி.வி. அறிவிச்ச பிறகுதான், கலைஞர் டி.வி. ஆஃபீஸ்லே ரெய்டு நடந்தது. காமன்வெல்த் போட்டி ஃபைல், ஆதர்ஷ் ஃபைல் காணாமல் போன மாதிரியே 2-ஜி ஃபைல்களும் காணாமப் போயிருக்குது. இந்த நல்ல எண்ணங்களுக்கு பதில் மரியாதையா 65-க்கு முடிச்சுக்கலாமே. 

கருணாநிதி : அழகிரியும் தயாநிதியும் ஒற்றுமையான அடுத்த நிமிஷமே முடிஞ்சிருக்க வேண்டிய ஸ்பெக்ட்ரம் பிரச்சனையை, இவ்வளவு தூரம் வளர்த்து விட்டது யாருடைய விஷமத்தனம்ன்ற பிரச்சனைக்குள்ளே புக நான் விரும்பலை. தமிழக உரிமை சம்பந்தப்பட்ட விஷயம்னா நீங்க கேக்கறதுக்கு முன்னாலேயே விட்டு கொடுப்பவனே நான்தான். இது கழக உரிமை சம்பந்தப்பட்ட விஷயமாச்சே! மத்தியிலே காங்கிரஸை ஆட்சியிலே அமர்த்தினவன்ற உரிமையிலே சொல்றேன். 58-க்கு மேலே கேக்காதீங்க. 

குலாம் நபி : (செல்ஃபோனில் பேசிவிட்டு) ஒண்ணுமில்லை. ஸி.பி.ஐ. தமிழ்நாட்டிலே இன்னும் சில பேரை விசாரிக்கப் போகுதாம். அதிருக்கட்டும். நீங்க சொல்லுங்க. ஊழல் குற்றச்சாட்டுகள் இருந்தும் ரெண்டாவது முறையும் ராசாவுக்கு அதே இலாகாவைக் கொடுத்ததை நினைச்சுப் பாருங்க. இப்படி ஒரு நேர்மையான பிரதமரை நாட்டுக்கு வழங்கிய காங்கிரஸுக்கு 64 இடம் பெறக் கூட தகுதியில்லையா? 

கருணாநிதி : பதிலுக்கு பதில் லாவணி பாட நான் தயாரா இல்லை. ‘2-ஜி குற்றவாளிகள் தப்ப முடியாது; எல்லா விசாரணை அமைப்புகளுக்கும் மத்திய அரசு ஒத்துழைப்பு கொடுக்கும்’னு பிரதமர் கருத்து சொன்னப்பவே, அவர் முகத்திரை கிழிஞ்சுட்டதாக கழக செயற்குழுவிலே சிலர் வாதாடியபோது கூட, நான் அதை ஏற்கலை. மத்திய அரசுக்கான ஆதரவை வாபஸ் வாங்குகிற நிலை கழகத்துக்கு ஏற்பட்டுவிடக் கூடாதேன்றதுதான் என் கவலை. அதனாலே 59-க்கு முடிவு செய்யலாம்.

குலாம் நபி : தி.மு.க. வாபஸ் வாங்கினாலும் முலாயம் சிங் யாதவ் ஆதரிக்கத் தயாரா இருக்காருங்க. மத்திய அரசுக்கு எந்த ஆபத்தும் வராதுன்றதாலேதான் இவ்வளவு தூரம் வாதாடிகிட்டிருக்கேன். காங்கிரஸ் ஆதரவில்லாம நீங்க தேர்தலைச் சந்திக்கிறதன் விளைவா, ஜெயலலிதா ஆட்சிக்கு வந்துட்டா என்னவெல்லாம் நடக்கும்னு யோசிச்சுப் பாருங்க. எத்தனை அமைச்சர்கள் கோர்ட்டு, வழக்குன்னு கஷ்டப்படணும்! இதெல்லாம் தேவையா? 63 கூட இல்லைன்னா எப்படி? 

கருணாநிதி : காங்கிரஸ் உறவு இல்லாமலேயே தேர்தலைச் சந்திக்கலாம்னு திருமாவளவன், ராமதாஸ், வீரமணி வற்புறுத்துவது பற்றி கழக உயர்மட்டக் குழு விவாதித்த பிறகுதான் என் முடிவை அறிவிக்க முடியும். ஒரு தலித் இளைஞனை சிறையில் தள்ளி சித்ரவதை செய்வதை, அந்தச் சமுதாயம் எந்த அளவுக்கு ஏற்கும் என்பதையும் பார்க்க வேண்டியிருக்குது. 60-க்கு சம்மதிச்சா, ‘இதெல்லாம் வழக்கமான நடைமுறைகள்தான்’னு சொல்ல வசதியா இருக்கும். 

(செல்ஃபோன் ஒலிக்கிறது) 

குலாம் நபி : ஒரு நிமிஷம். சோனியா கூப்பிடறாங்க. 

கருணாநிதி : யாரு நம்ம சொக்கத் தங்கமா? என்ன சொல்றாங்க? 

குலாம் நபி : நீங்க 63 தர மறுத்தா, 63 - லேயே நிக்கச் சொல்றாங்க. 63 தர சம்மதிச்சா, 65 கேக்கச் சொல்றாங்க!!!

“நல்லவேளை. பா.ம.க.வோடயும் நட்பாத்தானே இருக்கீங்க?”

“மருத்துவர் மேலே கடந்த ஒரு மாசமா எனக்கு ரொம்ப மரியாதைங்க. அதனாலதான், ‘தேர்தலுக்கு தேர்தல் அணி மாறும் ராமதாஸை விரட்டி அடிப்பீர்’னு அடிச்சு தயாரா வெச்சிருந்த லட்சக்கணக்கான போஸ்டர்களை, அவர் நம்ம ஸைட் வந்ததும் மறைச்சு வெச்சுட்டேன். அடுத்த தேர்தலுக்குத்தான் அதைப் பயன்படுத்திக்கணும்.” 

“நம்ம கட்சிக் கொள்கைகளிலே உங்களுக்குப் பிடிச்ச கொள்கை எது?”

“இலங்கைப் பிரச்சனை சம்பந்தப்பட்ட கொள்கைதாங்க. போர் முடியப்போற நேரத்திலே போர் நிறுத்தத்தை வலியுறுத்தி, சில மணி நேரம் உண்ணாவிரதம் இருந்தே, சிங்கள வெறியர்களை அடக்கிக் காட்டிய கலைஞருக்கு ஆயிரக்கணக்கான இலங்கைத் தமிழர்களின் ஆன்மாக்கள் நன்றி தெரிவிக்குமே!” 

“2-ஜி ஸ்பெக்ட்ரம் பற்றி எதிர்க் கட்சிகள் பண்ற பிரச்சாரத்துக்கு எப்படி பதிலடி கொடுப்பீங்க?”

“ஊழல் நடக்கவே இல்லைன்னு கபில்சிபல் சொன்னதை மக்களுக்கு விளக்குவேன். ‘பூணூல் போட்ட பத்திரிகைகள்தான் ஸ்பெக்ட்ரம் பிரச்சனையைப் பெரிதுபடுத்துகின்றன’ன்னு பேசுவேன். எடியூரப்பா ஊழலை மறைக்கத்தான் பா.ஜ.க. ஸ்பெக்ட்ரம் பிரச்சனையை அரசியலாக்குகிறதுன்னு சொல்லுவேன். எதையாவது ஒண்ணை மக்கள் நம்பிட சான்ஸ் இருக்குது.” 

“இருந்தாலும், 2-ஜி ஸ்பெக்ட்ரம் தொடர்பான சுப்ரீம் கோர்ட் கண்டனங்களுக்கு எப்படி விளக்கம் கொடுப்பீங்க?”

“விளக்கம் தேவையில்லைங்க. கோர்ட் கண்டனம் எல்லாம் இப்ப மக்களுக்கு பழகிடுச்சு. இருந்தாலும், அம்மையாரை சுப்ரீம் கோர்ட் எதுக்கெல்லாம் கண்டிச்சிருக்குதுன்னு மக்களுக்கு ஞாபகப்படுத்தி, நீதியை நிலை நாட்டிட முடியும்ங்க.” 

“ஸ்பெக்ட்ரம் குற்றச்சாட்டை மக்கள் நம்பறாங்கன்னு நினைக்கிறீங்களா?”

“ஆமாங்க. ஆயிரம், ரெண்டாயிரம் வாங்கினவங்க இப்ப விஷமத்தனமா அஞ்சாயிரம், பத்தாயிரம்னு எதிர்பார்க்கிறாங்களே. மக்கள் கேக்கற பணத்தைக் கொடுத்துட்டுத்தான் ஸ்பெக்ட்ரம்லே நாம நிரபராதிகள்னு நிரூபிக்கணும். அதுக்கப்புறம் எதிர்க் கட்சிகள் பிரசாரம் எடுபடாது. ஏன்னா, நம்மைவிட அதிகமா கொடுக்க அவங்களாலே முடியாது.” 

“இந்த ஆட்சி ஏன் தொடரணும்னு, உங்க வாதத்தை முன் வையுங்க பாக்கலாம்.”

“கழக ஆட்சி தொடர்ந்தாத்தான் ஸி.பி.ஐ. தீவிரத்தைக் குறைக்க முடியும். அப்புறம், படிப்படியா ஸ்பெக்ட்ரம் பிரச்சனை போஃபர்ஸ் பிரச்சனை மாதிரி ஆயிடும். ராசாவை ஹிம்ஸிக்கிறதுக்கும் ஒரு அளவு இருக்குதுன்னு பிரதமரே சொல்லிடுவாரு. பாராட்டு விழாக்களிலே கலந்துகிட்டு, கலைஞரைப் பாராட்டி கவிஞர்கள் தமிழ் வளர்க்க முடியும். கலைஞர் இன்னும் நிறைய சினிமாக்களுக்கு வசனம் எழுதுவார். இப்படி தமிழகத்துக்கு பல நன்மைகள் கிடைக்கும்.” 

“சட்டசபையிலே எப்படி பணியாற்றணும்னு தெரியுமா?”

“அது தெரியாதுங்களா? நம்ம கட்சிக்காரங்க பேசும்போது பெஞ்சைத் தட்டணும். எதிர்க் கட்சிக்காரங்க பேசும்போது, அவங்களை மட்டம் தட்டி, பேச விடாம தடுக்கணும். நாம எதிர்க் கட்சி ஆயிட்டா, ‘ஜனநாயகம் செத்துவிட்டது’ன்னு சொல்லி, அடிக்கடி வெளிநடப்பு செய்யணும். நாம மறுபடியும் ஆளும் கட்சியாவே தொடர்ந்தா, ‘ஜனநாயகக் கடமையைக் கூட ஆற்றாமல் வெளிநடப்பு செய்கிறார்களே. அரசியல் இப்படி ஆகிவிட்டதே’ன்னு கருத்து சொல்லணும்.” 

“ஸி.பி.ஐ. ரெய்டு, விசாரணைகள் பத்தி உங்க கருத்து என்ன?”

“தலைவரோட குடும்பப் பிரச்சனையிலே நான் கருத்து சொல்றது முறை இல்லைங்க. பெரிய பெரிய மந்திரிகளே வாயை மூடிக்கிட்டிருக்கும்போது, நான் வாயைத் திறக்கலாமா?” 

“ஜெயிச்சா, தொகுதிக்கு என்ன செய்வீங்க?”

“மக்களுக்கு நன்றி காட்டற வகையிலே, தொகுதிப் பக்கமே போகாம ஒதுங்கிடுவேன். எம்.எல்.ஏ. ஆயிட்டா, கான்ட்ராக்ட், கமிஷன், ரியல் எஸ்டேட் பிஸினஸ்னு ஆயிரம் வேலை இருக்கும்போது, தொகுதிக்குப் போக நேரம் எங்கே இருக்கப் போகுது?”

சென்ற ஆண்டின் சிறந்த படங்கள் – சத்யா 

அரசியல் விமர்சனங்களை விரும்பும் வாசகர்களையும், சினிமா விமர்சனங்களை விரும்பும் வாசகர்களையும் ஒரே சமயத்தில் திருப்திப்படுத்தும் வகையில், 2010 -ல் வெளியான சிறந்த அரசியல் சினிமாக்களை வரிசைப்படுத்தியிருக்கிறோம். 

10. பையா

புதுமுகம் ஜெகன் மோகன் நடித்த படம் பையா. யாருக்கும் அடங்காத பையனாக நடித்திருந்தார், ராஜசேகர ரெட்டியின் பையன் ஜெகன்மோகன். தகுதிக்கு மீறி ஆசைப்பட்டால் என்னவாகும் என்ற கருத்தை வெளிப்படுத்தியது இப்படம். எதிர்பார்த்த அளவுக்கு படம் ஓடாவிட்டாலும், தனக்கென்று ஒரு ரசிகர் பட்டாளத்தை இப்படத்தின் மூலம் ஜெகன் மோகன் உருவாக்கி இருப்பதை மறுக்க முடியாது. 

‘பையா, நான் சொல்வதைக் கேள்’ என்று அன்னை சோனியா எவ்வளவோ கெஞ்சியும், அடங்க மறுத்து ஜெகன் மோகன் அடிக்கும் லூட்டிகள் ரசிக்கும்படியாக இல்லாதது ஒரு குறை. ரோசையாவை ஜெகன் மோகன் பயமுறுத்தும் காட்சிகள் ரசிக்கும்படி இருந்தன. ‘ஐயோ என்னை விட்டு விடுங்கள்’ என்று கதறியபடியே நாற்காலியை தள்ளிவிட்டு ரோசையா ஓடும் காட்சி, நல்ல திருப்பம். ‘பையா’ பத்தாவது இடத்தைப் பிடிக்கிறது. 

9. வம்சம்

பெரிய வம்சத்தில் பிறந்த கோடீஸ்வரன், கதாநாயகன் ராகுல். நாட்டில் எங்கு பார்த்தாலும் குடிசைகளும் ஏழைகளும் இருப்பது அவரை வாட்டுகிறது. தனது கொள்ளு தாத்தா, பாட்டி, அப்பா வழியில் தானும் வறுமையை ஒழிக்கப் போவதாக வம்சாவழி சபதம் போடுகிறார். ‘ஐயோ பாவம்’ என்று பரிதாபம் ஏற்படுகிறது நமக்கு. நாட்டிலுள்ள அனைத்து குடிசைகளிலும் நுழைந்து, சாப்பிட்டு சாப்பிட்டே ஏழ்மையை ஒழிக்க பாடுபடுகிறார். அவரது லட்சியம் நிறைவேறியதா என்பதை வம்சம் விளக்கியிருந்தது. 

இளைஞர்களைக் கவரும் வகையில் திரைக்கதை அமைத்திருப்பதற்கு ஒரு சபாஷ் போடலாம். ஆர்.எஸ்.எஸ். பற்றி ராகுல் பேசும் வசனங்கள் சென்ஸாருக்குத் தப்பி வந்திருப்பது குறிப்பிடத்தக்கது. 

‘35 லட்சம் ஆதரவாளர்களைத் திரட்டிக் காட்டுகிறேன்’ என்று ராகுலிடம் உறுதியளிக்கும் தங்கபாலு, அதற்கு பதில் 35 லட்சம் பேப்பர்களை அவர் முன் கொட்டும் காட்சி செம காமெடி. மீண்டும் மீண்டும் ஊர் பெரியவர் கருணாநிதியை அலட்சியப்படுத்தும் காட்சிகளில், ராகுல் வித்தியாசமான முத்திரையைப் பதித்திருந்தார். வரவேற்கத்தகுந்த முயற்சி என்பதால் ஒன்பதாவது இடத்தை பிடிக்கிறது ‘வம்சம்’

8. இரும்புக் கோட்டை முரட்டு சிங்கம்

யாருக்கும் அடங்காத முரட்டுச் சிங்கமாக, வித்தியாசமான முறையில் வெளுத்துக் கட்டியிருந்தார் இளங்கோவன். ஆரம்பக் காட்சியில் வில்லன் கருணாநிதியிடம் மோதி விட்டு, மன்னிப்புக் கேட்கும்போது, அவரது பழைய படம் பார்த்தது போல் சப்பென்று ஆகிவிடுகிறது. ஆனால், இடைவேளைக்குப் பிறகு தனது பாணியை மாற்றிக் கொண்டு, கருணாநிதியைப் பார்த்து கர்ஜிக்கும் ஒவ்வொரு காட்சியிலும் புதுவிதமான முத்திரையைப் பதித்து, ரசிகர்களின் விசிலையும் கைதட்டலையும் பெற அவர் தவறவில்லை. 

யாராவது அவரை அடக்கக் கூடாதா என்று டெல்லியிலிருந்து வருவோர் போவோரிடமெல்லாம் கருணாநிதி கெஞ்சுவது புன்னகையை வரவழைத்தது. கருணாநிதிக்கும் இளங்கோவனுக்கும் இடையில் மாட்டிக் கொண்டு தங்கபாலு தவிக்கும் இடங்கள் படு தமாஷாகப் படமாக்கப்பட்டிருந்தன. 

டைட்டிலில் கூட இடம் பெறாத வாசனின் பின்னணி இசை, ஆர்ப்பாட்டமின்றி இருந்தது. இளங்கோவன் மீது கருணாநிதியின் ஆட்கள் டெல்லியில் புகார் செய்யும் காட்சியில் சோனியா எந்த உணர்ச்சியையும் காட்டாமல் அழுத்தமான நடிப்பை வெளிப்படுத்தியிருந்தார். எனவே, இப்படத்தை எட்டாவது இடத்துக்கு தேர்வு செய்கிறோம். 

7. போர்க்களம்

எடியூரப்பா, குமாரசாமி, கவர்னர் ஆகிய மூவரும் எந்த இடத்தில் சந்தித்தாலும் அந்த இடமே போர்க்களமாகி விடுகிறது. மற்றபடி படத்தில் கதை என்று உருப்படியாக எதுவுமில்லாததால், யார் ஜெயிக்கிறார்கள் என்பதுதான் கதை என்ற முடிவுக்கு நாம் வருகிறோம். 

‘என் ஆசை எதிராளியே’ என்று எடியூரப்பாவும் கவர்னரும் பாடும் திடீர் டூயட், கதையின் போக்கில் எதிர்பாராத திருப்பத்தை ஏற்படுத்துகிறது. எடியூரப்பாவை ஒழிப்பதற்காக ஆவேசத்துடன் வரும் கட்காரி, திடீரென்று அந்தத் திருமணக் காட்சியில் மனம் மாறி, அவரை கட்டிப் பிடித்து கொள்வது மற்றொரு மர்மமான திருப்பம். 

குமாரசாமியும் எடியூரப்பாவும் நேருக்கு நேர் சந்திக்கும் காட்சிகள் நெஞ்சை உறைய வைக்கும் வகையில் படமாக்கப்பட்டிருந்தன. அதிலும் மூத்த வில்லன் நடிகர் தேவகௌடா, பற்களை நறநறத்தபடி ‘சாம தான பேத தண்டம் நான்கும் தோற்றுப் போகும்போது தகிடுதத்தம்’ என்று பாடுவது படு பயங்கரம். 

குமாரசாமி, தன் ஆட்களை பஸ்ஸில் ஏற்றிக் கொண்டு சூட்கேஸ்களுடன் உல்லாசப் பயணம் செய்யும் அவுட்டோர் காட்சி பிரம்மாண்டமான செலவில் படமாக்கப்பட்டிருந்தது. சிறந்த திகில் படத்தைப் பார்த்த திருப்தியை ஏற்படுத்தியதால், போர்க்களம் ஏழாவது இடத்தைப் பெறுகிறது.

6. மாத்தியோசி

ராமதாஸும் அன்புமணியும் காமடி ரோலில் கலக்கியிருந்த படம் ‘மாத்தி யோசி’. எந்த முடிவை எடுத்தாலும், உடனே மாற்றி யோசித்து, அதற்கு எதிரான முடிவை எடுக்கும் வழக்கமான குணச்சித்திர ரோலை ஏற்றிருந்தார் ராமதாஸ். கண்கள் சிவக்க, தொண்டை நரம்புகள் புடைக்க, ‘நான் ஒரு முடிவெடுத்தா, உடனே அதை மாத்திடுவேன்’ என்று ராமதாஸ் ‘பஞ்ச் டயலாக்’ பேசி எச்சரிக்கும்போது அரங்கமே அதிர்கிறது. 

கோபாலபுரத்துக்கும் போயஸ் கார்டனுக்கும் இடையே, ராமதாஸும் அன்புமணியும் நடக்கும் போது நிகழும் சம்பவங்கள்தான் கதை. ராமதாஸ், கனிவான பார்வையோடு கருணாநிதியை நெருங்கும்போதெல்லாம், ‘என் உச்சி மண்டையிலே விர்ருங்குது. கிட்டே நீ வந்தாலே கிர்ருங்குது’ என்று பாடியபடி கருணாநிதி பதறிக் கொண்டு ஓடுவது செம சிரிப்பு. 

க்ளைமாக்ஸில் ராமதாஸும் அன்புமணியும் நடுத்தெருவில் அமர்ந்து கொண்டு எந்தப் பக்கம் போவது என்று யோசிக்கும்போது, ‘கோடானு கோடி வன்னியர்களுக்கு வழி காட்டும் இவர்களுக்கு வழி காட்ட யாரும் இல்லை’ என்று ஸ்லைடு போடுகிறார்கள். காமடியையும் உருக்கத்தையும் சம அளவில் கலந்து தந்ததால், ‘மாத்தி யோசி’ ஆறாம் இடத்துக்குத் தேர்வாகிறது. 

5. ரத்த சரித்தரம்

தீவிரவாதக் கூட்டத்தை கைது செய்வதற்காக நியமிக்கப்பட்ட காவல்துறை உயர் அதிகாரி மன்மோகன் சிங், தீவிரவாதிகளைக் கண்டு கனவிலும் நனவிலும் எப்படி பயப்படுகிறார் என்பதை, ரத்த சரித்திரத்தில் தனக்கே உரிய பாணியில் இயக்கியிருந்தார் சோனியா. 

தீவிரவாதச் சம்பவம் நடக்கும் ஒவ்வொரு காட்சியிலும், ‘இதை சகித்துக் கொள்ள மாட்டேன். பயப்பட மாட்டேன். ஆனா, அவங்க நம்ம ஆளுங்க. பேசத் தயாராக இருக்கிறேன். அச்சமளிக்கிறது’ என்று நடுங்கும் குரலில் மன்மோகன் சிங் தீவிரவாதிகளை எச்சரிக்கும் காட்சி அடிக்கடி வருவதால், ரசிகர்கள் கொட்டாவி விடுகின்றனர்.

‘உசுரே போகுது, உசுரே போகுது’ என்று விரக்தியோடு பாடும்போது, சோக ரசத்தைப் பிழிந்து தருகிறார் ஹீரோ மன்மோகன் சிங். பிடிபட்ட தீவிரவாதி கசாபுக்கு போலீஸார் சேவை செய்யும் காட்சியிலேயே, கதையின் போக்கு இப்படித்தான் இருக்கும் என்பதை ரசிகர்கள் புரிந்து கொண்டு விடுகிறார்கள். முதல் காட்சியில் அஃப்ஸல் குருவின் கருணை மனுவை பரிசீலிக்கத் தொடங்கும் பிரதிபா பாட்டீல், கடைசிக் காட்சி வரை பரிசீலித்துக் கொண்டே இருப்பது, சோனியாவின் குறும்பான டைரக்ஷன். வன்முறைக் காட்சிகள் நிறைந்த ரத்த சரித்திரம் ஐந்தாவது இடத்தைப் பெறுகிறது. 

4. களவாணி

சென்ற ஆண்டு பரபரப்பாக பேசப்பட்ட படம் காங்கிரஸ் ப்ரொடக்ஷன்ஸாரின் களவாணி. தனது நிறுவனத்தில் தன்னைச் சுற்றி தனக்கே தெரியாத களவாணிகள் எத்தனை பேர் இருக்கிறார்கள் என்பதைக் கண்டுபிடிக்கும் வேலையை, தன் பொறுப்பில் உள்ள உளவுப்படையிடம் ஒப்படைக்கிறார் சோனியா. உளவுப் படை அதை எப்படி நிறைவேற்றுகிறது என்பதுதான் கதை. 

சோனியாவின் உதவியாளராக, கொடுத்த வேலையை ஒழுங்காகச் செய்திருந்தார் மன்மோகன் சிங். ‘க்வாட்ரோக்கியை இன்னும் எத்தனை நாள் தேடுவீர்கள்? அவரை சித்ரவதை செய்வதற்கு அளவே இல்லையா?’ என்ற சத்தியாவேசக் குரலில் வெடிக்கும்போது, மாறுபட்ட குணச்சித்திரத்தைக் காட்டியிருந்தார். ஊழலைக் கண்டுபிடித்துத் தடுக்கும் பொறுப்பில் ஊழல் அனுபவம் மிகுந்த தாமஸை அமர்த்தும் காட்சியில் சோனியாவின் குறும்புத்தனமான டைரக்ஷன் டச் பளிச்சிட்டது. ‘ஊழலை சகித்துக் கொள்ள மாட்டேன்’ என்று சோனியா பொங்கி எழும்போது, தியேட்டரில் குபீர் சிரிப்பு எழுகிறது. 

ஊழல் ஃபைல்கள் ஒன்றன் பின் ஒன்றாகக் காணாமல் போகும்போதே, கதையின் முடிவு புரிந்து விடுகிறது. களவாணி ராசாவா, கல்மாடியா, அசோக் சவானா என்ற சஸ்பென்ஸில் ரசிகர்கள் காத்திருக்க, அவர்களை மிஞ்சும் வகையில் செயல்பட்டு வெற்றிக் கொடியை நாட்டுகிறது சோனியாவின் உளவுப் படை. சிறந்த மர்மப் படமான களவாணி – நான்காம் இடத்தைப் பெறுகிறது. 

3. குரு சிஷ்யன்

குருவாக மன்மோகன் சிங்கும், சிஷ்யனாக ராசாவும் இணைந்து நடித்த வெற்றிப் படம் குரு சிஷ்யன். ஸ்பெக்ட்ரம் கம்பெனிக்கு மேனேஜராக ராசாவையும், சூபர்வைசராக மன்மோகன் சிங்கையும் நியமிக்கிறார் கம்பெனியின் எம்.டி. சோனியா. கம்பெனியின் பணத்தை ராசா எப்படி அசுர வேகத்தில் கபளீகரம் செய்கிறார், குற்றவாளிகள் கூட்டம் எப்படி தப்பிக்கிறது என்பதுதான் கதை. சிறந்த முறையில் ஸ்க்ரீன் ப்ளே அமைத்திருந்தார் டைரக்டர் சோனியா.

குருவுக்குத் தெரிந்து பாதியும், தெரியாமல் பாதியும் செய்து விட்டு, மொத்தப் பழியையுமே குருவின் மீது போடும் சிஷ்யனாக, கொடுக்கப் பட்ட வேலையைத் திறம்பட செய்திருந்தார் ராசா.மலையளவு ரூபாய் நோட்டுகளுக்கு நடுவே ராசாவும், அவரது நண்பர்களும் உருண்டு புரளும் காட்சி கிராஃபிக்ஸோ என்று ஒரு கணம் திகைக்கிறோம். ஆனால் அத்தனையும் உண்மையான நோட்டுக்கள்தான் என்று தெரியும்போது, நமது திகைப்பு பன்மடங்கு அதிகரிக்கிறது. 

போலீஸிடம் மாட்டும்போது, ‘எல்லாம் குருவுக்குத் தெரியும். குரு சொன்னபடிதான் செய்தேன்’ என்று குறும்பு கொப்பளிக்க ராசா சொல்லும் காட்சியில், மன்மோகன் சிங்கின் அப்பாவி முகத்தைப் பார்த்து பரிதாபப் படாதவர்களே இருக்க முடியாது. அது நடிப்பா, அதுதான் அவர் நிஜ முகபாவமா என்றே புரியாத அளவிற்கு நடிப்பில் சக்கை போடு போட்டிருந்தார் மன்மோகன் சிங். அதிலும் ராசாவின் முதுகில் தட்டிக் கொடுக்கிறாரே, பல பக்க வசனங்களை அந்த ஒரு தட்டுதல் மிஞ்சி விடுகிறது. குற்றவாளிகள் பிடிபட்டு விடுவார்கள் என்பதைப் போல் ரசிகர்களை நம்ப வைத்து, நைஸாக கதையை வித்தியாசமான பாதையில் திருப்புவது டைரக்டரின் திறமையைக் காட்டியது. எனவே மூன்றாம் இடத்தைப் பெறுகிறது ‘குரு சிஷ்யன்’. 

2. தில்லாலங்கடி

முழுக்க முழுக்க டெலிஃபோன் மூலமாகவே சொல்லப்பட்ட வித்தியாசமான மர்மக் கதை தில்லாலங்கடி. ஆன்டி ஹீரோயினாகத் தோன்றி, தனது தில்லாலங்கடிச் செயல்களின் மூலம் எதையும் சாதிக்க கூடிய சகலகலா வல்லியாக அசத்தியிருந்தார் நிரா ராடியா. அதிலும் அந்த 600 கோடி ரூபாய் ரகசியத்தை நிரா ராடியா உடைக்கும் காட்சியில் தியேட்டரே அதிர்ச்சியில் உறைந்து விடுகிறது. அப்போது கருணாநிதியின் முகத்தைப் பார்க்க வேண்டுமே! தனக்கும் அதற்கும் சம்பந்தம் இல்லாதது போல் என்னமாய் அப்பாவி நடிப்பை வெளிப்படுத்தியிருந்தார்! 

ராசாவுக்கு ஆதரவாக கனிமொழியும் நிரா ராடியாவும் பேசும் காட்சியில், மயிர்க் கூச்செறியச் செய்யும் வசனங்கள் படத்துக்குப் பெருமை சேர்க்கின்றன. கௌரவ நடிகராகத் தோன்றிய டாடாவிடமிருந்து இப்படியொரு மர்மமான நடிப்பை யாருமே எதிர்பார்த்திருக்க முடியாது. க்ளைமாக்ஸில், நிரா ராடியாவை அதிகாரிகள் விசாரணைக்கு அழைத்துச் செல்லும்போது ‘இது ஒரு டாடா தயாரிப்பு’ என்று அறிவித்து, படத்தின் கம்பீரத்தை உணர்த்துகிறார்கள். அரசியல் திரையுலகில் இதுவரை பார்த்திராத கதையமைப்பைக் கொண்டிருந்ததால், தில்லாலங்கடியை 2-வது இடத்திற்கு தேர்வு செய்கிறோம். 

1. மகிழ்ச்சி

குடும்பப் பாசத்தின் சிறப்பை விளக்கிய நகைச்சுவை படம் மகிழ்ச்சி. டைட்டிலின்போது, பின்னணியில் ரூபாய் நோட்டுகள் மழையாகப் பொழிய, ‘அடடா மழைடா, அடை மழைடா’ என்று கலைஞரும் அவரது குடும்பத்தினரும் மகிழ்ச்சியோடு பாட, கணிசமான எதிர்பார்ப்போடுதான் அமர்கிறார்கள் ரசிகர்கள். 

கலைஞரே கதை வசனம் எழுதி இயக்கி நடித்திருந்த இப்படம், வசூலில் முந்தைய சாதனைகளை முறியடித்தது. குடும்பத் தலைவர் கலைஞர், தன் குடும்ப உறுப்பினர்களின் மகிழ்ச்சிக்காக என்னவெல்லாம் செய்கிறார் என்பதுதான் கதை. 

‘ஏழையாகப் பிறந்தாலும் வசதியான குடும்பத்தில்தான் பிறந்தேன்’ என்று கலைஞர் சீரியஸாக் கூறும் போது தியேட்டரில் சிரிக்காதவர்களே இல்லை. ‘நான் ஊழலுக்கு நெருப்பு’ என்ற பஞ்ச் டயலாக்கில் சிரித்து சிரித்து வயிறு புண்ணாகி விடுகிறது. அதிலும், அந்த சொத்துக் கணக்கு காட்டும் ஸீன் தூள். அவருக்கே உரித்தான குறும்பான நடிப்பு. ‘எனக்கு ஒரே ஒரு வீடு. அதையும் தானம் செய்து விட்டேன்’ என்று அந்த வீட்டில் இருந்தபடியே கூறும் ஒவ்வொரு முறையும் தியேட்டரில் ஏக கரகோஷம். வீரமணியின் பின்னணி இசை ஓவர். 

படம் முடியும்போது, ‘பிள்ளைகளை உயர்ந்த பதவிகளில் அமர்த்தி விட்டார். மகள்களை கோடீஸ்வரர்களாக்கி விட்டார். பேரன்களை சினிமா தயாரிப்பாளராக்கி விட்டார். உறவினர்கள் அனைவரையும் ஓஹோ என்று வாழ வைத்து விட்டார். ஆம்! ஏழைகளின் சிரிப்பில் இறைவனைக் கண்டுவிட்டார்’ என்று கார்டு போடுவது சிந்தனையைத் தூண்டுகிறது. தலைசிறந்த குடும்பப் படமான ‘மகிழ்ச்சி’யை முதல் இடத்திற்கு தேர்வு செய்வதில் பெருமை கொள்கிறோம்!

 நினைத்ததை முடிக்கும் நிரா ராடியா! – சத்யா 

நிரா ராடியா என்ற பெண் அரசியல் தரகர் சம்பந்தப்பட்ட டெலிஃபோன் உரையாடல்களில், இதுவரை வெளியாகியுள்ள ஒரு சிறு பகுதியே நாட்டைப் பெரும் அதிர்ச்சியில் ஆழ்த்தியுள்ளது. இன்னும் இதுபோல் ஏராளமான உரையாடல் பதிவுகள் வருமான வரித்துறை மற்றும் உள்துறை அமைச்சகத்தின் வசம் இருப்பதாகத் தெரிகிறது. அவற்றில் எத்தகைய பயங்கரத் தகவல்கள் இருக்கின்றனவோ தெரியவில்லை. நமக்கோ விபரீதமாகக் கற்பனை செய்தே பழகி விட்டது. யார் கண்டது? நிரா ராடியாவால் சாதிக்க முடியாத விஷயமே இல்லை எனும்போது, வெளிவராத உரையாடல்கள் இப்படிக் கூட இருக்கலாம். 

“ஹாய், நிரா...! ஹவ் ஆர் யூ?” 

“வெரி ஃபைன் விஜய். டோன்ட் ஒர்ரி. உங்க சப்ஜெக்ட்டை மத்திய மந்திரிசபை மீட்டிங் அஜென்டாவிலே சேர்த்தாச்சு. இன்னைக்கு ஓகே ஆயிடும்.” 

“தேங்க்யூ! ஏன்னா, இன்டஸ்ட்ரியலிஸ்ட் மேத்தா இந்த டீலை கண்டிப்பா முடிக்கணும்ன்றாரு.... எழுபதாயிரம் கோடி ரூபாய் விஷயமாச்சே. மந்திரிசபையிலே எதிர்ப்பு எதுவும் வருமோன்னு கவலைப்படறாரு.” 

“எதுவும் வராது. நான் பேசிட்டேன்.” 

“பிரதமர்...?” 

“பிரதமரைப் பத்திக் கவலைப்பட வேண்டியதில்லை. அவரை வெளிநாட்டுக்குப் போகச் சொன்னாப் போயிடுவாரு. அதானே அவர் வேலை? அவர் எந்த நாட்டுக்குப் போனா நமக்கு நல்லது? ஸ்வீடன்?” 

“நோ... ஜெர்மனி பெட்டர்னு நினைக்கிறேன்.” 

“ஓ.கே., பி.எம். ப்ரோக்ராமை வாங்கி, ஜெர்மனின்னு மாத்திடறேன். மாத்திட்டு, இன்னைக்கே உங்களுக்கு ஃபோன் பண்ணிடறேன்.” 

“தேங்யூ! அப்புறம் என் ஃப்ரண்ட் ப்ரகாஷுக்கு மினிஸ்டர் போஸ்ட் கேட்டிருந்தேனே?” 

“அதையும் முடிச்சாச்சு. பட்... நீங்க கேட்ட இலாகா இப்பவே கிடைக்காது. த்ரி மன்த்ஸ் வெயிட் பண்ணா கண்டிப்பா வாங்கித் தரேன்.” 

“த்ரீ மன்த்ஸா? அவ்வளவு நாள் மந்திரி பதவி இல்லாம சும்மா இருக்க அவன் தயாராயில்லை. மந்திரி ஆயிட்டு சும்மா இருக்கணும்னு அவசரப்படறான். அதனாலே, அந்தோணி இடத்துக்கு கிருஷ்ணாவைப் போட்டு, சிதம்பரம் இடத்துக்கு பிரணாப்பைப் போட்டு, பவாருக்கு பதிலா கமல்நாத்தைப் போட்டு, மொய்லியை ஸ்டேட் மினிஸ்டராக்கி, அழகிரியை மதுரைக்கு அனுப்பிட்டா...” 

“தட்ஸ் குட் ஐடியா! எனக்கே இது தோணலை. இன்னைக்கே பேசிடறேன். ஹவ் ஈஸ் திலக்?” 

“அவர் என் பக்கத்திலேயே இருக்காரு. அவர் விஷயம் என்ன ஆச்சு?”

“பாரத ரத்னா அவார்ட்தானே? கமிட்டியிலே பேசிட்டேன். ஆனா அதுக்கு பல சோர்ஸிலேர்ந்து ப்ரஷர். எப்படி சமாளிக்கப் போறேன்னே தெரியலை. நிறைய லாபி பண்ண வேண்டியிருக்குது. திலக்கை அவசரத்துக்கு பத்மவிபூஷண் வாங்கிக்கச் சொல்லுங்களேன். அப்படின்னா இன்னைக்கே கன்ஃபர்ம் பண்ணிடறேன்.” 

“தேங்யூ நிரா! ஸீ யூ!” 

“நிரா, திஸ் ஈஸ் தீபக்.” 

“ஹாய் தீபக். எவ்ரிதிங் ஃபைன். ஹவ் ஈஸ் ஜகதீஷ்?” 

“ஃபைன். ஜகதீஷ் விஷயமாத்தான் ஃபோன் பண்றேன். அவர் கேட்ட ஆளுக்கு சுப்ரீம் கோர்ட் ஜட்ஜ் அப்பாயின்ட்மென்ட் ஏன் டிலே ஆகுதுன்னு ரொம்ப வருத்தப்படறாரு.” 

“அதைப் பத்தி உங்க ஸ்டேட் மினிஸ்டர் கிட்டே நேத்தே எக்ஸ்ப்ளெய்ன் பண்ணிட்டேன். அவர் கூட ரொம்ப கேட்டுக்கிட்டாரு. அதுக்காகத்தான் நான் இன்னைக்கு டெல்லி போறேன். அனேகமா இன்னைக்கு பேசி முடிச்சுடுவேன்.” 

“இந்த சின்ன விஷயத்துக்கு டெல்லி போகணுமா? ஃபோன்லேயே பேசி முடிக்கலாமே?”

“பட் யூ நோ... ஸி.பி.ஐ. டைரக்டர் போஸ்டிங் மாதிரியோ, அட்வகேட் ஜெனரல் அப்பாயின்ட்மென்ட் மாதிரியோ இதை ஈஸியா முடிக்க முடியாது. பல பேரை நான் கன்வின்ஸ் பண்ண வேண்டியிருக்குது.” 

“ஐ நோ யுவர் டிஃபிகல்டி. பட், மினிஸ்டரோட வழக்குகள் அடுத்த மாசம் சுப்ரீம் கோர்ட்லே ஃபைனல் ஹியரிங்குக்கு வருது. எத்தனை கோடி செலவானாலும் பரவாயில்லை, அதுக்குள்ளே ஜட்ஜை மாத்திடணும்னு ஆசைப்படறாரு.” 

“நியாயமான ஆசைதான். ஆனா, ரெண்டு நாளா நான் ரொம்ப பிஸி. எடியூரப்பாவுக்கும் கவர்னருக்கும் சரிப்பட்டு வரலை. அதனாலே ஆல் இந்தியா லெவல்லே கவர்னர்கள் மாற்றம் இருக்கலாம். அந்த வேலையையும் நான் கவனிக்க வேண்டியிருக்குது.” 

“ஐ.ஸீ.” 

“பஞ்சாப் கவர்னரை ஜார்கண்டுக்கு மாத்தி, அஸ்ஸாம் கவர்னரை ஆந்திராவுக்கு அனுப்பி, ஆந்திரா கவர்னரை கட்சி வேலைக்கு அனுப்பிட்டா, நம்ம டார்கெட் அச்சீவ் ஆயிடும். அது விஷயமாத்தான் இன்னைக்குப் போப்போறேன்.” 

“இந்த அமர்க்களத்திலே ஜனாதிபதி தேர்தலை மறந்துடப் போறீங்க. நம்ம ஆள்தான் அடுத்த ஜனாதிபதியா வரணும்.” 

“அந்த விஷயமா ஏற்கெனவே பேசிட்டேன். பட், எந்த விஷயத்திலேயும் தலையிடாம, என்ன நடந்தாலும் கோபமே வராத, சொல்ற வேலையை மட்டும் செய்ய தகுதியான ஆள் கிடைக்கணுமேன்னு கவலைப்படறாங்க. அனேகமா, நம்ம பிரதமரையே நெக்ஸ்ட் ப்ரஸிடென்டா ஆக்கிட்டா என்னன்னு ஒரு மூவ் இருக்குது.”

“ஓ மை காட்... அப்ப நம்ம ஆள் ஜனாதிபதி ஆக முடியாதா? அதை நம்பி ஏராளமான ப்ரபோஸல்ஸ் பெண்டிங்லே வெச்சிருக்கேனே?” 

“டோன்ட் வொர்ரி. ஐ வில் டேக் கேர். பைபை.” 


“ஈஸ் இட் நிரா?” 

“யா, வசந்த்! ஹவ் ஆர் யூ? நான் ஒபாமா கிட்டே பேசிட்டேன். எவ்ரிதிங் ஓகே.” 

“தேங்யூ. உங்களைத்தான் நம்பியிருக்கேன். ஒபாமா என்ன சொன்னார்?” 

“புடினை மாத்தணும்னு சொன்னார். அஃப்கோர்ஸ், அது அவங்க பிரச்சனை. நேத்துத்தான் புடின் என் கிட்டே ஒரு மணி நேரம் ஃபோன்லே பேசிட்டிருந்தாரு. ஒபாமா என் கிட்டே சொன்ன விஷயம் எதையும் நான் புடின் கிட்டே சொல்லலை. புடின் சொன்னதையும் ஒபாமா கிட்டே சொல்லலை.” 

“வெரிகுட். டிப்ளமேடிக் அப்ரோச். நம்ம விஷயத்தைப் பேசுவோம். ஏழு அக்ரிமென்ட்லே இந்தியா கையெழுத்துப் போடணும். அதுலே ஒண்ணும் பிரச்சனை இருக்காதே?”

“நிச்சயமா இருக்காது. அதெல்லாம் ஒபாமா பாத்துக்குவாரு. நான் ஹிலாரி க்ளிண்டன் கிட்டே கூட எக்ஸ்ப்ளெய்ன் பண்ணிட்டேன்.” 

“அப்ப கவலையே இல்லை. கையெழுத்தாயிடும். பின்லேடனுக்கு இந்த விஷயம் தெரியுமா?” 

“அவருக்கு எப்படி தெரியும்?நான்தான் சொன்னேன். எல்லாத்தையும் பொறுமையா கேட்டுக்கிட்டு, ‘அக்ரிமென்ட்லே இந்தியா மட்டும்தான் கையெழுத்துப் போடணும். அமெரிக்கா போடக் கூடாதுன்னாரு.” 

“ஐயையோ....” 

“பட் நான் அவரை சமாதானப்படுத்தி சம்மதிக்க வெச்சேன். என் ப்ளான் என்னன்னு கிறிஸ்துமஸுக்கு அப்புறம்தான் சொல்ல முடியும்னு சொல்லியிருக்காரு. எனிவே, ஜர்தாரி மூலமா பின்லேடனை சரிக்கட்டிட முடியும். நீங்க தைரியமா இருங்க.” 

“தேங்யூ நிரா. இந்த அக்ரிமென்டுக்கு கம்யூனிஸ்ட்கள் எதிர்ப்பு தெரிவிப்பாங்களா?” 

“சீனாவே ஓகே சொன்ன பிறகு கம்யூனிஸ்ட்கள் எப்படி பிரச்சனை பண்ணுவாங்க? பா.ஜ.க.தான் நம்பிக்கை இல்லாத் தீர்மானம் கொண்டு வரலாம். அப்பதான் எல்லாம் அப்செட்டாயிடும்.”

“அடடா, அதை எப்படி தடுக்கிறது?” 

“பா.ஜ.க. எம்.பி.க்கள் 65 பேர் கூட பேசிட்டேன். நம்பிக்கை இல்லாத் தீர்மானம் வரும்போது வெளியே போயிடுவாங்க. இதுக்கு 6500 கோடி செலவாகும். இந்தச் செலவை பில்கேட்ஸ் ஏத்துக்கறதாக என் கிட்டே ப்ராமிஸ் பண்ணியிருக்காரு.” 

“அப்பாடா! பெரிய பிரச்சனை தீர்ந்தது. இன்னும் ஒரே ஒரு சின்ன ஹெல்ப் நிரா. உங்களாலே முடியுமா?” 

“என்ன, ஸ்விஸ் பேங்க் பிரச்சனைதானே? அவங்களோடயும் பேசிட்டேன். எந்த விஷயமும் வெளியே வராதுன்னு இந்தியன் கவர்ன்மென்ட்டுக்கு லெட்டர் எழுதப் போறதாச் சொல்லிட்டாங்க.” 

“அது நாம எதிர்பார்த்ததுதானே! நான் அதைக் கேக்கலை.” 

“வேறே என்ன? எதுவாயிருந்தாலும் கேளுங்க. யார் கிட்டே பேசணும்னாலும் பேசிடறேன்.” 

“வந்து... என் ஃப்ரெண்ட் ஒருத்தர் தமிழ்நாட்டுலே காங்கிரஸ்காரரா இருக்காரு. தி.மு.க. ஆட்சியிலே பங்கு வேணும்னு ஆசைப்படறார். வாங்கித் தர முடியுமா?”

“ஓ... வெரி ஸாரி! அது மட்டும் என்னாலே முடியாது.”

விக்கி லீக்ஸ் வெளியிடாத விபரீதங்கள் – சத்யா 

‘நமது நாட்டில் நடைபெறும் அரசியல் மோசடிகள் குறித்து, நம்மைவிட அமெரிக்கர்கள் அதிகமாகத் தெரிந்து வைத்திருக்கிறார்களோ என்று நினைக்கும் வகையில், விக்கி லீக்ஸ் இணைய தளம் பல்வேறு அரசியல் தகவல்களை அவ்வப்போது வெளியிட்டு, பீதியைக் கிளப்பிக் கொண்டிருக்கிறது. போகிற போக்கைப் பார்த்தால், விரைவில் நமது பாராளுமன்றத்தில் இப்படியும் விவாதம் நடக்கலாம். 



சுஷ்மா ஸ்வராஜ் : தி.மு.க. கூட்டணியில் காங்கிரஸுக்கு 63 இடம் தர மறுத்து, மத்திய அரசுக்கான ஆதரவை தி.மு.க. வாபஸ் வாங்கிக் கொண்டபோது, நடந்தது என்ன என்று விக்கி லீக்ஸ் வெளியிட்டிருக்கிறது. ‘63 இடம் தர மறுத்தால், தி.மு.க. தலைவரின் குடும்பப் பெண்களை இன்றே ஸி.பி.ஐ. கைது செய்யும்’ என்று காங்கிரஸின் மிக முக்கியத் தலைவர், அழகிரியிடம் மிரட்டியுள்ளார். இத்தகவல் கருணாநிதிக்குத் தெரிவிக்கப்பட்டதும், ‘சரி. கொடுத்து தொலைக்கிறேன்’ என்று அவர் கூறியதாக விக்கி லீக்ஸ் கூறியுள்ளது. இதற்கு அரசு விளக்கம் அளிக்க வேண்டும். 

பிரணாப் முகர்ஜி : விக்கி லீக்ஸ் பற்றி விவாதிக்கும் இடம் இது அல்ல. பாபர் மசூதி இடிப்புக்கு அத்வானி காலம் கடந்து வருத்தம் தெரிவித்ததை மறைப்பதற்காக, பா.ஜ.க. விக்கி லீக்ஸை கையில் எடுத்துக் கொண்டிருப்பது வெட்கக் கேடு. 

அத்வானி : விக்கி லீக்ஸ் குற்றச்சாட்டுக்கு அரசு மௌனம் சாதிப்பது அதிர்ச்சி அளிக்கிறது. 2008-ல் அரசைக் காப்பாற்றிக் கொள்ள, 190 கோடி ரூபாயை பிரதமரிடமே கொடுத்ததாக, இரு முக்கிய தொழிலதிபர்கள் அமெரிக்க தூதரக அதிகாரிகளிடம் கூறியுள்ளனர். அந்தப் பணத்தை 19 எம்.பி.க்களுக்கு சோனியா முன்னிலையில் பிரதமரே வினியோகம் செய்துள்ளார் என்கிறது விக்கி லீக்ஸ். பிரதமர் பதில் சொல்ல வேண்டும். 

கபில்சிபல் : ‘எனக்குத் தெரிந்து எதுவும் நடக்கவில்லை’ என்று அப்போதே பிரதமர் விளக்கம் அளித்து விட்டார். அதை விக்கி லீக்ஸ் மறைத்திருப்பதற்கு பா.ஜ.க.வின் தூண்டுதல்தான் காரணம். பா.ஜ.க.வுக்கும் விக்கி லீக்ஸுக்கும் இடையேயான ரகசிய உறவு பற்றி விசாரணை நடத்தப்படும். 

அருண்ஜெட்லி : ‘ஊழல் கண்காணிப்பு ஆணையர் பதவிக்கு தாமஸைத்தான் தேர்ந்தெடுக்க வேண்டும். இல்லா விட்டால் பிரதமரை மாற்ற வேண்டியிருக்கும். நேர்மை முக்கியமா, பிரதமர் பதவி முக்கியமா என்று சீக்கிரம் முடிவெடுங்கள்’ என்று சோனியா பிரதமரை மிரட்டியதாகவும் விக்கி லீக்ஸ் அம்பலப்படுத்தியிருக்கிறது. இதற்கு பிரதமர் விளக்கம் அளிக்க வேண்டும். 

மன்மோகன் சிங் : தாமஸ் நியமனம் போன்ற தவறுகளை இனி யாரும் செய்யக் கூடாது என்பதுதான் மத்திய அரசின் நிலை. முடிந்து போன பிரச்சனையை பா.ஜ.க. மீண்டும் துவக்குவது அதன் தீய நோக்கத்தைக் காட்டுகிறது. அதனால்தான் டெல்லி கார்ப்பரேஷன் தேர்தலில் பா.ஜ.க. தோல்வியுற்றது. 

யெச்சூரி : ஸ்விஸ் வங்கியில் கறுப்புப் பணத்தைப் பதுக்கியுள்ள இந்திய கறுப்புப் பண முதலைகளுக்கு சோனியா வீட்டில் விருந்து நடத்தப்பட்டுள்ளது. இத்தகவலை அமெரிக்கத் தூதரகம் வாஷிங்டனுக்கு அனுப்பியுள்ளதை விக்கி லீக்ஸ் கண்டுபிடித்துள்ளது. நாடு எங்கே போகிறது? 

அபிஷேக் சிங்வி : பிரதமரின் நேர்மை உலகுக்கே தெரியும். ஆனால், கம்யூனிஸ்ட்களுக்கு மட்டும் தெரியவில்லை. அதனால்தான் 2009 தேர்தலில் மக்கள் அவர்கள் பலத்தை 59-லிருந்து 24-ஆகக் குறைத்திருக்கின்றனர். இனியும் இடதுசாரிகள் திருந்தா விட்டால், கேரளாவிலும் மேற்கு வங்கத்திலும் ஆட்சியை இழப்பார்கள். 

குருதாஸ் குப்தா : 2009 தேர்தல் முடிவுகளை ஹிலாரி க்ளிண்டன் துல்லியமாக கணித்து 2008-லேயே கூறியுள்ளார். தேர்தல் முடிவும் அதே போல் அமைந்திருப்பதை விக்கி லீக்ஸ் சுட்டிக்காட்டியிருக்கிறது. இந்தியத் தேர்தல்களை நடத்துவது அமெரிக்காவா, இந்தியத் தேர்தல் ஆணையமா? 

பிரணாப் : அறுபது கோடி மக்கள் வாக்களித்து நடக்கும் தேர்தலை கொச்சைப்படுத்துவதை ஏற்க முடியாது. விக்கி லீக்ஸ் மீது நடவடிக்கை எடுக்கப்படும் என்று அமெரிக்காவே கூறியிருக்கிறது. அப்படியிருந்தும், இடதுசாரிகள் பா.ஜ.க.வுடன் இணைந்து அரசை எதிர்ப்பதிலிருந்தே அவர்களது மதச்சார்பின்மை முகமூடி கிழிந்து விட்டது புரிகிறது. 

அத்வானி : விக்கி லீக்ஸ் கூறுவது எதையும் அரசால் மறுக்க முடியவில்லை. ‘என் வழக்கை இன்னும் வாபஸ் வாங்காதது ஏன்?’ என்று க்வாட்ரோக்கி, ஸி.பி.ஐ. அதிகாரிகளை அர்ஜென்டினாவுக்கு வரவழைத்து சோனியா முன்னிலையில் கண்டித்ததையும், ஸி.பி.ஐ. அதிகாரிகள் தலைகுனிந்து நின்றதையும் விக்கி லீக்ஸ் வெளியிட்டுள்ளது. ‘எனக்கு எதுவும் தெரியாது’ என்று பிரதமர் க்வாட்ரோக்கியிடம் பவ்யமாகக் கூறியதும் புகைப்பட ஆதாரத்துடன் வெளியாகியுள்ளது. 

மன்மோகன் சிங் : ஒரு மனிதரை அளவுக்கு மேல் துன்புறுத்தக் கூடாது. நான் க்வாட்ரோக்கி பற்றி கூறவில்லை. என்னைப் பற்றிக் கூறுகிறேன். எனவே எதிர்க் கட்சிகள் விக்கி லீக்ஸ் விவகாரத்தை விட்டுவிட்டு, விலைவாசி ஏன் குறையவில்லை என்று அரசுடன் சேர்ந்து கவலைப்பட வேண்டும். இல்லாவிட்டால் நடைபெறும் ஐந்து மாநிலத் தேர்தல்களில் பா.ஜ.க.வை மக்கள் நிராகரிப்பார்கள். 

சுஷ்மா : சுப்ரீம் கோர்ட்டின் முன்னாள் தலைமை நீதிபதி ஒருவர் ஸ்விஸ் வங்கியில் பல ஆயிரம் கோடி ரூபாய் முதலீடு செய்திருப்பதாக விக்கி லீக்ஸ் கூறுகிறது. இந்தப் பணத்தை மீட்டாலே இந்தியாவில் விலைவாசியைக் குறைக்க முடியும். 

கபில்சிபல் : ஸ்விஸ் பேங்கில் இந்தியர்கள் யாருக்கும் ஒரு ரூபாய் கூட இல்லை. விக்கி லீக்ஸ் என்று ஒரு இணையதளம் இருப்பதாகக் கூறப்படுவதே எதிர்க் கட்சிகளின் கற்பனை. அமெரிக்கா என்ற ஒரு நாடு இருப்பதற்கும் எந்த ஆதாரமும் இல்லை. 

யெச்சூரி : தி.மு.க. ஆட்சியில் பங்கு தர கருணாநிதி மறுத்ததால்தான், தினகரன் பத்திரிகை எரிப்பு வழக்கில் ஸி.பி.ஐ. அப்பீல் செய்துள்ளதாக டி.ஆர். பாலுவிடம் அகமது படேல் கூறியதை விக்கி லீக்ஸ் அம்பலப்படுத்தியுள்ளது. தேர்தலுக்குப் பிறகும் பங்கு தர தி.மு.க. மறுத்தால், ஸி.பி.ஐ. நடவடிக்கைகள் தீவிரமடையும் என்று தி.மு.க. மிரட்டப்பட்டதாகவும் அச்செய்தி கூறுகிறது. இதுபற்றி அரசு விளக்கம் தர வேண்டும்.

பிரணாப் : தி.மு.க. – காங்கிரஸ் கூட்டணி தமிழகத்தில் தொடர்ந்து வெற்றி பெறுவதிலிருந்தே, உறுப்பினரின் குற்றச்சாட்டுக்கு எந்த ஆதாரமும் இல்லை என்பது நிரூபணமாகி விட்டது. அச்சுதானந்தன் – பினராயி விஜயன் மோதலை மறைக்க உறுப்பினர் செய்யும் தந்திரம் பலிக்காது. 

லாலு பிரசாத் : மம்தா பானர்ஜி ரயில்வே நிதியை மேற்கு வங்கத் தேர்தல் பிரச்சாரத்துக்குப் பயன்படுத்துவதாக விக்கி லீக்ஸ் கூறியிருப்பதை இந்த அரசு மறைப்பது ஏன்? காங்கிரஸுக்கு அதிக இடங்கள் பெறுவதற்காகத்தான் மம்தாவின் ஊழலை இந்த அரசு மூடி மறைக்கிறது. 

மம்தா : லாலுஜியின் மீது எனக்கிருக்கும் மரியாதை காரணமாகத்தான் அவரது ஆட்சிக் காலத்தில், ராப்ரி தேவியின் பிறந்தநாள் பரிசாக 28 ரயில்களை அவர் பரிசாக அளித்ததை நான் பெரிதுபடுத்தவில்லை. அந்த விஷயத்தை விக்கி லீக்ஸ் வெளியிட்டு விட்டதால், ஊழல் குற்றவாளிகளைத் தப்பவிட மாட்டேன். 

யெச்சூரி : 2ஜி ஒதுக்கீடு யார் யாருக்கு செய்யப்பட வேண்டும் என்று தமிழக முதல்வரின் குடும்பப் பெண் ஒருவர் ராசாவுக்கு உத்தரவிட்ட விவகாரம் விக்கி லீக்ஸ் மூலம் வெளிவந்துள்ளது. முதல்வரின் குடும்ப உறுப்பினர்களுக்கு லண்டனில் 13 மருத்துவக் கல்லூரிகள் இருப்பதாகவும், சிங்கப்பூரில் 18 ஐந்து நட்சத்திர ஹோட்டல்கள் இருப்பதாகவும் விக்கி லீக்ஸ் செய்திகள் கூறுகின்றன. இதுபற்றி விசாரணை நடத்தப்பட வேண்டும். 

அருண்ஜெட்லி : ‘காஷ்மீரில் தீவிரவாதத்தைச் சற்றுக் குறைத்துக் கொண்டால், வரும் சுதந்திர நாளில் பிரதமரே வந்து பாகிஸ்தான் கொடியை ஏற்றுவார். அதற்குப் பிறகு காஷ்மீரில் என்ன வேண்டுமானாலும் செய்து கொள்ளுங்கள்’ என்று பிரதமரின் சார்பாக பிரிவினைவாதிகளுடன் பேரம் பேசப்பட்டதையும் விக்கி லீக்ஸ் வெளியிட்டிருக்கிறது. இதற்கு என்ன சொல்கிறீர்கள்? 

சுஷ்மா : இரண்டாம் முறையாக ராசா தொலைத்தொடர்பு இலாகா அமைச்சர் பொறுப்பை ஏற்பதற்கு முன்பாக, கருணாநிதியே டெல்லியில், நிரா ராடியாவைச் சந்தித்து, ‘எப்படியாவது ராசாவை அமைச்சராக்கி விடுங்கள். இல்லாவிட்டால் நான் குடும்பத்தில் கடுமையான எதிர்ப்புகளைச் சந்திக்க வேண்டியிருக்கும். நானும் பிரதமரும் உங்களைத்தான் நம்பியிருக்கிறோம்’ என்று கூறி கண் கலங்கியதையும் விக்கி லீக்ஸ் வெளியிட்டிருக்கிறது. இதுதான் மத்திய அரசு நடக்கிற லட்சணமா? 

அத்வானி : அதுமட்டுமல்ல, ஹசன் அலியின் முதுகில் பிரதமர் தட்டிக் கொடுத்ததையும் விக்கி லீக்ஸ் புகைப்பட ஆதாரத்துடன்... 

கபில்சிபல் : பிரதமர் சந்தேகத்துக்கு அப்பாற்பட்டவர். எனவே, அவரது நேர்மையை நாட்டு மக்களுக்கு மீண்டும் நிரூபிக்கும் வகையில், விக்கி லீக்ஸ் பற்றி கூறப்படும் செய்திகள் குறித்து விசாரிக்க ஒரு நபர் கமிஷன் அமைக்கப்படும். யாரையும் விசாரிக்காமல், எந்த ஆவணத்தையும் பார்க்காமல், நாளைக்கே அறிக்கை வெளியிட அவருக்கு உரிய அறிவுரைகள் வழங்கப்படும். 

(பின்குறிப்பு : ஒவ்வொரு கருத்தையடுத்தும் ‘கூச்சல், ரகளை, சபை ஒத்திவைப்பு’ என்று சேர்த்துப் படிக்கவும்.)

 ஸி.பி.ஐ.யின் கண்டுபிடிப்புகள் – சத்யா 

2-ஜி ஸ்பெக்ட்ரம் ஒதுக்கீட்டில் நடைபெற்ற முறைகேடுகள் தொடர்பாக, ஸி.பி.ஐ. சுமார் ஒரு வருடத்திற்கு முன்பே வழக்குப் பதிவு செய்தது. மத்திய அமைச்சர் ராசா ராஜினாமா செய்த பதினைந்து நாட்களுக்குப் பிறகு – சுப்ரீம் கோர்ட்டின் கண்டனங்களைத் தொடர்ந்து, நாடு முழுவதும் விமர்சனங்கள் எழுந்ததையடுத்து – அவரது இடங்களில் சோதனையும் நடத்தியுள்ளது. இவ்வளவு காலஅவகாசம் கொடுத்த பிறகு மேற்கொள்ளப்பட்ட ஸி.பி.ஐ. சோதனை, எவ்வளவு பயனுள்ளதாக இருந்திருக்கும் என்று நமக்கு புரியவில்லை. ஆனால், நிகழ்ச்சிகள் போகிற போக்கைப் பார்க்கும்போது, ஸி.பி.ஐ. கண்டுபிடித்தவை இந்த வகையில் இருந்திருந்தால் ஆச்சரியப்படுவதற்கில்லை என்றே தோன்றுகிறது. 



(ஸி.பி.ஐ. அதிகாரிகள், பரபரப்பாக ராசாவின் வீட்டிற்குள் நுழைகிறார்கள்). 

ஸி.பி.ஐ. அதிகாரி : எல்லா கதவுகளையும் மூடுங்க. ஃபோனை டிஸ்கனெக்ட் பண்ணுங்க. யாரும் வெளியே போகக் கூடாது. யாரும் உள்ளேயும் வரக் கூடாது. ஜன்னலையும் சாத்துங்க. 

ராசா : அதெல்லாம் இருக்கட்டும் ஸார். ஏன் இவ்வளவு லேட்? நீங்க சோதனை போடறதுக்கு வசதியா, எல்லாத்தையும் காலி பண்ணிட்டு தயாரா வெயிட் பண்றேன். இவ்வளவு மெதுவா வரீங்களே! நான் மற்ற வேலைகளைக் கவனிக்க வேண்டாமா? 

ஸி.பி.ஐ. : உத்தரவு கிடைச்சவுடனே ஒரு நிமிஷம் கூட வீணாக்காம வந்துட்டோம். எங்க கடமைகளிலே குறுக்கிடாம, நீங்க ஒரு ஓரமா உட்காருங்க. நாங்க கேக்கற கேள்விகளுக்கு மட்டும் பதில் சொன்னாப் போதும். 

ராசா : எதுவாயிருந்தாலும், பிரதமரைக் கேட்டுக்குங்க. அவருக்கு எல்லாம் தெரியும். கலைஞரைக் கேக்காதீங்க. அவருக்கு எதுவும் தெரியாது.

ஸி.பி.ஐ. : முதல்லே பீரோ சாவியை குடுங்க. சோதனை போடணும்.

ராசா : பீரோ திறந்துதான் ஸார் இருக்குது. சும்மாதான் சாத்தியிருக்கேன். பீரோவிலே ஏதாவது இருந்தாதானே பூட்டறதுக்கு? காலியாத்தான் இருக்குது. பாத்துக்குங்க. மற்ற இடங்களிலே ஏதாவது கிடைக்குதான்னு பாருங்க, பாவம் ரொம்ப தூரத்திலேர்ந்து வந்திருக்கீங்க. 

ஸி.பி.ஐ. : இதென்ன பேப்பர்? +1.76-ன்னு போட்டிருக்குதே? உண்மையை மறைக்காமச் சொல்லுங்க. 1.76 லட்சம் கோடி ரூபாய் வருமானம்னு கோட் வேர்ட்ஸ்லே குறிச்சிருக்கீங்க. அப்படித்தானே? 

ராசா : உளறாதீங்க ஸார். அது கண் டெஸ்ட் பண்ணப்போ, டாக்டர் எழுதிக் கொடுத்த பிரிஸ்கிரிப்ஷன். +1.76-ன்றது ஸ்பெக்ஸ் அளவு. ஸ்பெக்ட்ரம் அளவு இல்லை. 

ஸி.பி.ஐ. : அப்ப இதென்ன, 2835-ன்னு போட்டிருக்குதே? 2835 கோடி ரூபாய் ஒப்பந்தமா? ஏ.எம். ஏஜென்ஸிங்கறது யாருடைய கம்பெனி? உங்க பினாமி கம்பெனியா? 

ராசா : இல்லைங்க... 

ஸி.பி.ஐ. : கம்பெனியே இல்லையா? வெறும் லெட்டர் பேட்தானா? அதுக்கே சேங்ஷன் கொடுத்துட்டீங்களா? டாகுமென்ட்ஸ் எல்லாம் பாத்தீங்களா, இல்லையா? 

ராசா : ஸார், தயவு செஞ்சு அவசரப்படாதீங்க. அது கேஸ் கம்பெனி. என் மனைவி கேஸ் சிலிண்டருக்கு புக் பண்ணியிருக்கா. 2835-ன்றது எங்க கன்ஸ்யூமர் நம்பர். 

ஸி.பி.ஐ. : அதை ஏன் முதல்லேயே சொல்லலை? நாங்க துருவித் துருவி கேட்ட பிறகுதான் சொல்வீங்களா? எங்க கிட்டே எந்த உண்மையையும் மறைக்கக்கூடாது. இந்த துண்டுச் சீட்டுலே ‘டாடா 899’-ன்னு எழுதியிருக்குதே. 899 கோடி ரூபாய் டாடாகிட்டேயிருந்து வாங்கின பணமா? அது என்ன டீலிங்? 

ராசா : அது டாடா இல்லைங்க. 

ஸி.பி.ஐ. : பின்னே, அம்பானியா? டாடா பேர்லே அம்பானி கம்பெனி நடத்தறாரா? 

ராசா : உங்க சந்தேகத்துக்கு ஒரு அளவே இல்லையா? அது டாடா இல்லை. பாடா. சரியாப் பாருங்க. பாடா செருப்பு 899 ரூபாய்க்கு வாங்கினதுக்கான பில். 

ஸி.பி.ஐ. : எதுவாயிருந்தாலும் கேள்வி கேட்க வேண்டியது எங்க கடமை. நாங்க சோதனை போடற முறை கொஞ்சம் வித்தியாசமாத்தான் இருக்கும். ஹா... பாக்கெட் டயரி கிடைச்சுடுச்சு... 

ராசா : ஸார்... ஸார்... அது பர்ஸனல். அதை மட்டும் பாக்காதீங்க. 

ஸி.பி.ஐ. : கையை விடுங்க. எங்க கண்ணுலேயிருந்து எதுவும் தப்பிக்காது. 18-ஆம் தேதி முதல்வர் – 1 3/4. இதுக்கு என்ன அர்த்தம்? 18-ஆம் தேதி ஸி.எம்.முக்கு எதுக்காக ஒண்ணே முக்கால் கோடி ரூபாய் கொடுத்தீங்க? 

ராசா : அது பணம் இல்லை ஸார். 

ஸி.பி.ஐ. : பின்னே? கோல்டா? 3/4 கிலோவா, டன்னா? 

ராசா : ஏன் ஸார் இப்படி உயிர் எடுக்கறீங்க? 18-ஆம் தேதி மத்தியானம் ஒண்ணே முக்கால் மணிக்குத்தான் முதல்வரைப் பார்க்க அப்பாயின்ட்மென்ட் கிடைச்சது. அதைத்தான் குறிச்சு வெச்சிருந்தேன். ‘பெண் சிங்கம்’ ப்ரிவியூ ஷோ அன்னைக்குத்தான் நடந்தது. எந்த மந்திரியை வேணும்னாலும் கேட்டுப் பாருங்க. 

ஸி.பி.ஐ. : ...ம். மாட்டிக்கிட்டீங்க. ‘கொள்ளை அடிப்பது ஒரு கலை’ன்னு எழுதி வெச்சிருக்கீங்களே. என்ன இது? ஸ்பெக்ட்ரம் விவகாரத்துக்கும் இதுக்கும் ஏதாவது சம்பந்தம் உண்டா? 

ராசா : சத்தியமா இல்லை ஸார். அது கலைஞரோட சினிமா டயலாக். நான் அவரோட ஃபேன். ‘கோவில்கள் கொடியவர்களின் கூடாரமாக இருக்கக் கூடாது’ன்னு கூட எழுதியிருக்கேன். பாருங்க. பொழுது போகாதப்போ, அப்பப்ப கலைஞர் வசனத்தை எழுதி, படிச்சு பார்ப்பேன். அவ்வளவுதான். 

ஸி.பி.ஐ. : சரி, இதுக்காவது சரியான பதிலைச் சொல்லுங்க. இந்த பேப்பர்லே க.ப.-4; மு.ப.-5; து.ப.-6; பி.ப.-2-ன்னெல்லாம் எழுதியிருக்கீங்களே? 

ராசா : ஸார்... அது வந்து... 

ஸி.பி.ஐ. : நீங்க சொல்ல மாட்டீங்க. நானே சொல்றேன். க.ப.ன்னா கலைஞர் பங்கு. ஓகே? மு.ப.ன்னா முக்கியமானவங்க பங்கு. அதாவது, பேர் குறிக்கக் கூடாதுன்னு, சூசகமா முக்கியமானவங்கன்னு குறிச்சிருக்கீங்க. து.ப.ன்னா துபாய்லே யாருக்கோ பங்கு. பி.ப.ன்னா என்னவா இருக்கும்? ஹா, பிரதமர் பங்கா? 

ராசா : ஸார் தயவு செஞ்சு நிறுத்தறீங்களா? 

ஸி.பி.ஐ. : அப்ப நீங்களே உண்மையைச் சொல்லிடுங்க. 

ராசா : கடலைப் பருப்பு, முந்திரிப் பருப்பு, துவரம் பருப்பு, பிஸ்தாப் பருப்புன்னு மளிகை சாமான் லிஸ்ட் ஸார் அது. வீட்டு வேலைக்காரன் சுருக்கமா எழுதி வெச்சிருக்கான். 

ஸி.பி.ஐ. : சரி, இதுக்கு பதில் சொல்லுங்க. ஹவாலா 1800 கோடின்னு பில் இருக்குதே. ஹவாலா பணத்தை எங்கே டெபாஸிட் பண்ணீங்க? ஸ்விஸ் பாங்க்கா? 

ராசா : ஏன் ஸார், இப்படி படுத்தறீங்க? ஸ்பெல்லிங்கைச் சரியாப் பாருங்க. அது ஹவாலா இல்லை, ஹல்வா. கலைஞர் பிறந்தநாளுக்காக 18 கே.ஜி. ஹல்வா வாங்கின பில். 

ஸி.பி.ஐ. : அதென்ன முதுகுக்குப் பின்னாலே மறைக்கறீங்க? என்ன அது? 

ராசா : ப்ளீஸ் வேண்டாம் ஸார். விட்டுருங்க. இதைப் பாக்காதீங்க. வெளியே தெரிஞ்சா அசிங்கம். 

ஸி.பி.ஐ. : விஷயம் இவ்வளவு தூரம் முத்தின பிறகு வெளியே தெரியாம இருக்குமா? கொண்டாங்க அதை. என்ன இது, புரியலையே? 60, 35, 36, 44... யாருக்கு இப்படியெல்லாம் கோடிகளை பங்கு பிரிச்சு கொடுத்திருக்கீங்க? உங்களுக்கு தொலைத்தொடர்பு இலாகா வாங்கிக் கொடுத்தவங்களுக்கான ரேட்டா இது? நிரா ராடியாவுக்கு அறுபது கோடி, புரியுது. மத்த பத்திரிகைகாரங்க யாரு? 

ராசா : ஐயோ, அது கொடுத்தது இல்லை. வாங்கினது. 

ஸி.பி.ஐ. : அப்படி வாங்க வழிக்கு. யார் கிட்டே கமிஷன் வாங்கினீங்க? முறைகேடா ஸ்பெக்ட்ரம் ஒதுக்கீடு வாங்கின கம்பெனிகள் உங்களுக்குக் கொடுத்த கமிஷனா இது? 

ராசா : அது பணமே இல்லைங்க. அது என்னோட ப்ளஸ்-டூ ப்ராக்ரஸ் ரிப்போர்ட். நான் வாங்கின மார்க், பசங்க கண்ணுலே பட்டுடக் கூடாதுன்னு மறைச்சு வெச்சிருந்தேன். அதை நீங்க பாத்துட்டீங்க. 

ஸி.பி.ஐ. : இதென்ன, இந்த நோட்டு மேலே 2-ஜின்னு எழுதியிருக்குதே? கரெக்ட். இதேதான். இவ்வளவு நேரம் சோதனை போட்டு, கிடைக்காமப் போகுமா? இதுலே என்ன, லெட்டர் மயமா இருக்குதே... 

ராசா : அது முக்கியமில்லை ஸார். 

ஸி.பி.ஐ. : முக்கியம் இல்லைன்னு நீங்க சொல்லக் கூடாது. நாங்க சொல்லணும். ஸ்பெக்ட்ரம் ஒதுக்கீடு கேட்டு, கம்பெனிகள் உங்களுக்கு தனிப்பட்ட முறையிலே எழுதின லெட்டர்ஸ் இதுலேதானே இருக்குது? எவ்வளவு கமிஷன் தர்றதாக குறிச்சிருக்காங்க? 

ராசா : அதுலே எப்படி ஸார் குறிச்சிருக்கும்? அது என் பேத்தியோட ஹோம் ஒர்க் நோட். லெட்டர் எழுதறது எப்படின்னு ஸ்கூல்லே சொல்லிக் கொடுத்திருக்காங்க. 

ஸி.பி.ஐ. : யாரை ஏமாத்தப் பாக்கறீங்க? நோட்டு மேலே 2-ஜின்னு எழுதியிருக்குதே? 

ராசா : ரெண்டாம் க்ளாஸ், ஜி- செக்ஷனை வேறே எப்படி எழுதுவாங்க? ஸார் ஸார்... அதை ஏன் எடுக்கறீங்க...? 

ஸி.பி.ஐ. : அப்பாடா...! ஒரு வழியா டைரியைக் கண்டுபிடிச்சுட்டோம். கட்டு கட்டா டைரிகள். எல்லாத்தையும் அப்படியே பறிமுதல் பண்றோம். இந்த டைரியிலே என்னென்ன ரகசியங்கள் இருக்குதுன்னு பார்த்துட்டு தேவைப்பட்டா, விசாரணைக்கு கூப்பிடுவோம். ஓகே...? 

ராசா : அதுலே எப்படி ஸார் ரகசியம் இருக்கும்? அதெல்லாம் அடுத்த வருஷத்து டைரிகள். ஒண்ணே ஒண்ணு எடுத்துக்குங்க. மத்தவங்களுக்கும் கொடுக்கணும்லே?

முப்பதே நிமிடங்களில் அரசியல் கற்கலாம்! – சத்யா 

ஓர் இளைஞர் அரசியலைக் கற்றுக் கொள்ளாமல் நல்லபடியாக இருக்கிறாரே என்று பாராட்டுகிற எண்ணமெல்லாம் இல்லை, இந்த மூத்த அரசியல்வாதிகளுக்கு. ‘ராகுல் அரசியலில் இன்னும் குழந்தை. அவர் கற்றுக் கொள்ள வேண்டியது நிறைய இருக்கிறது’ என்று அவரை நிதீஷ் குமார், லாலு பிரசாத் யாதவ், மம்தா போன்றோர் உசுப்பிக் கொண்டேயிருக்கிறார்கள். அவர்களுக்கென்ன, ராகுல் மனம் வெறுத்துப் போய், சோனியாவிடமும், மன்மோகன் சிங்கிடமும் அரசியல் கற்றுக் கொள்ள முடிவெடுத்து விட்டால், இப்படியாகி விடுமே என்று நாமல்லவா கவலைப்பட வேண்டியிருக்கிறது! 



ராகுல் : அம்மா, எனக்கு அரசியலே தெரியலைன்னு எதிர்க் கட்சித் தலைவர்கள் கிண்டல் பண்றாங்க. ‘உடனே அரசியல் கத்துக் கொடுங்க’ன்னு பிரதமர் கிட்டே கேட்டேன். ‘எனக்கென்ன தெரியும்? நானே உங்கம்மா கிட்டேதான் கத்துக்கறேன்’னு சொல்றாரு. 

சோனியா : என்ன, அரசியல் கத்துக்கணுமா? பிரதமரான பிறகு மெதுவா கத்துக்கலாமே. நான் கூட அகில இந்திய காங்கிரஸ் கட்சித் தலைவி ஆன பிறகுதானே அரசியல் கத்துக்கிட்டேன்? 

மன்மோகன் சிங் : ராகுலுக்கு நீங்க அரசியல் கத்துக் கொடுக்கிறது ஒருவிதத்திலே எனக்கும் நல்லதுதான். எதிர் காலத்திலே எனக்கே ஏதாவது சந்தேகம் வந்தாக் கூட, உங்க உத்திரவுக்காக வெயிட் பண்ணாம, நானும் அவர் கிட்டேயே கேட்டுத் தெரிஞ்சுப்பேன். 

ராகுல் : அரசியல்னா என்ன? முப்பதே நாளில் அரசியல் கற்றுக் கொள்வது எப்படின்னு புஸ்தகம் இருக்குதா? 

சோனியா : முப்பது நாள் எதுக்கு? முப்பது நிமிஷமே போதும். ஆட்சி நம்ம கையை விட்டுப் போகாம பாத்துக்கணும். நமக்கு வேண்டியவங்க சட்டத்தின் பிடியிலே சிக்கிடக் கூடாது. நம்ம எதிரிகள் தப்பு செஞ்சாலும் செய்யலைன்னாலும், சட்டத்தின் பிடியிலேர்ந்து தப்பிடக் கூடாது. இதுக்காக நாம எடுக்கிற நடவடிக்கைகள்தான் அரசியல். 

மன்மோகன் : நம்முடைய இந்த லட்சியத்துக்கு உதவத்தான் சட்டம், ஸி.பி.ஐ., வருமானவரித்துறை, லஞ்ச ஒழிப்பு ஆணையம், போலீஸ் – எல்லாம் இருக்குது. அந்த அமைப்புகள் எல்லாம் கிட்டத்தட்ட நம்ம தொண்டர்கள் மாதிரிதான். சொல்ற வேலையைக் கரெக்டா செஞ்சுடுவாங்க.

ராகுல் : மக்கள் பிரச்சனைகள்னா என்ன? 

சோனியா : மக்கள் பிரச்சனைகள்னா மக்களோட பிரச்சனைகள். அதை மக்களே பார்த்துப்பாங்க. அரசியல் பிரச்சனைகள்தான் நம்முடைய பிரச்சனைகள். அதைத்தான் நாம கவனிக்கணும். 

ராகுல் : விலைவாசி உயர்வுன்னு அடிக்கடி பேப்பர்லே பாக்கறேன். அதுக்கு என்ன காரணம்? விலை உயர்வை கட்டுப்படுத்த முடியுமா? 

மன்மோகன் : பண வீக்கம் அதிகரிக்காம பாத்துக்கிட்டா, விலை உயர்வைக் கட்டுப்படுத்த முடியும். ஆனா, விலை உயர்வைக் கட்டுப்படுத்தினாத்தான் பணவீக்கம் அதிகரிக்காம பாத்துக்க முடியும். பொருளாதார வளர்ச்சி 8.7 சதவிகிதத்திலேர்ந்து 9.9 சதவிகிதமா உயர்ந்தா, எல்லாம் சரி ஆயிடும். அதை எப்படி உயர்த்தறதுன்னுதான் புரியலை. அதனாலே, விலை உயர்வைக் கட்டுப்படுத்த வேண்டியது மாநில அரசுகளோட பொறுப்பு. 

சோனியா : மாநிலத்திலேயும் நம்ம கட்சியே ஆட்சி செஞ்சா, நமக்கு முன்னாலே ஆட்சி செஞ்ச கட்சிதான் பொறுப்பு. 

மன்மோகன் : அதுக்காக நாம பொறுப்பே இல்லாம இருந்துட முடியாது. ‘விலைவாசி உயர்வது கவலை அளிக்கிறது’ன்னு சொல்ல வேண்டிய கடமை மத்திய அமைச்சர்கள் ஒவ்வொருத்தருக்கும் இருக்குது. வாரம் ஒரு அமைச்சர் கவலை தெரிவிச்சா, மக்களுக்கு ஆறுதலா இருக்கும். அப்பப்ப, ‘அடுத்த ஆண்டு விலைவாசி குறையும்’னு நமக்கு நாமே தைரியம் சொல்லிக்கணும். 

சோனியா : இதுதான் விலைவாசி பிரச்சனையை சமாளிக்கிற வழி. அடுத்த பிரச்சனைக்குப் போகலாம்.

ராகுல் : மதச்சார்பின்மைன்னா என்ன? 

சோனியா : சிறுபான்மையினர் ஓட்டு வங்கி, நம்ம கையை விட்டுப் போகாம பாத்துக்கணும். அது தான் மதச்சார்பின்மை. அதனாலேதான் அஃப்ஸல் கருணை மனுவை வருஷக் கணக்கிலே பரிசீலனை பண்ணிக்கிட்டே இருக்கோம். 

ராகுல் : மாவோயிஸ்ட்கள் அடிக்கடி திடீர் தாக்குதல் நடத்தி, பல அப்பாவிகளை கொலை பண்ணிடறாங்களே, ஏன்? 

மன்மோகன் : அதெல்லாம் கொலைதானான்னு சரியாப் புரியலை. ஒரு பக்கம் பார்த்தா, கொலை மாதிரியும் இருக்குது. இன்னொரு பக்கம் பார்த்தா, சமூக – பொருளாதார – அரசியல் பிரச்சனை மாதிரியும் இருக்குது. அதனாலே, மக்கள் திருப்திக்காக அதிர்ச்சி தெரிவிச்சுட்டு, தீவிரவாதிகள் திருப்திக்காக அவங்களைப் பேச்சுவார்த்தைக்கும் கூப்பிடறோம். 

சோனியா : இது ஒண்ணும் பெரிய பிரச்சனை இல்லை. ஒரு தீவிரவாத சம்பவம் நடக்கும்போது, இதுக்கு முன்னாலே நடந்த தீவிரவாதச் சம்பவம் மக்களுக்கு மறந்துடும். கடைசியா நடந்த தீவிரவாதத்துக்கு மட்டும் கொஞ்ச நேரம் கவலைப்பட்டா போதும். 

மன்மோகன் : தற்சமயத்துக்கு பெரிய பிரச்சனைன்னா, இந்த சுப்ரீம் கோர்ட் அப்பப்ப மத்திய அரசைக் கண்டிக்கிறதுதான். ஜனநாயகத்திலே இப்படிப்பட்ட சவால்களை நாம சந்திச்சுத்தான் தீரணும். தப்பிக்க வழி இல்லை. 

ராகுல் : நானும் பேப்பர்லே பார்த்தேன். 2-ஜி ஸ்பெக்ட்ரம் விவகாரத்திலே சுப்ரீம் கோர்ட் மத்திய அரசைக் கண்டிச்சிருக்குதே. அதுக்கு என்ன பதில் சொல்லணும்? 

மன்மோகன் : தயவு செஞ்சு எதைப் பத்தி வேணும்னாலும் கேளுங்க. 2ஜி ஸ்பெக்ட்ரம் விவகாரம் பத்திக் கேட்டு என் நேர்மையைச் சோதிக்காதீங்க. 

சோனியா : தமிழ்நாட்டிலே கூட்டணி விஷயத்திலே ஒரு முடிவெடுத்த பிறகுதான், 2-ஜி ஸ்பெக்ட்ரம் பிரச்சனையிலே நாம பழைய நிலைப்பாட்டிலேயே இருக்கோமா, மாறியிருக்கோமான்னு நமக்குப் புரியும். நம்ம நிலைப்பாடு நமக்கு புரியற வரைக்கும் அவகாசம் வாங்க வேண்டியதுதான். 

ராகுல் : நமக்குள்ளே பேசிக்கலாமே. ‘எல்லோருக்கும் இதே முறையைப் பின்பற்றுவீர்களா?’ன்னு சுப்ரீம் கோர்ட் கேக்கற கேள்விக்கு ஸி.பி.ஐ. என்ன பதில் சொல்லும்? 

மன்மோகன் : ஸி.பி.ஐ.க்கு என்ன தெரியும், பாவம்? நாம என்ன சொல்றோமோ, அதே பதிலைத்தான் சொல்லும். 

சோனியா : அதெப்படி ஒரே முறையை எல்லோருக்கும் பின்பற்ற முடியும்? குற்றச்சாட்டு யார் மேலேன்னு பார்க்க வேண்டாமா? ஊழல் செஞ்சது, நம்ம கட்சியா, எதிர்க் கட்சியா, கூட்டணிக் கட்சியா மாயாவதியா, லாலுவா, மோடியான்னு பாக்கணுமே. 

ராகுல் : புரியலை. ஸி.பி.ஐ.யோட வேலை என்ன? 

மன்மோகன் : ஸி.பி.ஐ. ஒரு சுதந்திரமான அமைப்பு. வழக்குகள் சம்பந்தப்பட்ட ஃபைலை பராமரிக்கிற சுதந்திரம் ஸி.பி.ஐ.க்கு உண்டு. வழக்குலே சம்பந்தப்பட்டவர் குற்றவாளியா, நிரபராதியா, வழக்கைத் தொடரணுமா, முடிக்கணுமா, வாய்தா வாங்கணுமான்னு மத்திய அரசோட கருத்தை அப்பப்ப தெரிஞ்சுகிட்டு, அதை தன் கருத்தா கோர்ட்லே தெரிவிக்கிற சுதந்திரமும் ஸி.பி.ஐ.க்கு உண்டு. க்வாட்ரோக்கிக்கு சுதந்திரம் கிடைச்சதுக்குக் கூட, ஸி.பி.ஐ.க்கு நாம வழங்கின சுதந்திரம்தான் காரணம். 

ராகுல் : பாராளுமன்றத்திலே எப்படி நடந்துக்கணும்? 

மன்மோகன் : காமன்வெல்த் போட்டி ஊழல், மும்பை ஆதர்ஷ் கூட்டுறவு சொஸைட்டி விவகாரம் பத்தி பா.ஜ.க. உறுப்பினர்கள் பிரச்சனை பண்ணா, பதிலுக்கு நாம பாபர் மசூதி இடிப்பு, குஜராத் கலவரம், அமித்ஷா விவகாரம் பற்றி பேசி அவங்களை அடக்கணும். அதான் மரபு. 

சோனியா : மாயாவதி கட்சிக்காரங்க தகராறு பண்ணா, தாஜ்மஹால் வணிக வளாக வழக்கு, சிலை வைப்பு விவகாரம் பத்தி நம்ம கட்சிக்காரங்க கேள்வி கேக்கலாம். லாலு, முலாயம் சிங் ரகளை பண்ணா அவங்களுக்கெதிரான ஸி.பி.ஐ. வழக்குகளை ஞாபகப்படுத்தி அடக்கி வைக்கலாம். ஜனநாயகத்திலே இருக்கிற இப்படிப்பட்ட வசதிகளைப் பயன்படுத்திக்கிறதுதான் அரசியல். 

ராகுல் : மகளிர் மசோதாவை நிறைவேற்றலைன்னு கூட உறுப்பினர்கள் பிரச்சனை பண்ணுவாங்களே...? 

மன்மோகன் : அதையும் வழக்கம்போலத்தான் சமாளிக்கணும். ‘இந்த கூட்டத் தொடரில் கண்டிப்பாக நிறைவேற்றுவோம்’னு நம்ப வெச்சு, கடைசி நாள்லே, ‘மகளிர் மசோதாவை நிறைவேற்ற போதிய அவகாசம் இல்லாதது வருத்தம் அளிக்கிறது. அடுத்த தொடரில் கண்டிப்பாக நிறைவேற்றுவோம்’னு சொல்லிட்டாப் போதும். 

ராகுல் : இந்தியர்களின் லட்சக்கணக்கான ரூபாய் கருப்புப் பணத்தை நூறே நாள்லே ஸ்விஸ் வங்கியி லேர்ந்து மீட்போம்னு சொன்னீங்களே. 

மன்மோகன் : அடப்பாவமே அதை நிஜம்னு நம்பிட்டீங்களா? அரசியல்லே இப்படி எதை வேணும்னாலும் சொல்லலாம். அது ஏன் நடக்கலைன்னு காரணம் சொல்றதுதான் முக்கியம். 

ராகுல் : நீங்க சொல்றதை எல்லாம் பார்த்தா, அரசியல்னா முழுக்க முழுக்க மக்களை ஏமாத்தறதுன்ற மாதிரியில்லே இருக்குது? 

சோனியா : அட, பரவாயில்லையே! முப்பதே நிமிஷத்திலே அரசியலைப் புரிஞ்சுக்கிட்டியே!

2007ம் ஆண்டு துக்ளக் விருது பெறும் அரசியல் நட்சத்திரங்கள் – சத்யா 

கடந்த ஆண்டு அரசியல் வானில் ஜொலித்த நட்சத்திரங்களை, அவர்களது தகுதி அடிப்படையில் தேர்வுசெய்து அறிவிப்பதில் மகிழ்ச்சி அடைகிறோம். 

சிறந்த நடிகர் 

வழக்கம் போல கடந்த ஆண்டும் அரசியல் நட்சத்திரங்கள் அனைவரும், 
போட்டி போட்டுக்கொண்டு நடித்திருந்தனர். வீரமும் ஈரமும் படத்தில் மூத்த நடிகர் புத்ததேவ் பட்டாச்சார்யா, ரசிகர்களைக் கண்கலங்க வைத்தார். நந்திகிராம மக்களைப் பார்த்து "மரியாதையாக அடங்குகிறீர்களா, இல்லையா?' என்று துப்பாக்கியைத் தூக்கியபடி, வீரமாக அவர் மிரட்டும் காட்சியை மறக்கவே முடியாது. க்ளைமாக்ஸின்போது, திடீரென வீரம் மறைந்து ஈரம் தோன்றி, "நான் உங்களைக் கொல்வேனா? நான் அப்படிப்பட்டவனா?' என்று பிணங்களைப் பார்த்துக் கதறும் காட்சியில், "இவருக்குள் இப்படியொரு நடிப்புத் திறனா?' என்ற வியப்பை ஏற்படுத்தி இருந்தார். 

கடைசி வரை, தானே எப்படியாவது தலைமைப் பொறுப்பில் நீடித்துவிட வேண்டும் என்ற லட்சியம் கொண்ட கதாநாயகனாக, "லட்சியம்' படத்தில் தோன்றியிருந்தார் மன்மோகன் சிங். அதிகாரம் இல்லாத அதிகாரியாக வித்தியாசமான ரோலில், பரிதாபத்தை ஏற்படுத்தும் வகையில் நடித்திருந்தார். குறிப்பாக, புதுமுகம் கனிமொழிக்குச் சால்வை அணிவிக்கும்போது, எந்த ரோல் கொடுத்தாலும் என்ன ஏது என்று கேட்காமல் செய்யக்கூடியவர் என்ற நம்பிக்கையை ஏற்படுத்தியிருந்தார். 



ஆனால், வருடம் முழுவதும் நவரச நடிப்பை வெளிப்படுத்தி, விருதைத் தட்டிக்கொண்டு போகிறவர் கலைஞர்தான். பந்த் – உண்ணாவிரதத்தை மையமாக வைத்து அவரே தயாரித்து இயக்கிய "வீராப்பு' – அவரது நடிப்பாற்றலை நன்கு வெளிப்படுத்தியது. "உண்ணாவிரதம் இருந்து உயிரை விடுவது எங்கள் வழக்கம்தான்' என்று வீராப்பாக உண்ணாவிரதத்தை ஆரம்பிக்கும் கருணாநிதி, நீதிமன்ற எதிர்ப்பு பற்றிய தகவல் கிடைத்ததும், சடாரென்று "உண்ணாவிரதத்தைத் துவக்கிவைத்து, உத்தமர் காந்தி வழியில் பாதியிலேயே விடைபெறுகிறேன்' என்று வெளியேறும் காட்சியில், நயமான நடிப்பை வெளிப்படுத்தியிருந்தார். எனவே, சென்ற ஆண்டின் 
சிறந்த நடிகராகக் கலைஞரைத் தேர்வு செய்கிறோம். 

சிறந்த நடிகை 

"இனிமே நாங்கதான்' என்று முலாயம் சிங் – சந்திரபாபு நாயுடு ஆகியோருடன் இணைந்து பாடியபடி, புதிய வியாபாரத்தைத் தொடங்கும் கதாநாயகி ஜெயலலிதா, பாட்டு முடிந்த கையோடு "போங்கய்யா! நீங்களும் உங்க வியாபாரமும்' – என்று, தானே கடையை மூடும்போது நம்மை அறியாமல் கைதட்டுகிறோம். 

"அம்முவாகிய நான்' படத்திலும் தனது குறும்பான நடிப்பை வெளிப்படுத்த அவர் தவறவில்லை. "உங்களுக்குத்தான் என் ஆதரவு. நம்ம ஆளை ஜனாதிபதி ஆக்குகிறேன்' என்று முலாயம்சிங், சந்திரபாபு நாயுடுவுக்கு உறுதி அளித்து நம்பவைத்து, அவர்கள் அந்தப்பக்கம் போனதும் ஃபோனை எடுத்து, "அவங்க கிடக்கறாங்க. என் உத்திரவை எதிர்பார்க்காம நீங்களாவே செகாவத்தை ஜெயிக்க வையுங்க' என்று தனது ஆட்களுக்கு உத்திரவிடும் காட்சியில், மாறுபட்ட நடிப்பை வெளிப்படுத்தியிருந்தார். 



ஆனால், நடிப்புத் திறனில் ஜெயலலிதாவையும் மிஞ்சி பிரகாசித்தவர் சோனியாதான். "செல்லத் திருடா' படத்தில் க்வாட்ரோக்கி தப்பியோடும் காட்சியில், மன்மோகன் சிங் உட்பட பலரும் பதறித் துடிக்கும்போது, தனக்கு எதுவுமே தெரியாததுபோல அப்பாவியான முகபாவத்தைக் காட்டியபடியே, க்வாட்ரோக்கிக்கு ஆசி தெரிவிக்கிறாரே, அதற்கு ஈடு இணையாக எந்த நடிப்பையும் குறிப்பிட முடியாது. கைதேர்ந்த நடிப்பு. எனவே, சென்ற ஆண்டின் சிறந்த நடிகையாக சோனியாவைத் தேர்ந்தெடுத்துக் கௌரவிக்கிறோம். 

சிறந்த குணச்சித்திர நடிகர் 

"கருப்பசாமி குத்தகைதாரர்' படத்தில், குத்தகைதாரர் கருப்பசாமியாக ஆன்ட்டி ஹீரோ ரோலில் நடித்திருந்தார் குமாரசாமி. "நான் நல்லவனா? கெட்டவனா?' என்று தன்னைச் சந்திப்பவர்களிடம் எல்லாம் கேட்கும் ரோலில் அசத்தி இருந்தார். சக குத்தகைதாரர் எடியூரப்பாவை அடித்துவிட்டு, அணைத்துக் கொள்வதும், பிறகு அணைத்துக்கொண்டே கழுத்தை நெறிக்க முயல்வதும் வித்தியாசமான குணச்சித்திரம். 

"கற்றது தமிழ்' படத்தில், ராமர் பற்றி தான் தமிழில் கற்றதையும், கல்லாததையும் கண்டபடி நினைவுபடுத்திக்கொண்டு, வாய்க்கு வந்தபடி ராமர் பற்றி கூறும் பாத்திரத்தை விரும்பி ஏற்றிருந்தார் கருணாநிதி. கோமாளியா, வில்லனா என்று புரிந்துகொள்ள முடியாத ஒரு மாதிரியான குணசித்திர வேடம். அவருக்கே உரிய முறையில் செய்திருந்தார். 

"காசு இருக்கணும்' படத்தில், சாய்பாபாவிடம் காசு இருப்பதைத் தெரிந்துகொண்டு, அவரை பக்தியுடன் வரவேற்கும் காட்சியில் வித்தியாசமான குணச்சித்திர நடிப்பை வெளிப்படுத்தி இருந்தார் கருணாநிதி. துணை நடிகர்கள் துரைமுருகனும், தயாநிதி மாறனும் மாய மோதிரம் பெற்றுக்கொண்டு, சாய்பாபாவிடம் ஆசிபெறும் காட்சியில், முகத்தில் எந்த உணர்ச்சியையும் வெளிப்படுத்தாமல் அழுத்தமான நடிப்பைக் காட்டியது நயமான நடிப்பு. 

ஆனால், குணச்சித்திர நடிப்பில் நம்மைக் கவர்ந்தவர் மன்மோகன் சிங். லட்சியம் படத்தில், அமெரிக்காவுடன் ஒப்பந்தம் செய்தே தீருவது என்ற லட்சிய வீரனாக சிற்சில காட்சிகளில் திறம்பட நடித்திருந்தார். அவரது லட்சியத்தை முறியடிக்கும் வில்லன்களாக கராத்தும், பரதனும் படம் முழுக்க பற்களை நறநறவென்று கடித்தபடி நடித்திருந்தனர். "லட்சியத்தை நிறைவேற்றாமல் விடமாட்டேன். லட்சியம் நிறைவேறாவிட்டால் குடிமுழுகிவிடாது. தயவுசெய்து என் லட்சியம் நிறைவேற 
உதவுங்கள்' என்று வீரம், சோகம், விரக்தி, கோபம் என பலதரப்பட்ட பாவங்களை திடீர் திடீரென்று வெளிப்படுத்தி, முத்திரை பதித்த மன்மோகன் சிங்கை சிறந்த குணச்சித்திர நடிகராகத் தேர்வு செய்கிறோம். 

சிறந்த நகைச்சுவை நடிகர் 

"வாழ்க்கையை யோசிங்கடா, தலையெழுத்தை நல்லா வாசிங்கடா' என்று "டைட்டில் சாங்'கின்போது, தனது ஆட்களுக்கு தானே உருவாக்கிய பள்ளிக்கூடத்தில் பயிற்சி அளிக்கும் ராமதாஸ், அவர்களை எப்படி உருவாக்குகிறார் என்பதை முழுநீள நகைச்சுவைப் படமான "பள்ளிக்கூடம்' விளக்கி இருந்தது. 

"கருணாநிதியை உருப்படியா எதையும் செய்யவிடாம தடுத்து, அப்புறம் "ஏன் எதையும் செய்யலை?'ன்னு கேக்கறதுதான் நம்ம லட்சியம். இப்படிச் செயல்பட்டா 2011லே நாமதான் ஆட்சிக்கு வருவோம். நாம வரலைன்னாலும் 2011 கண்டிப்பா வரும்' என்று ராமதாஸ் பாடம் நடத்தும்போது, ரசிகர்களின் சிரிப்பில் தியேட்டரே அதிர்ந்தது. நகைச்சுவை நடிப்பில் கொடிகட்டிப் பறந்தார் ராமதாஸ். 

ஆனாலும், மறக்க முடியாத நகைச்சுவைகளை அள்ளி வழங்கியவர் கருணாநிதிதான். "வீராப்பு' படத்தில் தமிழ் மீனவர்கள் தாக்கப்படும் செய்தி தெரிந்ததும், ஹீரோ கருணாநிதி ஆவேசமாக கடலை நோக்கிப் பாயும்போது, மிகப்பெரிய சண்டைக் காட்சியை எதிர்பார்க்கிறோம். பிறகு மீனவர்களைத் தாக்கியது விடுதலைப் புலிகள்தான் என்று தெரிந்ததும், "இப்ப போறேன். திரும்பி... வரமாட்டேன்' என்று ஸ்டைலாகப் பின்வாங்கும் காட்சியில், கருணாநிதி குலுங்கக் குலுங்கச் சிரிக்க வைத்தார். 

"கூட்டு அதிரடிப்படை கண்டிப்பா இருக்கணும். சரி, இருந்தா இருக்கட்டும். நான்தான் வேண்டாம்'னு அப்பவே சொன்னேனே' என்று சீரியஸாக மாற்றி மாற்றி ஹீரோ கருணாநிதி சொல்லும்போது, சிரிக்காதவர்கள் இருக்க முடியாதே. 

எனவே சிறந்த சிரிப்பு நடிகருக்கான விருதும் கருணாநிதிக்கே செல்கிறது.

சிறந்த வில்லன் 

"மதுரை வீரன்' படத்தில் கையில் தீப்பந்தத்தோடு திரியும் வில்லனாக, அழகிரி அமர்க்களமாகச் செய்திருந்தார். போலீஸ் கூட்டம் அழகிரியைப் பார்த்து, மிரண்டு சல்யூட் அடித்தபடி ஓடும்போது, குறுநகை புரிகிறாரே, அதை மறக்க முடியுமா? குலை நடுங்க வைக்கும் வகையில் அட்டகாசமாகச் செய்திருந்தார்

வில்லனாக பல படங்களில் கருணாநிதியும் சோபித்தார். குறிப்பாக "என் உயிரினும் மேலான' படத்தில், கார்ப்பரேஷன் தேர்தல் காட்சியில் "என் உயிரினும் மேலான' என்று அவர் குரல் கொடுத்ததும், திபுதிபுவென்று ஒரு கூட்டம் வரும்போது நடுங்கிப்போகிறோம். தனது ஆட்கள் நடுத்தெருவில் நின்றுகொண்டு, ஓட்டுக்களை பங்கு போட்டுக்கொள்ளும் காட்சியில் வெற்றிப் புன்னகை புரிகிறாரே! யாருக்கு வரும் அந்த ஸ்டைல் வில்லத்தனம்? 

ஆனால் "பொல்லாதவன்' படத்தில் வித்தியாசமான வில்லனாக எல்லோரையும் மிஞ்சிக் காட்டியவர் தேவகௌடாதான். குமாரசாமியை முன்னிறுத்தி அவர் செய்த அட்டூழியங்களை, இதுவரை எந்த அரசியல் திரைப்படத்திலும் எந்த வில்லனும் செய்திருக்கமாட்டார். ஒரு கட்டத்தில் "அப்பா என்னை விட்டுருங்க' என்று குமாரசாமி கதறும்போது, நமக்கே பரிதாபம் ஏற்படுகிறது. க்ளைமாக்ஸில் எல்லோரையும் வீழ்த்திவிட்டு, நடுத்தெருவில் சட்டையைக் கிழித்துக்கொண்டு "வெற்றி வெற்றி' என்று தேவகௌடா கத்துவதோடு படம் முடிகிறது. மறக்க முடியாத வில்லன். எனவே, தேவகௌடாவை சென்ற ஆண்டின் சிறந்த வில்லனாக அறிவிக்கிறோம். 

சிறந்த கதை வசனகர்த்தா 

"வீராசாமி' படத்தில் நீதிபதிகளைத் தாக்கிப் பேசும் ஆற்காடு வீராசாமியின் வீராவேசமான வசனங்களில், கதாசிரியர் கலைஞரின் முத்திரை பளிச்சிட்டது. "பூனைக்கு மணி கட்டிய தம்பி, இனி நமது கருத்தை அறியாமல் தீர்ப்பு வழங்கும் துணிவு எந்த நீதிபதிக்கும் வராது' என்று சவுக்கடி வசனம் பேசும் கருணாநிதிதான், பிரச்சனை முற்றியதும் "இருசாராரும் ஒற்றுமையாகச் செயல்படுவதுதான் நாட்டுக்கு நல்லது' என்ற குறும்பான வசனத்தையும் எழுதியிருந்தார். "அந்தக்காலத்தில் ராஜீவ் என்னிடம் என்ன சொன்னார் தெரியுமா?' என்பது போன்ற ஃப்ளாஷ் பேக் 
காட்சிகளிலும் அவரது கற்பனை திறன் மின்னியது. 



ஆனால் "வசனத்தில் சாதனை புரிந்தவர் ஜெயலலிதாதான். போதும் போதும் என்று நினைக்கும் அளவுக்கு வசன மழையை எல்லா படங்களிலும் பொழிந்திருந்தார். "இனிமே நாங்கதான்' படத்தில் "என் உடலிலும் தமிழ் ரத்தம்தான் ஓடுகிறது. நான் தமிழச்சியடா, தமிழச்சி' என்று பொங்கி எழும்போது, சிலிர்த்துப் போகிறோம். "கருணாநிதி கொடுக்கும் அரிசியைச் சாப்பிட்டால் மாடு செத்துப்போகும். டி.வி. பார்த்தால் பார்வை போய்விடும்' போன்ற வசனங்களை மறக்க முடியுமா? எனவே சிறந்த கதாசிரியர் ஜெயலலிதா என்று அறிவிக்கிறோம். 

சிறந்த டைரக்டர் 

"சாதனை', டைரக்டர் கருணாநிதியின் இயக்கும் திறனை நன்கு வெளிப்படுத்தியது. கதாநாயகன் கருணாநிதி ஒரு போலீஸ் அதிகாரி. சினிமா, டி.வி. பார்ப்பது அவரது பொழுதுபோக்கு. அதைப் பயன்படுத்திக்கொண்டு, ஊரில் மணல் கொள்ளை, அரிசி கடத்தல் போன்ற குற்றங்கள் நடைபெறுகின்றன. அதுபற்றி புகார் கூறுபவர்களிடம், "எனக்குத் தெரியாம இந்த ஊர்லே எதுவும் நடக்காது. இதுக்கு முன்னாலே மட்டும் கடத்தல், கொள்ளை நடக்கலையா? நான் பூணூல் போடாததால்தானே இப்படி எல்லாம் புகார் பண்றீங்க?' என்று போலீஸ் அதிகாரி சீறியதும், புகார் கூறியவர்கள் பயந்து போய் மன்னிப்பு கேட்டுக்கொண்டு வெளியேறிவிடுகிறார்கள். அவரது இந்த சாதனையைப் பாராட்டும் வகையில், அவரது ஊழியர்கள் அவருக்கு பாராட்டு விழா நடத்துகிறார்கள். இதுதான் கதை. படத்தின் ஒவ்வொரு காட்சியிலும் டைரக்டரின் "டச்' பளிச்சிட்டது. அதே படத்தில், ரயில் மறியல் செய்யும் வீரபாண்டி ஆறுமுகத்தை, ஹீரோ கட்டி அணைத்து சால்வை போர்த்திவிட்டு, சற்றுத் தள்ளி மறியல் செய்துகொண்டிருந்த வைகோவைக் கைதுசெய்து, சிறையில் தள்ளும் காட்சியிலும், தனது குறும்பான முத்திரையைப் பதித்திருந்தார் டைரக்டர் கருணாநிதி. 



ஆனால் "நிழல்' படத்தில் டைரக்டர்கள் இரட்டையர்களான கராத் – பரதன் ஆதிக்கம் கொடிகட்டிப் பறந்தது. கதாநாயகன் மன்மோகன் சிங்கை நிழல்போல தொடரும் மேலதிகாரிகளாக டைரக்டர்களே நடித்திருந்தனர். மன்மோகன் சிங்கை சதா சர்வகாலமும் பின்தொடர்ந்து கொண்டு, அவர் எதைச் செய்தாலும் கேள்விகேட்டுத் துளைத்தெடுக்கும் ரோல். 

ஒரு கட்டத்தில் மன்மோகன் சிங், எது எக்கேடு கெட்டால் என்ன என்ற விரக்தி மேலிட்டு, திக்பிரமை பிடித்தவர் போல் நிற்க, "நாடு ஒழிந்தால் மதவாதம் 
ஒழிந்துவிடும்' என்று ஸ்லைடு போட்டு படம் முடிகிறது. 

கராத் – பரதனை சென்ற ஆண்டின் சிறந்த டைரக்டர்களாக தேர்ந்தெடுக்கிறோம். 

சிறந்த படம் 

"வியாபாரி' தயாநிதி மாறன் வியாபார தந்திரமாக எதையோ செய்யப்போக, அது அவரது வியாபாரத்தை எப்படிச் சீரழிக்கிறது என்பதுதான் "வியாபாரி' கதை. கருணாநிதி தனது ஆவேச நடிப்பைக் காட்டி கலங்க அடித்திருந்தார். "தாய்க்குப் பின் தாரம்' என்பதைப் போல, "மகனுக்குப் பின் பேரன்' என்ற தத்துவத்தை விளக்கிய "வியாபாரி' பரவலாகப் பேசப்பட்டது. 

ராமதாஸின் "அடாவடி'யில் ராமதாஸ் மட்டும் எதிரிகளோடு மோதுகிறாரே தவிர, எந்த எதிரியும் ராமதாஸோடு மோதாமல் ஒதுங்கிப்போய் விடுகிறார்கள். வித்தியாசமான மோதல் காட்சிகள் நிறைந்த படம். ராமதாஸ் கருணாநிதியிடம் சரணடைகிறாரா, கருணாநிதி ராமதாஸிடம் சரணடைகிறாரா என்று புரியாதபடி கதையின் போக்கு சென்றாலும், பொழுதுபோக்கு அம்சங்கள் நிறைந்த படமாக இருந்தது. 

கருணாநிதியின் தயாரிப்பில், ஸ்டாலின் ஹீரோவாக நடித்திருந்த "கிரீடம்' பிரம்மாண்டமான பொருட்செலவில் எடுக்கப்பட்டிருந்தது. என்னவோ நடக்கப்போகிறது என்ற வகையில் "பில்ட் அப்' செய்துகொண்டு போய், "என்ன நடக்கிறது என்பதை விரைவில் பார்ப்போம்' என்ற கருணாநிதியின் அறிவிப்புடன் படம் முடிகிறது. கிரீடத்தை அடிக்கடி "க்ளோஸ்அப்'பில் காட்டுகிறார்கள். என்ன அர்த்தம் என்று புரியவில்லை. 

உருப்படியான கருத்து எதுவும் இல்லாவிட்டாலும், கதையை ஆர்ப்பாட்டமாகச் சொன்ன விதத்தைப் பாராட்டலாம். கௌரவ நடிகராக அழகிரி கதையோடு ஒட்டாமல் ஒரே ஒரு காட்சியில் தலைகாட்டிவிட்டுப் போவது மர்மத்தைக் கூட்டியது. எதிர்பார்த்த அளவு ஓடாவிட்டாலும், வசூலை அள்ளிக் குவித்த படம் என்பதால், "கிரீடம்'தான் சிறந்த படம் என தேர்ந்தெடுக்கிறோம். 

திராவிட மாயை ஒரு பார்வை.