மதுரை தமிழ்ச் சங்கத்தில், பளிங்குக் கல்லில் தமிழ் அன்னை சிலை வைப்பதற்காக, இத்தாலி நாட்டு சிலையை மாதிரியாகக் கொடுத்திருக்கிறது தமிழக அரசு. இது தமிழறிஞர்கள் மத்தியில் பல்வேறு சர்ச்சைகளை உருவாக்கியிருக்கிறது.

மதுரை தமிழ்ச்சங்க வளாகத்தில் தமிழ் அன்னைக்குச் சிலைவைக்க முடிவுசெய்து, அதற்கான ஒப்பந்தப் புள்ளியைக் கோரியிருக் கிறது, தமிழ்நாடு கைவினை பொருட்கள் மேம்பாட்டு வளர்ச்சித் துறையின் கீழ் செயல்படும் பூம்புகார் நிறுவனம். அந்த அறிவிப்பில், ‘தமிழ் அன்னைக்குப் பளிங்குக் கற்கள், ஃபைபர் போன்றவற்றிலும் வேதகால முறைப்படியும் சிலைசெய்யலாம்’ என்று தெரிவிக்கப்பட்டுள்ளது. இதனால், ‘கல் சிற்பங்களுக்குப் பெயர்போன தமிழ்நாட்டில், தமிழ் அன்னைக்குப் பளிங்கிலும் ஃபைபரிலும் சிலையா?’ என்று கொதித்துப்போய்க் கேட்கிறார்கள், தமிழகச் சிற்பக் கலைஞர்கள் மற்றும் தமிழ் ஆர்வலர்கள்.

இதுகுறித்து நம்மிடம் பேசிய மாமல்லபுரம் சிற்பி மகாதேவன், “தமிழ் அன்னைக்கு அமைக்கப்படவுள்ள சிலை குறித்த அறிக்கையில், ‘பளிங்கு, பளிங்கு போன்ற பொருள், கருங்கல், கருங்கல் போன்ற பொருள், உலோகம், உலோகம் போன்ற பொருள், ஃபைபர், கண்ணாடி போன்ற பொருள்களில் சிலைசெய்ய வேண்டும். வேதகால முறைப் படி சிலைகள் இருக்கலாம்’ என்று சொல்லியிருக்கிறார்கள். தமிழகத்தில் உள்ள தொன்மையான கோயில்கள், நினைவுச் சின்னங்கள் போன்றவை தமிழர்களின் பண்பாட்டை உலக அளவில் பறை சாற்றி வருகின்றன. இன்றளவும் தமிழக சிற்பிகள் கடல் கடந்து சென்று சிலைசெய்து வருகிறார்கள். ஆகம விதிகளின்படியும் சிற்ப சாஸ்திரங்களின் படியும் சிலைசெய்யும் சிற்பிகள் தமிழகத்தில் கிட்டத்தட்ட பத்து லட்சம் பேர் இருக்கிறார்கள். மாமல்லபுரத்துக்குச் சிற்பக்கலைக்கான யுனெஸ்கோவின் புவிசார் குறியீடு கிடைத்துள்ளது. ஆனால் பளிங்கு, ஃபைபர், கண்ணாடி போன்றவற்றில் சிலைசெய்யும் சிற்பிகள் தமிழகத்தில் இல்லை. வேறு மாநிலங்களில்தான் இருக்கிறார்கள். அப்படி இருக்கும்போது அத்தகைய பொருள்களில் சிலைசெய்யலாம் என்று அரசு தரப்பில் சொல்லியிருப்பது, தமிழகச் சிற்பிகளை அவமதிக்கும் செயல். தமிழ் அன்னை சிலையைத் தமிழர்கள்தான் வடிக்க வேண்டும். அதுவும் கல்லில்தான் வடிக்க வேண்டும். அப்போதுதான் அது உணர்வுபூர்வமான சிலையாக இருக்கும்” என்றார்.

தேசிய விருதுபெற்ற உலோகச் சிற்பியான ரவீந்திரன், “பூம்புகார் நிறுவனம் தனது அறிக்கை யில் சொல்லியிருக்கும் மாடல் இத்தாலி நாட்டின் ‘ட்ரிவி ஃபவுன்டன்’ பாணியிலான சிலையாகும். தமிழர்களின் வரலாறு, கட்டடக்கலை, சிற்பக் கலை ஆகியவை தொன்மையானவை. எனவே, அன்னிய தேசப் பெண்ணின் மாதிரி பிம்பத்தைக்கொண்டு தமிழ் அன்னைக்கு உருவம் கொடுப்பது சரியானது அல்ல. திராவிடக் கட்டடக் கலையைப் பின்பற்றியே தமிழ் அன்னைக்குச் சிலை வடிக்க வேண்டும்” என்றார்.

மாமல்லபுரம் சிற்பக் கல்லூரியில் பயின்ற மு.சந்திர சேகரன், “மரபு சார்ந்த கட்டடங்களைப் பாதுகாப்பது, உயிர்ப்பிப்பது, அழிந்த கலைகளை மீட்டெடுப்பது ஆகிய பணிகளை மாமல்லபுரம் சிற்பக்கலைக் கல்லூரி செய்துவருகிறது. வள்ளுவர் கோட்டம், பூம்புகார் கண்ணகி கோட்டம், தஞ்சைப் பல்கலைக்கழகப் பணிகள் என்று தமிழகத்தில் நிறைய பணிகளையும் மாமல்லபுரம் சிற்பக்கலைக் கல்லூரி செய்து கொடுத்துள்ளது. இலங்கையில் திருக்கேதீஸ்வரம் திருப்பணிகள் உட்படப் பல திருப்பணிகளை வெளிநாடுகளில் மேற் கொண்டுள்ளது, சிற்பக்கலைக் கல்லூரி. அதனால், தமிழ் அன்னைக்குச் சிலைசெய்யும் பணியில் மாமல்லபுரம் சிற்பக் கல்லூரியையும் ஈடுபடுத்த வேண்டும்.

‘வேதகால பிராமண முறைப்படி’  (Vedic Brahminism) என ஒப்பந்தப் புள்ளியில் குறிப்பிட்டுள் ளார்கள். மொழியில் தனித்துவம் வாய்ந்தது தமிழ். தமிழ் இலக்கியங்கள் இன்றும் அதற்குச் சாட்சியாக இருக்கின்றன. பல மொழிகளைக்கொண்ட குழுமம்தான் திராவிடம். அந்தக் குழுமத்தின் தாய்தான் தமிழ். அப்படி இருக்கையில், ‘வேதகால பிராமண முறைப்படி தமிழ் அன்னைக்குச் சிலை செய்யவேண்டும்’ என்று அரசாங்கம் கூறியிருப்பது, தமிழ் மரபுக்கு எதிரானது. இதை அந்தத் தமிழ்த்தாயே மன்னிக்க மாட்டார்’’ என்று காட்டமாகச் சொன்னார்.

தேசிய விருதுபெற்ற உலோகச் சிற்பியான ஈரோடு ராதாகிருஷ்ணன், “தமிழகத்தில் உள்ள சங்கராபுரம், பட்டிமலைக்குப்பம், சிறுதாமூர், கரடிமலை போன்ற இடங்களில் கிடைக்கும் கற்களில் செய்யப்படும் சிலைகள்தான் உலகம் முழுவதும் ஏற்றுமதி செய்யப்படுகின்றன. தமிழ் அன்னை சிலையைத் தமிழகச் சிற்பிகள் மூலம் தமிழகத்தில் கிடைக்கும் கற்களில் வடிப்பதுதான் முறை” என்கிறார்.

இதுகுறித்து தமிழ்ப் பண்பாட்டுத்துறை அமைச்சர் மாஃபா பாண்டியராஜனிடம் பேசினோம். “இரண்டாயிரம் ஆண்டுகளுக்கு முன்பே தமிழர்களுக்கு ரோமானியர்களுடன் தொடர்பு ஏற்பட்டிருக்கிறது. எனவே, பளிங்கு சிலை தமிழ் கலாசாரம் இல்லை என்று சொல்வது தவறு. பல்வேறு தமிழ் இலக்கியங்களில் ‘பளிங்குக் கல்’ குறிப்பிடப்பட்டிருக்கிறது. பளிங்கும் நமது புராதனமே. பிற்காலத்தில் ஆண்ட சோழர், பாண்டியர் காலங்களில்தான் கருங்கல் சிற்பங்கள் ஆதிக்கம் செலுத்தத் தொடங்கி இருக்கின்றன. தமிழக அரசு சார்பில் உருவாக்கப்பட்ட குழு, உலகம் முழுவதும் உள்ள முக்கியமான பண்பாட்டு மையங்களைப் பார்வையிட்டு ஆலோசித்துத்தான், தமிழ் அன்னை சிலைக்கு மாதிரியாக இத்தாலி சிலையை தேர்வு செய்தது. தமிழகத்திலும் பாபநாசம் போன்ற பகுதிகளில் பளிங்குக் கற்களில் சிற்பங்கள் செய்பவர்கள் இருக் கிறார்கள்” என்றார்.

வைக்கப்பட இருப்பது தமிழ்த்தாய்க்கு சிலை. அதைத் தமிழ் மரபுப்படி வைக்கவேண்டும்... தமிழகத்தின் தொன்மை மாறாமலும், தமிழின் பெருமையைப் போற்றும் வகையிலும் வைக்கவேண்டும் என்பதுதான் பலருடைய எதிர்பார்ப்பாக இருக் கிறது. ‘தமிழக அரசு’ என்று போர்டு மாட்டிக் கொண்டிருப்பவர்களுக்கு இதைச் செய்வதில் என்ன கஷ்டம் என்பதுதான் தெரியவில்லை. 

- பா.ஜெயவேல்
படங்கள்: சி.ரவிக்குமார்