New Indian-Chennai News + more

வியூகம் வகுக்கிறார் வீரபாண்டியார்! 

கொலை வழக்கில் வீரபாண்டியாரின் தம்பி மகனான பாரப்பட்டி சுரேஷ் கைதானதை அடுத்து... ‘எனக்கு எதிராக கட்சியில் சதி நடக்கிறது’ என வெளிப்படையாக பேசினார் அமைச்சர் வீரபாண்டி ஆறுமுகம். இதற்கு தி.மு.க. தலைமையிடமிருந்து பெரிதாக எந்த ரியாக்ஷனும் வராத நிலையில்... 

‘வீரபாண்டியாரும் தலைமையைப் புறக்கணிக்க ஆரம்பித்துவிட்டார்’ என்ற குரல்கள் சேலத்தில் பலமாக ஒலிக்க ஆரம்பித்துள்ளன. இதற்கு சாட்சி சொல்லும் வகையில் சில காட்சிகளும் நடந்துவிட்டன. 

கிருஷ்ணகிரி மாவட்ட சுற்றுப் பயணத்தை முடித்துவிட்டு நவம்பர் 13&ம் தேதி இரவு சேலம் வழியாக ஈரோடு சென்றார் துணை முதல்வர் மு.க.ஸ்டாலின். அப்போது, சேலம் மாவட்ட எல்லையில் ஸ்டாலினுக்கு தடபுடல் வரவேற்பு அளித்தார் பனமரத்துபட்டி எம்.எல்.ஏ. ராஜேந்திரன். (இவரைத்தான் தலைமை தனக்கு எதிராக தயார்படுத்துவதாக மறைமுகமாக குற்றம் சாட்டியிருந்தார் வீரபாண்டியார்.)

எப்போதுமே ஸ்டாலினுக்கு சேலத்து எல்லையில் வரவேற்பு என்றால் தனது மகன் வீரபாண்டி ராஜா எம்.எல்.ஏ. மூலமாக ஜாம், ஜாம் என்று ஏற்பாடுகள் செய்வார் வீரபாண்டியார். இந்த தடவை வரவேற்பு ‘மிஸ்ஸிங்’ ஆனதால் ஸ்டாலின் மீது இருக்கும் கோபத்தால்தான் வரவேற்க போகவில்லை என்ற ரீதியில் சேலம் மாவட்ட தி.மு.க.வில் சர்ச்சைகள் கச்சை கட்டி நிற்கின்றன.

இது பற்றி வீரபாண்டியாருக்கு நெருக்கமாக உள்ள தி.மு.க. புள்ளிகள் சிலரிடம் பேசினோம். 

‘‘தனது தம்பி மகன் கைது செய்யப்பட்ட போதுகூட அமைச்சர் கொஞ்சம் அமைதியாகத்தான் இருந்தார். ஆனால் முன்னாள் எம்.எல்.ஏ. உட்பட, தனக்கு நெருக்கமாக இருக்கும் கட்சி ஆட்கள் பக்கம் சி.பி.சி.ஐ.டி. போலீஸார் பார்வையை திருப்பியதும் ரொம்பவே கோபமாகிவிட்டார். 

தனக்கு நெருக்கமானவர்களையே இந்த வழக்கில் சிக்க வைக்க யார் திட்டமிடுகிறார்கள் என்பதுதான் வீரபாண்டியாருக்கு சந்தேகத்தை ஏற்படுத்திவிட்டது. தன் கட்சியில், தன் மாவட்டத்திலேயே இருப்பவர்கள்தான் இப்படி செய்கிறார்கள், அவர்களுக்கு ஸ்டாலின் ஆதரவு ரொம்பவே இருக்கிறது என்று தெரிந்ததும்தான் கோபமாக பத்திரிகைக்கு பேட்டி கொடுத்தார்.

தன் பேட்டியைப் படித்துவிட்டாவது கலைஞர் தன்னிடம் பேசுவார் என்று எதிர்பார்த்த வீர-பாண்டியாரிடம் கலைஞர், ஸ்டாலின் யாரும் பேசவில்லை. இதனால் கோபம் அதிகமாகிப் போன வீரபாண்டியார், தன் துறை நிகழ்ச்சியான ஈரோடு மஞ்சள் வணிக வளாக அடிக்கல் நாட்டு விழாவையும் புறக்கணித்துவிட்டார். தனது அடுத்த வியூகம் பற்றியும் நெருக்கமான நண்பர்களிடம் ஆலோசித்து வருகிறார்’’ என்றார்கள் வருத்தமாக.

ராஜா ஆதரவாளர்களோ, ‘‘சட்டமன்றம் 12&ம் தேதி முடிந்து வீரபாண்டியாரும் ராஜாவும் மறுநாள் சேலத்துக்கு வர தாமதமானதால்தான் துணை முதல்வரை வரவேற்க செல்லவில்லை. மேலும் சத்தியமங்கலத்தில் துணைமுதல்வர் கலந்துகொண்ட பொதுக் கூட்டத்துக்கு ராஜா போனார். தன் அப்பாவின் வருத்-தங்களை ஸ்டாலினிடம் சொல்லிவிட்டு வந்திருக்கிறார்’’ என்கிறார்கள். 

இதற்கிடையில்... பாரப்பட்டி சுரேஷ் கைதான கொலை வழக்கில் ஆஜராகி வரும் அரசு வக்கீல் தம்பி-துரைக்கும், சேலம் பி.ஜே.பி. வழக்-கறிஞரான மணிகண்டனுக்கும் கடிதம், போன் மூலம் கொலை மிரட்டல்கள் வந்திருக்கின்றன. இதனால், விவகாரம் மேலும் சூடாகிக் கொண்டே செல்கிறது. 

கல்லூரிக்கு மனைவி பெயரா?
ராமதாஸை எதிர்க்கும் வன்னிய தலைவர்கள்!
பதிலடி தரும் பா.ம.க.

வன்னியர்களிடமெல்லாம் வசூலித்து உருவாக்கிய அறக்கட்டளையின் பெயரால் நடத்தப்படும் கல்லூரிக்கு மனைவியின் பெயரைச் சூட்டலாமா?’ - என்று ராமதாஸுக்கு எதிராக கிளம்பியிருக்கிறார்கள், வன்னியர் இனத்துப் பிரமுகர்கள் பலரும். டாக்டர் ராமதாஸ், சில ஆண்டுகளுக்கு முன்பாக ‘வன்னியர் கல்வி அறக்கட்டளை’ ஒன்றைத் தொடங்கினார். இதன் அறங்காவலர்களாக ஜி.கே.மணி, காடுவெட்டி குரு, எம்.எல்.ஏ.க்கள் சுந்தரராஜன், கோபால், மற்றும் முன்னாள் எம்.எல்.ஏ.வான கோவிந்தசாமி ஆகியோரை நியமித்தார்.

இந்த அறக்கட்டளைக்காக திண்டிவனத்திலிருந்து சென்னை செல்லும் சாலையில் கோனேரிக்குப்பம் என்ற இடத்தில் 250 ஏக்கர் நிலம் வாங்கப்பட்டது.

முதல்கட்டமாக கலை மற்றும் அறிவியல் கல்லூரியை தொடங்குவது என முடிவெடுக்கப்பட்டு, அதற்கான ஏற்பாடுகள் நடந்தது.

கலைஞரை அழைத்து வந்து கல்லூரிக்கான அடிக்கல் நாட்டுவிழா நடத்தப்பட்டது. கட்டடம் கட்டி முடிக்கப்பட்டு, அறக்கட்டளை சார்பில் கல்லூரி திறக்கப்பட்டது. அந்த கல்லூரிக்கு சரஸ்வதி கலை மற்றும் அறிவியல் கல்லூரி என்று பெயர் சூட்டப்பட்டது. அப்போதே, இதற்கு கடுமை-யான எதிர்ப்பு தெரிவித்தார்கள் வன்னிய இனப் பிரமுகர்கள்.

அடுத்தகட்டமாக, பொறியியல் மற்றும் தொழில்நுட்பக் கல்லூரி ஆரம்பிக்கும் முயற்சியில் இறங்கினார். அதற்கான அனுமதி அரசிடமிருந்து சமீபத்தில் கிடைத்துவிட, புதிய கல்லூரியை கடந்த அக். 20&ம் தேதி கவர்னர் பர்னாலாவை வைத்து ஆரம்பித்து விட்டார் டாக்டர் ராமதாஸ். 

புதிதாக ஆரம்பிக்கப்பட்டிருக்கும் பொறியியல் மற்றும் தொழில்நுட்பக் கல்லூரிக்கும் மனைவி சரஸ்வதி பெயரையே சூட்ட... ராமதாஸுக்கு எதிராக கொதித்து கிளம்பியிருக்கிறார்கள், முன்பே எதிர்ப்பு காட்டியவர்கள். ராமதாஸுக்கு எதிராக கொந்தளித்துக் கொண்டிருக்கும் திண்டிவனம் பகுதி வன்னியர் சங்க நிர்வாகிகள் சிலர் நம்மிடம், “1980-ம் ஆண்டு 28 சங்கங்களை ஒன்றிணைத்து தொடங்கப்பட்டதுதான் வன்னியர் சங்கம். தன்னுடைய அரசியல் வாழ்க்கைக்கான அடித்-தள-மாக இதைத்தான் வைத்துக் கொண்டார் ராமதாஸ். ஆனால், அரசியல் மூலம் அதிகாரத்தைக் கையில் எடுத்ததும், சங்கத்தை சுத்தமாக மறந்தார். 

இப்பவும் அப்படித்தான் செய்கிறார். அரசியல் ரீதியாக பலவீனமாக இருக்கிறோம் என்றதும், வன்னியர் கல்வி அறக்கட்டளை ஒன்றை ஆரம்-பித்திருக்கிறார். அதன் துவக்க விழாவுக்கே வன்னியர்-களுக்காக பாடுபட்டு வரும் தலைவர்கள் யாரையும் அழைக்க-வில்லை.

வன்னியர் அறக்கட்டளை என்ற பெயரில் வன்னியர்களிடம் வசூல் நடத்தி நிதி சேகரித்த ராமதாஸ், அறக்கட்டளை பெயரில் நடத்தப்படும் கல்லூரிகளுக்கு மனைவி பெயரைச் சூட்டியது தவறான செயல்’’ என்று ஆதங்கத்தைக் கொட்டினார்கள். வன்னியர் சங்கம் வளர பணியாற்றியவர்களில் முக்கியமானவரான தீரன் நம்மிடம் பேசும்போது,

“சிதம்பரத்தில் உள்ள வன்னியர் வளர்ச்சிக் கழகத்திற்குச் சொந்தமான இடத்தை அறக்-கட்டளை என்ற பெயரில் தனது மகன் பெயருக்கு மாற்றிக் கொண்டுவிட்டார் ராமதாஸ். வன்னியர் குல சத்ரிய மகாசங்கத்திற்குச் சொந்தமான சென்னை, புரசைவாக்கம் குட்டித் தெருவில் உள்ள இடத்தையும் அபகரித்து விட்டார்கள். தர்மபுரியிலும் ஒரு இடத்தையும் தங்களுடையதாக்கி விட்டார்கள். அறக்கட்டளை சார்-பாக அமைக்கப்பட்டிருக்கும் கல்வி நிறுவனத்துக்கு மனைவி பெயரை ஏன் சூட்டியிருக்கிறார் ராமதாஸ்? வன்னியர் பொதுச் சொத்து நல வாரியத்தை அமைத்துவிட்டால், அறக்கட்டளை நிர்வாகிகளையே மாற்றலாம். அதற்-காகத்தான் முயன்று வருகிறேன்...’’ என்றார். 

வன்னியர் சங்க முன்னாள் நிர்வாகி சி.என்.ராமமூர்த்தி, “வன்னியர் சங்கத்தை எதிர்த்த-வர்கள் தான் இந்த சரஸ்வதி அம்மையாரும், அன்புமணியும். 21 வன்னியர்கள் உயிரைக் கொடுத்து வன்னியர் சங்கத்தை உருவாக்கினார்கள். அவர்களைக் கௌரவப்படுத்த வேண்டும் என்று எண்ணியிருந்தால், அறக்கட்டளை சார்பாக அமைக்கப்பட்டிருக்கும் கல்லூரிக்கு, ‘சமூகநீதி போராட்ட தியாகிகள் நினைவுக் கல்லூரி’ என்று பெயர் வைத்திருக்கலாமே?’’ என்றார்.

அடுத்து வன்னியர் சங்கத் தலைவர் ஏ.கே. நடராஜன் பேசும்போது, ‘‘ஆளவந்தான் அறக்-கட்டளை என்று ஒன்று உள்ளது. ஆயிரம் வேலி நிலங்களை வன்னியர்களுக்காக ஆளவந்தான் என்பவர் அறக்கட்டளைக்கு கொடுத்தார். ‘என் ஆயுட்காலம் வரை இந்த நிலங்களை ஒரு வாட்ச்மேனாக இருந்து காவல் காக்க நினைக்கிறேன்’ என்று கூறினார். அவர் எங்கே? அறக்கட்டளை கல்வி நிறுவனத்துக்கு தனது மனைவி பெயரை வைக்கும் ராமதாஸ் எங்கே?” என்றார். 

பாட்டாளி முன்னேற்றக்கழக தலைவர் பு.தா.இளங்கோவனிடம் பேசுகையில்,

“பணத்துக்காகவே எதையும் செய்யும் ராமதாஸ் குடும்பம், வன்னிய இனத்துக்காக எதையும் செய்ததில்லை. இந்த அறக்கட்டளையும் அப்படித்தான்...’’ என்றார்.

பாட்டாளி மக்கள் கட்சி முன்னாள் எம்.பி.யும், அறக்கட்டளையின் உறுப்பினருமான தன்ராஜிடம் இக்குற்றச்சாட்டுக்கள் குறித்து கேட்டபோது, ‘‘அறக்கட்டளைக்கான இடங்கள் அனைத்தையும் வாங்கியதில் பெரும்பங்கு சரஸ்வதி அம்மையாருக்கு உண்டு. முதலில், ‘கல்விக் கோயில்’ என்றுதான் பெயரிடப்பட்டது. கல்விக்கு கடவுள் சரஸ்வதி என்பதாலும், இதை நிறுவதற்காகப் பாடுபட்ட அம்மையாரையும் சேர்த்து குறிக்கும் வகையில்தான் சரஸ்வதி என்று கல்லூரிகளுக்கு பெயரிடப்பட்டது. மற்றபடி, இதில் உள்நோக்கம் எதுவும் இல்லை.

டாக்டர் ஐயாவின் குடும்பத்தினரோ, பா.ம.க.-வினரோ வன்னியர் சங்கத்துக்கு எதிராகச் செயல்பட்டதில்லை. வன்னியர்கள் சொத்துக்களை வளைக்கப் பார்க்கிறார்கள் என்ற குற்றச்சாட்டை மனசாட்சியுள்ள எந்த வன்னியரும் ஏற்க மாட்டார்கள். கல்விக் கோயில் சிறப்பாக செயல்பட, இப்படி குற்றம்சாட்டுபவர்களும் பங்கெடுத்துக் கொள்ளலாம். தடை-யில்லை’’ என்றார்.

‘‘காமராஜர் சிலை அனுமதிக்கு லஞ்சம் கேட்ட 
காங்கிரஸ் மாநகராட்சி!’’
திருச்சி அவலம்

தமிழகத்தில் காமராஜர் ஆட்சி அமைப்போம்’’ என்று மூச்சுக்கு முன்னூறு முறை முழங்கும் காங்கிரஸ்காரர்கள் மீதே... ‘‘காமராஜர் சிலையை திறக்க தடையாக இருக்கிறார்கள்’’ என ‘திடுக்’ புகார் கிளம்பியிருக்கிறது திருச்சியில். 

அதுவும், காங்கிரஸ் வசம் உள்ள திருச்சி மாநகராட்சிக்கு சொந்தமான இடத்தில் காமராஜர் சிலை வைக்க அனுமதி மறுக்கப்பட்ட விஷயம், காமராஜர் விசுவாசிகளிடையே கொந்தளிப்பை ஏற்படுத்தியிருக்கிறது. 

காமராஜர் சிலை வைக்க அனுமதி கேட்டு மறுக்கப்பட்டவரான ஐக்கிய ஜனதா தளம் கட்சியின் திருச்சி புறநகர் மாவட்டத் தலைவர் வையாபுரியிடம் பேசினோம். 

‘‘திருச்சி மாநகராட்சி அரியமங்கலம் கோட்டத்தில் உள்ள பாலக்கரை மேம்பாலத்தின் கீழ் பகுதியில் பெருந்தலைவரின் 6 அடி உயர முழு உருவ வெண்கல சிலை வைக்க அனுமதி கேட்டு கடந்த ஆண்டு ஆகஸ்ட் மாதம் மாநகராட்சி ஆணையர் மற்றும் கலெக்டருக்கு விண்ணப்பித்தோம். எங்கள் விண்ணப்பத்தை ஏற்று, காமராஜர் பிறந்த தினத்தன்றே சிலை திறக்க ஏதுவாக, உடனடியாக அனுமதி வழங்கும்படி கடந்த ஆண்டு செப்டம்பர் மாதமே மாநகராட்சிக்கு உத்தரவிட்டார் கலெக்டர். ஆனால், மாநகராட்சியின் அரியமங்கலம் கோட்ட செயற்-பொறியாளர் ஜெயக்குமாரோ, காமராஜர் சிலைக்கு அனுமதி தரும் தீர்மானத்தை மாமன்றக் கூட்டத்தில் வைக்கவே இல்லை. இதைவிடக் கொடுமையாக அந்த தீர்மானத்தை மாமன்றத்தில் வைப்பதற்கு 10ஆயிரம் ரூபாய் லஞ்சமாகக் கேட்டார். இந்த பிரச்னையை மாநகராட்சி ஆணையர், மேயர் என பலரிடமும் எடுத்துச் சென்றும் யாரும் செவி கொடுக்கவே இல்லை. 

இதே நேரம், அரியமங்கலம் கோட்ட தலைவரான மாநகர் மாவட்ட காங்கிரஸ் கமிட்டி தலைவர் ஜெரோம் ஆரோக்கியராஜ், ‘காமராஜர் சிலை வைக்க காங்கிரஸ்காரர்களை தவிர வேறு யாருக்கும் உரிமை இல்லை’ என்று மாமன்றத்தில் பேசுகிறார். காமராஜர் இறக்கும்போது காங்கிரஸ் கட்சியிலேயே இல்லை என்ற உண்மையெல்லாம் அவருக்குத் தெரியாது. 

காங்கிரஸ் ஆளும் திருச்சி மாநகராட்சியில் இந்த நிலை காமராஜருக்கு மட்டுமல்ல... ஜவஹர்லால் நேரு சிலை வைப்பதற்காக 2008&-ம் ஆண்டு செப்டம்பர் மாதம் அனுமதி பெற்ற காங்கிரஸ்-காரர் ஒருவர் இன்னமும் சிலை அமைக்க-வில்லை. நாங்கள் யாரிடமும் எந்த வசூலும் செய்யாமல் காமராஜர் சிலை வைக்க விரும்புகிறோம். ஆனால், காங்கிரஸ் ஆளும் மாநகராட்சியில் காமராஜர் சிலை வைக்கவே பத்தாயிரம் ரூபாய் லஞ்சம் கேட்கிறார்கள். இவர்கள் எல்லாம் காமராஜர் ஆட்சி அமைத்துவிட்டால் என்ன ஆகுமோ?’’ என்று வேதனையில் வெடித்தார். 

இது குறித்து மாநகர் மாவட்ட காங்கிரஸ் கமிட்டி தலைவரும் அரிய-மங்கலம் கோட்ட தலைவருமான ஜெரோம் ஆரோக்கியராஜிடம் பேசினோம்.

‘‘காமராஜருக்கு என்று ஒரு மரியாதை இருக்கிறது. அதற்கு குந்தகம் ஏற்படும் அளவில் சிறிய சிலைகள் வைக்க அனுமதிக்க மாட்டோம். மேலும் காமராஜர் சிலை வைக்க காங்கிரஸ் கட்சிக்கு மட்டும்தான் உரிமை இருக்கிறது” என்றார் விநோதமாக. 

சிலை அமைக்க அனுமதி தர லஞ்சம் கேட்டதாக குற்றம் சாட்டப்படும் அரியமங்கலம் கோட்ட உதவி செயற்பொறியாளர் ஜெயக்குமாரிடம் பேசினோம். 

‘‘போலீஸ் அனுமதி மற்றும் நெடுஞ்சாலைத்துறை அனுமதி பெற்றுத் தரவில்லை. அதனால் அனுமதி கொடுக்கவில்லை. இதில் வேறு எதுவும் நடக்கவில்லை’’ என்றார்.

இதுகுறித்து நாம் விசாரித்தபோது, ‘‘மாநக-ராட்சியின் அனுமதிக்குப் பிறகுதான் போலீஸ் மற்றும் நெடுஞ்சாலைத்துறை அனுமதி பெற முடியும்’’ என்கிறார்கள் சம்பந்தப்பட்ட அரசுத்துறை வட்டாரங்களில். 

இந்த சர்ச்சை குறித்து காங்கிரஸ் கட்சியைச் சேர்ந்த திருச்சி மாநகராட்சியின் மேயர் சுஜாதா-விடம் கேட்ட போது, ‘‘இந்த பிரச்னைக் குறித்து எனக்கு எதுவும் தெரியாது. கமிஷனரிடம் கேட்டுக்-கொள்ளுங்கள்” என்று நழுவிக் கொண்டார்.

மாநகராட்சி கமிஷனர் பால்சாமியிடம் பேசினோம்.

‘‘அந்த இடம் குறித்து ஆய்வு செய்த அதிகாரிகள் போக்கு-வரத்துக்கு இடையூறான இடம் என்று கூறினார்கள். இதையடுத்தே அந்த இடத்தில் சிலை வைக்க அனுமதிக்க முடியாது என்று தெரிவித்து உள்ளோம்” என்றார். 

சிலை வைக்க விண்ணப்பித்த வையாபுரியை மீண்டும் நாம் தொடர்பு கொண்டு கேட்டபோது, ‘‘பாலக்கரை மேம்பாலத்தின் கீழ் பகுதியில் போக்குவரத்துக்கு இடைஞ்சல் இல்லாத ஒரு மூலைப் பகுதியில் பெருந்தலைவரின் சிலை வைக்கவே விண்ணப்பித்தோம். ஆனால் கமிஷனர் பொய் சொல்கிறார். இந்த நிமிடம் வரை அனுமதி மறுக்கப்பட்டதாக எனக்கு எந்தக் கடிதமும் வரவில்லை’’ என்றார்.

காமராஜர் சிலை வைக்கும் விஷயத்தில் காங்கிரஸ் கட்சியின் மேயர், கோட்டத் தலைவர், உதவி செயற்பொறியாளர், கமிஷனர் என ஆளாளுக்கு ஒன்று கூறுவதில் இருந்தே , இதில் ஏதோ உள் குத்து இருக்கிறது என்பது தெளிவாக தெரிகிறது. ராதாபுரத்தில் பேருந்து நிலையத்துக்கு காமராஜர் பெயர் வைக்கக் கோரி காங்கிரசார் உண்ணாவிரதம் இருந்து சாதித்தனர். திருச்சியிலோ காமராஜர் சிலை வைக்கக் கூடாது என்று காங்கிரஸ் கட்சியினரே உண்ணாவிரதம் இருப்பார்கள் போலிருக்கிறது

ராஜா ரீ - என்ட்ரி:
முகம் சுளித்தாரா முத்துசாமி?

திண்ணை ஒன்று மட்டும் இருக்க... அண்ணன்களோ இரண்டு பேர். பாவம் என்ன செய்யும் ஈரோடு தி.மு.க.?

சமீபத்தில் அ.தி.மு.க.விலிருந்து மிகப்பெரும் படையோடு தி.மு.க.வுக்கு வந்த முத்துசாமி, ஈரோடு மாவட்டச் செயலாளர் பதவி தனக்குக் கிடைக்கும் என நினைத்தார். ஆனால், சர்ச்சைகளில் சிக்கிய முன்னாள் அமைச்சர் ராஜாவையே இப்போது மீண்டும் மாவட்டச் செயலாளர் ஆக்கிவிட்டது அறிவாலயம்.

முத்துசாமி ஆதரவாளர்கள் மூடு அவுட் ஆகிவிடக் கூடாது என்பதற்காக... அவருக்கு கட்சியின் உயர்நிலை செயல் திட்டக் குழு உறுப்பினர் என்ற பதவி கொடுக்கப்பட்டிருக்கிறது. 

இதுபற்றி முத்துசாமி தரப்பினரிடம் பேசினோம்.

‘‘நில மோசடி, அடிதடி எனப் பல வழக்குகளில் சிக்கி சிறை சென்று ஈரோடு மாவட்டத்தில் தி.மு.க.வின் பெயரை கெடுத்து வைத்திருந்தார் முன்னாள் அமைச்சர் என்.கே.கே.பி.ராஜா. அந்தநிலையில்தான்... அ.தி.மு.க.வில் எம்.ஜி.ஆரால் மதிக்கப்பட்ட முத்துசாமி ஆயிரக்கணக்கான ஆதரவாளர்களோடு தி.மு.க.வில் இணைந்தார். ராஜாவால் இழந்த கட்சியின் பெருமையை மீட்கும் வகையில் முத்துசாமிக்கு கட்சியில் மாநில அளவிலான பதவி, அல்லது மாவட்டச் செயலாளர் பதவி வழங்கப்படும் என்ற எதிர்பார்ப்பில் இருந்தோம். 

ஆனால், எங்களுக்கு அதிர்ச்சி வைத்தியம் கொடுப்பது போல முத்துசாமி தி.மு.க.வில் இணையும் தருணத்தில் அதுவரை டம்மியாக இருந்த ராஜா மீண்டும் கட்சியில் உறுப்பினராக சேர்க்கப்பட்டார். இதன் தொடர்ச்சியாக கடந்த நவ.2&ம் தேதி ராஜாவுக்கு மீண்டும் மாவட்டச் செயலாளர் பொறுப்பு அறிவிக்கப்பட்டுள்ளது. இதன் பிறகே முத்துசாமிக்கு கட்சியில் உயர்நிலை செயல்திட்டக் குழு உறுப்பினர் பொறுப்பு வழங்கப்பட்டுள்ளது. இப்படி முத்துசாமிக்கு செக் வைக்கும் விதத்தில் ராஜாவை முன்னிலைப்படுத்தி வருகிறார்கள்’’ என்று வெடிக்கிறார்கள். 

இந்நிலையில்... மாவட்டச் செயலாளராகி ஈரோடு வந்த என்.கே.கே.பி.ராஜாவுக்கு தடபுடல் வரவேற்பு கொடுத்த அவரது ஆதரவாளர்களிடம் பேசினோம்.

‘‘தலைவரும், தளபதியும் கட்சிக்காக உழைப்-பவர்களை மறந்தது கிடையாது. ராஜா மீது நம்பிக்கை இருப்பதால்தான் மீண்டும் பொறுப்பு வழங்கப்பட்டுள்ளது. முத்துசாமி தனிப்பட்ட முறையில் மரியாதைமிக்க மனிதர். ஆனால், அவர் எங்க கட்சிக்கு புதியவர். அ.தி.மு.க.வில் வேண்டுமானால் அவர் சீனியராக இருந்திருக்கலாம். இங்கு சாதாரண தொண்டன் கூட அவரை விட சீனியர்தான். இதனால் அவரை நாங்கள் எதிர்க்கிறோம் என்று அர்த்தம் இல்லை’’ என்றனர். எந்த கோஷ்டியும் சாராத மூத்த தி.மு.க.வினர் சிலர் நம்மிடம்... 

‘‘அறிவாலயத்தில் கலைஞர் தலைமையில் மாவட்ட வாரியாக நடைபெற்று வரும் கலந்தாய்வுக் கூட்டத்துக்குப் பிறகு இந்த பொறுப்புகள் கொடுக்கப்பட்டிருந்தால்... நிர்வாகிகளின் ஆலோசனைக்குப் பிறகு அறிவிக்கப்பட்டதாக எடுத்துக் கொள்ளலாம். 

ஆனால், திடுமென ராஜாவுக்கு மீண்டும் மாவட்டச் செயலாளர் பதவியைக் கொடுத்-த-தால் கட்சியினர் மட்டுமல்லாமல் பொதுமக்கள் மத்தியிலும் அதிருப்தி ஏற்பட்டுள்ளது. பெருந்துறை நில பிரச்னையைத் தொடர்ந்து அதில் முகாந்தரம் இருப்பதால் ராஜா பதவி நீக்கம் செய்யப்பட்டதாக கலைஞரே தெரிவித்திருந்தார். அது தொடர்பான வழக்குகள் நிலுவையில் உள்ளது. அதற்குள் ஏன் பதவி கொடுக்க வேண்டும்? தேர்தல் நெருங்கும் நிலையில்... இன்றுவரை ராஜா மீது மக்கள் வெறுப்புடன்தான் உள்ளனர்’’ என்றவர்கள்,

‘‘ராஜாவை முன்னிலைப்படுத்து-வதற்காக முத்துசாமி ஓரங்கட்டப்-படவில்லை. இவ்வளவு ஏன் ராஜா-வுக்குப் பதவி கிடைக்க முத்துசாமியின் பரிந்துரையும் ஒரு காரணம். ஆனால் ராஜாவை எதிர்த்து அரசியல் செய்ய நினைத்தவர்கள் முத்து-சாமியுடன் கைகோக்க நினைத்து அது நிறைவேறாததால் ஏதாவது பிரச்னையை கிளப்புகின்றனர்’’ என்றனர் ஆதங்கத்தோடு. 

இந்த சலசலப்புகள் பற்றி என்.கே.கே.பி.ராஜாவிடம் பேசினோம்.

‘‘ பெருந்துறை சம்பவம் எனது வாழ்வில் நிகழ்ந்த ஒரு கசப்பான அனுபவம். ஆனால், அது தொடர்பான சில வழக்குகளில் இருந்து எனக்கு விடுதலை வழங்கப்பட்டது. இதையடுத்து, என் மீது எந்தக் களங்கமும் இல்லை என்பதை அறிந்த பிறகுதான் மீண்டும் மாவட்டச் செயலாளர் பதவி கொடுக்கப்பட்டுள்ளது. கடந்த சட்டமன்றத் தேர்தல் முடிவுகளில், ‘ஈரோடு மாவட்டம் எனக்கு மகிழ்ச்சி கொடுத்தது’ என கலைஞர் எனக்கு வாழ்த்து தெரிவித்தார். இந்த முறை அவருக்கு ஈரோடு மாவட்ட வெற்றி இரட்டிப்பு சந்தோசத்தைக் கொடுக்கும். முத்துசாமியுடன் எனக்கு எப்போதும் கருத்து வேறுபாடு இருந்தது கிடையாது. கோஷ்டி என்பது இல்லாமல் அனைவருடனும் இணைந்து பணியாற்றி வரும் காலங்களில் ஈரோடு மாவட்டத்தைச் சிறப்பான மாவட்டமாக நிச்சயம் மாற்றுவேன்’’ என்றார் ராஜா. 

முத்துசாமியிடம் நாம் பேசிய-போது, ‘‘என்றைக்கும், கட்சிக்கும் தலைவர் மற்றும் தளபதிக்கும் நம்பிக்கைக்குரியவனாக இருப்பேன். எனக்கு கொடுக்கப்பட்ட பணியை சிறப்பாக செய்வேன்’’ எனப் பட்டும் படாமல் முடித்துக் கொண்டார். எதுவுமே ராஜாவின் செகண்ட் இன்னிங்ஸைப் பொறுத்துதான் இருக்கிறது!






‘

 

சிவகங்கை : தமிழ், ஆங்கில மொழிகளை அழுத்தம் திருத்தமாக, வார்த்தை நயத்தோடு பேசுவதில் வல்லவர். உள்நாட்டு மாவோயிஸ்ட், அயல்நாட்டு பயங்கரவாதிகள் என நாலாபுறமும் உலவும் அச்சுறுத்தலுக்கு, இவர் தான் அணை போட வேண்டும்.

நாட்டு மக்களின் பாதுகாப்பு மொத்தமும் இவர் கைகளில் தான். காஷ்மீரில் நடந்த சமீபத்திய வன்முறைகளுக்கு மருந்து போட, இவர் தலைமையில் தான் அமைதிக்குழு சென்றது. இத்தனை முக்கியத்துவம் வாய்ந்த உள்துறை அமைச்சர் சிதம்பரத்தின் அடையாளம், சிவகங்கை தொகுதி. "செட்டிநாட்டு சின்னவர்' என்று, இவரது கூட்டணி தலைவர் கூட அடைமொழியிட்டு அழைத்தார். "அடையாளம் காட்டிய தொகுதிக்கு இவர் என்ன செய்தார்?' என்ற ஆதங்கம், காலம்காலமாய் நீடிக்கிறது.அதற்கு சமீபத்திய உதாரணம், சிவகங்கை மாவட்டத்தில் ஏற்பட்ட மழைச்சேதம். இங்கு 49 வீடுகள் முழுவதும், 240 வீடுகள் பகுதியும் சேதம்; இரு சிறுவர்கள் உட்பட மூவர் பலி; 5,508 எக்டேர் பயிர் சேதம்; 815 கி.மீ.,க்கு நகர ரோடுகள், 208 இடங்களில் கிராம ரோடுகள், 52 பாலம், 179 கண்மாய்கள் சேதம்; நேற்று முன்தினம் வரை, மழையால் 38.75 கோடி ரூபாய் இழப்பு என, சேதங்களை பட்டியல் இடுகிறது மாவட்ட நிர்வாகம்.இவ்வளவு சேதம் ஏற்பட்டும், மக்கள் பிரதிநிதியான இவர், ஒற்றை வரியில் ஆறுதல் கூட சொல்லவில்லை என்ற அதிருப்தி அலைகள் கேட்கின்றன. கடந்த 4, 5ம் தேதிகளில் மாவட்டத்தில் சுற்றுப்பயணம் செய்தார் அமைச்சர்.

அரசு திட்டங்கள் குறித்து, கலெக்டர் அலுவலகத்தில் நடந்த கண்காணிப்புக் குழு கூட்டத்தில் பங்கேற்று வெளியே வந்த அவரிடம், மறவமங்கலம் அருகே தளிர்தழை கிராமத்தினர், மழையால் அழுகிய நெற்பயிர்களை கையில் வைத்து முறையிட்டனர்; கிராமத்தில் ஆய்வு நடத்த, அதிகாரிகளுக்கு உத்தரவிட்டார் அமைச்சர். பின், கட்சியினர் இல்ல நிகழ்ச்சி, வாக்காளருக்கு நன்றி அறிவிப்பு என, அவரது பயண திட்டம் முடிவுற்றது.கிராமத்தினர் தேடி வந்து முறையிட்டதால், மழைச்சேதங்களை அமைச்சர் பார்வையிடுவார் என அதிகாரிகள் எதிர்பார்த்தனர். ஆனால், அதுபோன்ற "தொந்தரவுகளை' அதிகாரிகளுக்கு அவர் கொடுக்கவில்லை. மக்கள் சந்திப்பு நிகழ்ச்சிக்காக கிராமங்களுக்கு சென்ற போதும், மழைச்சேதங்களை அவர் பார்க்கவில்லை என்பது, ஆதங்கத்தை அதிகரித்துள்ளது."என்ன செய்தார் சிதம்பரம் என்ற முழக்கத்தோடு, 1998 லோக்சபா தேர்தலில், இவரை எதிர்த்து களம் இறங்கினார் முன்னாள் சபாநாயகர் காளிமுத்து. அந்த முழக்கம் இன்றும் எதிரொலிக்கிறது.  இது, மழைச்சேதத்தின் போது கூட ஓயவில்லை. நாட்டுக்கு பட்ஜெட் போட்டவர், மாவட்டத்தில் ஏற்பட்ட 38 கோடி ரூபாய் சேதத்திற்கு என்ன செய்யப்போகிறார்' என்கின்றனர் எதிர்க்கட்சியினர்.

‘‘தி.மு.க. ஆட்சியை அகற்ற வேண்டும்!’’
கோவையில் கொந்தளித்த சரத்

இதுவரை தி.மு.க.வையும் பகைக்காமல், அ.தி.மு.க.வையும் பகைக்காமல் மதில் மேல் கட்சி நடத்தி வந்த சரத்குமார்... முதன் முறையாக தனது கூட்டணி நிலைப்பாட்டை போட்டு உடைத்திருக்கிறார். 

கோவை சிவானந்தா காலனி பகுதியில் சமத்துவ மக்கள் கட்சியின் கொங்கு மண்டல பொதுக்கூட்டம், நவம்பர் 28 ஞாயிற்றுக்கிழமை மாலை நடைபெறுவதாக அறிவிக்கப்பட்டது. அன்று மழை வெளுத்து வாங்கிக்கொண்டிருந்தது. ஆனாலும், மழைக்கு அஞ்சாமல் திரண்ட பெரும் கூட்டத்தில் பேசினார் சரத்குமார்.

‘‘தமிழ்நாட்டு அரசியலில் மாற்றம் வர வேண்டிய காலம் வந்துவிட்டது. இலவசங்களைக் கொடுத்து மக்களைச் சோம்பேறிகளாக பழக்கிவிட்டார்கள் இன்று ஆட்சி செய்பவர்கள். இலவசங்களைக் கொடுப்பதைவிட, அதனை உழைத்து சம்பாதிக்க வழி செய்து கொடுக்க வேண்டும். வேலைவாய்ப்பை ஏற்படுத்திக் கொடுக்க வேண்டும். 

இன்று தமிழகத்தில் சாதாரண ஏழை மாணவனால் ஒரு மருத்துவ கல்லூரியிலோ, பொறியியல் கல்லூரியிலோ சேர முடியவில்லை. இலவச டி.வி. கொடுக்கும் தமிழக அரசு உயர் கல்வியில் ஏழை மாணவர்களுக்கு இலவசமாக இடம் கொடுக்கலாமே? அதன்மூலம் படித்து, நல்ல வேலை கிடைத்த பின்னர், அவர்கள் தேவைகளை அவர்களே பூர்த்தி செய்துகொள்வார்களே? இந்த அரசு உயர் கல்வியில் இலவசங்களைக் கொண்டு வந்தால், அதனை வரவேற்போம். 

மத்திய அரசின் திட்டமான 108 ஆம்புலன்ஸ் சேவைத் திட்டம் பாராட்டுக்குரியது. ஆனால், மத்திய அரசின் திட்டத்தைத் தங்களது திட்டமெனத் தமிழக அரசு பொய் பிரசாரம் செய்து வருகிறது. இதனைத் தடுக்க தமிழக காங்கிரஸ் கட்சியினர், மக்கள் மத்தியில் தெளிவுபடுத்த வேண்டும்’’ என்று தி.மு.க.வை வெளிப்படையாக சாடிய சரத்குமார்... ஸ்பெக்ட்ரம் சர்ச்சையையும் விட்டு வைக்கவில்லை. 

‘‘தற்போது உலகையே உலுக்கியிருப்பது ஸ்பெக்ட்ரம் ஊழல். உலகில் இதுவரை, இப்படியொரு மாபெரும் ஊழல் நடந்ததாக வரலாறு இல்லை. ஒரு லட்சத்து 76 ஆயிரம் கோடி ரூபாய் ஊழலுக்கு காரணமானவர்கள், இதன்மூலம் பயன் அடைந்தவர்கள் தண்டிக்கப்பட வேண்டும். தி.மு.க. ஆட்சியில் ஊழல் பெருகிவிட்டது என்பதற்கு இதுவே உதாரணம். அரசின் நல்ல திட்டங்களைப் பாராட்டுவோம். ஆனால், இதுபோன்ற ஊழல் குற்றச்சாட்டுகளுக்குக் கண்டனம் தெரிவிக்க வேண்டியது நமது கடமை. ஸ்பெக்ட்ரம் ஊழலில் தங்களுக்கு பங்கு இல்லை, அல்லது ஊழலே நடைபெறவில்லை என்பதை நிரூபிப்பதை விட்டுவிட்டு ஆரியன், திராவிடன் என ஜாதி அடையாளத்தைக் காட்டி கலைஞர் தப்பிக்க முயலக்கூடாது. செய்த தவறை மறைக்க முதல்வராக இருக்கும் ஒருவர் ஜாதியை பயன்படுத்தக்கூடாது. 

அதேபோல், முதல்வர் குடும்பத்தினர் அனைத்து துறைகளிலும் கால் பதிக்க ஆரம்பித்துவிட்டனர். குறிப்பாக சினிமா துறையில் அவர்களது ஆதிக்கம் அதிகரித்துக் கொண்டே போகிறது. இதனால் திறமையான படைப்பாளிகளின் படைப்புகள் எளிதில் வெளியில் வரமுடியவில்லை. தங்களுக்குக் கட்டுப்படாதவர்கள் மற்றும் ஒத்துழைக்காதவர்கள் பழி வாங்கப்படுகிறார்கள். சினிமா துறை முழுவதும் தற்போது முதல்வர் குடும்பத்தினரின் கட்டுப்பாட்டிற்குள் சென்றுவிட்டது. வடக்கில் உள்ள பிரபல நடிகர் ராஜ்கபூர் சினிமா துறையில் ஜொலித்தவர். அவருக்கு பின் அவரது வாரிசுகளும் சினிமாவில் பிரகாசித்தனர். ஆனால், அவர்கள் அரசியலுக்குள் நுழையவில்லை. அதேபோல் முதல்வர் குடும்பத்தினரும் அரசியலில் மட்டுமே இருந்தால், மற்ற படைப்பாளிகளின் வாழ்க்கை சிறப்பாக அமையும்’’ என்று கலைஞருக்கு விமர்சன வடிவில் வேண்டுகோள் விடுத்தார் சரத்குமார். 

மழைக்கு போட்டியாக தன் அனல் மழையைத் தொடர்ந்தவர், ‘‘இன்று நாட்டின் மிகப் பெரிய பிரச்னை விலைவாசி உயர்வு. இதுவரை மத்திய அரசோ, மாநில அரசோ விலைவாசியைக் கட்டுப்படுத்தவில்லை. உழைப்பாளிகள் கடுமையாக உழைத்தாலும், ஒரு வேளை சாப்பாட்டுக்கு மிகவும் கஷ்டப்படுகிறார்கள். ஆனால், ஒரு சாதாரண கவுன்சிலர் பென்ஸ் காரில் செல்கிறார். உழைப்பாளிகள் முன்னேற வேண்டும். அதற்கு தமிழகத்தில் அரசியல் மாற்றம் வர வேண்டும்.

தி.மு.க. மீண்டும் ஆட்சிக்கு வந்தால், சர்வாதிகார ஆட்சியாகத்தான் இருக்கும். ‘இன்று, நேற்று கட்சி துவங்கியவர்கள் எல்லாம் முதல்வராக ஆசைப்படுகிறார்கள்’ என்று துணை முதல்வர் ஸ்டாலின் பேசி வருகிறார். ஏன் அவருக்கு முதல்வராகும் ஆசை இல்லையா? ஆசை இல்லாமலா துணை முதல்வர் பதவி கொண்டுவரப்பட்டது. ஆசை யாருக்கும் வரலாம், அதில் தவறில்லை. ஆனால், யார் முதல்வராக வேண்டும் என்று மக்கள்தான் முடிவு செய்வார்கள். 

1962&ல் நடந்த தேர்தலின்போது காங்கிரஸ் கட்சியினர் ஓட்டுக்கு ஐந்து ரூபாய் கொடுத்தனர். அப்போது, ‘ஓட்டுக்காக காங்கிரஸ் கட்சியினர் கொடுக்கும் ஐந்து ரூபாயை வாங்கும்போது கைகள் கூச வேண்டும்’ என்று கூறினார் அண்ணா. ஆனால், அண்ணாவின் வழியில் வந்தவர்கள் என்று கூறும் இன்றைய ஆளும் தரப்பினர், வரும் தேர்தலிலும் ஓட்டுக்குப் பணம் கொடுக்க பல ஆயிரம் கோடி ரூபாய் ஒதுக்கப்பட்டுள்ளதாக தகவல் கிடைத்துள்ளது.

விஜயகாந்த், மக்களோடுதான் கூட்டணி என்று கூறுகிறார். தற்போதைய அரசியல் சூழ்நிலையில் நல்லவர்கள், புதியவர்கள் கூட்டணி சேர வேண்டும். வரும் தேர்தலில் தி.மு.க. அரசை வீட்டுக்கு அனுப்ப வேண்டுமானால், நாம் அனைவரும் கூட்டணி சேர வேண்டும். அப்போது தான் தமிழகத்தில் ஆட்சி மாற்றத்தைக் கொண்டு வரமுடியும்’’ என்று தி.மு.க.வுக்கு எதிரான திட்டவட்ட நிலைப்பாட்டோடு பேசி முடித்தார் சரத். 

தி.மு.க.வுக்கு எதிரான மெகா கூட்டணி அமைக்க அழைப்பு விடுத்திருப்பதன் மூலம், சரத்குமார் அ.தி.மு.க. அணியில் இணைவாரா, மூன்றாவது அணி காண்பாரா என்ற பரபரப்பு ஏற்பட்டுவிட்டது. அதேநேரம் சரத்தின் பேச்சால் அ.தி.மு.க. வட்டாரமும் குஷியடைந்திருக்கிறது. 

ஹெலிபேட் பங்களா சர்ச்சை!
சிவசாமியின் பதவிபறிப்பு பின்னணி

 

தி.மு.க.வுடன் உறவு கொண்டவர்கள் என்ற அடிப்படையில் இதுவரை பல அ.தி.மு.க.வினர் கட்டம் கட்டப்பட்டதுண்டு. சமீபத்தில் இதே காரணத்துக்காக வடசென்னை மாவட்ட செயலாளர் சேகர்பாபுவின் மாவட்ட செயலாளர் பதவியைப் பறித்தார் ஜெயலலிதா.

அந்த வரிசையில் இப்போது திருப்பூர் எம்.பி. சிவசாமியிடமிருந்து மாவட்டச் செயலாளர் பதவி பறிக்கப்பட்டிருக்கிறது. 

எட்டு வருடம் மாவட்ட ஜெ.பேரவை செயலாளர், எட்டு வருடம் மாவட்டச் செயலாளர் என்று பதினாறு வருடங்கள் அ.தி.மு.க.வில் ‘ரெக்கார்டு’ வைத்திருந்த சிவசாமி எம்.பி.யை மாவட்டச் செயலாளர் பதவியிலிருந்து தூக்கிவிட்டு... மாவட்ட அவைத் தலைவரான முன்னாள் அமைச்சர் சி.சண்முகவேலுவை புதிய மாவட்டச் செயலாளராக நியமித்திருக்கிறார் ஜெயலலிதா. 

சிவசாமி பதவி நீக்கத்துக்குப் பின்னணிதான் என்ன? ரகசிய குரலில் பேசினார்கள் ரத்தத்தின் ரத்தங்கள். 

‘‘அ.தி.மு.க.வுக்கென சொந்த அலுவலகம் கட்ட, திருப்பூரில் பழைய பேருந்து நிலையத்துக்கு எதிரில் கட்சி அலுவலகம் செயல்பட்டு வந்த ஏழரை சென்ட் இடத்தை 63 லட்சம் ரூபாய்க்கு பேசி முடித்தார். ஆனால், அந்த இடத்தைக் கட்சி பெயரில் பதிவு செய்யாமல், தன் பெயரில் அக்ரிமென்ட் போட்டுவிட்டார். பின்னாளில் அந்த இடத்தை, தன் மனைவி பெயருக்கு மாற்றி எழுதிவிட்டார். இதை அம்மாவின் கவனத்துக்கு, அப்போதே கொண்டு சென்றோம். இதையடுத்து சிவசாமியை அழைத்து அம்மா எச்சரிக்கை செய்தார்.

ஆனால், அதையும் மீறி கட்சிக்காரர்கள், திருப்பூரிலுள்ள தொழிலதிபர்கள் எனப் பலரிடமும் கட்சிக்கு புது இடம் வாங்கவேண்டும் என்று சொல்லி, கிட்டத்தட்ட எழுபது லட்சம் ரூபாய் வரை வசூலித்துவிட்டார். மேலும் புதிய பேருந்து நிலையத்துக்கு அருகில், வாகனங்களே செல்ல முடியாத அளவுக்கு இருக்கும், ஒயின்ஷாப் செயல்பட்டு வந்த இடத்தைத் தேர்வு செய்ய, கட்சிக்காரர்கள் ஏற்றுக் கொள்ளவில்லை. உடனே, ‘பிடிக்கவில்லை என்றால், வேறு இடத்தை தேர்வு செய்யுங்கள். அதையே வாங்கிவிடலாம். வசூல் செய்த 40 லட்சம் ரூபாய் இருக்கிறது’ என்று பொய் கணக்கு காண்பித்தார்.

இதுமட்டுமல்ல... சிவசாமி நீண்ட நாள் கட்சிப் பதவியில் இருப்பதைப் பயன்படுத்தி கட்சிப் பதவிகளை விற்று வந்திருக்கிறார். மாவட்டப் பொறுப்பில் இருந்த ஒரு பெண்ணை மாற்றிவிட்டு, சமீபத்தில் தனக்கு நெருக்கமான பல்லடம் பகுதியில் கோழிப் பண்ணை வைத்திருக்கும் பெண்ணின் பெயரை தலைமைக்கு பரிந்துரைத்தார். இத்தனைக்கும் அந்தப் பெண் நகர, ஒன்றிய, கிளை பொறுப்பாளர்களைத் துளியும் மதிக்காதவர். 

இதையெல்லாம் தூக்கி சாப்பிடும் வகையில், இப்போது அம்மாவின் பெயரைச் சொல்லியே பல லட்சம் மதிப்பில் தனது பழைய வீடு அமைந்துள்ள தாளிபாளையம் பகுதியில், ஒரு பங்களா கட்டியிருக்கிறார் சிவசாமி. ‘தேர்தல் பிரசாரத்தின் போது அம்மா வந்து இங்கேதான் தங்கப்போகிறார்’ என்று சொல்லியே கட்சிக்காரர்களிடமும், தொழிலதிபர்களிடமும் பல லட்சங்களை வசூல் செய்து, வீட்டின் மேல்பகுதியில் ஹெலிபேட் அமைத்து பங்களா கட்டியிருக்கிறார். 

இதில் என்ன சுவாரஸ்யம் என்றால், தி.மு.க. அமைச்சர் வெள்ளக்கோவில் சாமிநாதன் கட்சி அலுவலகம் கட்ட எந்த பொறியாளரை செலக்ட் செய்தாரோ, அவரை வைத்துதான் இந்த பங்களா-வையும் கட்டியிருக்கிறார் சிவசாமி. எந்த அளவுக்கு தி.மு.கவுடன் நெருக்கம்(?) பாருங்கள்’’ என்றனர். 

அ.தி.மு.க.வின் இரண்டாம் கட்ட தலைவர்கள் சிலரிடம் பேசியபோது, 

‘‘திருப்பூர் மாநகராட்சியில் தி.மு.க உறுப்பினர்களின் எண்ணிக்கை வெறும் பத்துதான். கம்யூனிஸ்ட், காங்கிரஸ், முஸ்லிம் லீக் எனப் பலருடைய ஆதரவில்தான் தி.மு.க. மேயர் பதவியைப் பிடித்தது. இப்போது கம்யூனிஸ்ட்கள், தி.மு.க. கூட்டணியில் இல்லாததால், அ.தி.மு.க.வின் 18 உறுப்பினர்களுடன் கம்யூனிஸ்ட் தோழர்களை வைத்து மேயர் பதவியை அ.தி.மு.க. பிடித்துவிட முடியும். இதுபற்றி, பலதடவை சிவசாமியிடம் வற்புறுத்தியும் அவர் கேட்டபாடில்லை. மாறாக, தி.மு.க. மேயர் செல்வராஜுடன் நெருங்கிய நட்பு வைத்துக்கொண்டு, ‘பேசாம இருங்கய்யா... எதாவது குழப்படி பண்ணினா இப்ப வரும் வருமானம் போய்விடும்’ எனச் சொல்லி விட்டார். இத்தனை விஷயங்களும் உரிய ஆதாரங்களுடன் தன் கவனத்திற்கு வந்த பின்பே சாட்டையை கையிலெடுத்திருக்கிறார் அம்மா’’ என்கிறார்கள் அவர்கள். 

இந்தக் குற்றச்சாட்டுகள் குறித்து, மாவட்டச் செயலாளர் பதவியிலிருந்து நீக்கப்பட்ட சிவசாமியிடமே பேசினோம். 

‘‘பதினெட்டு வருடங்களாக அ.தி.மு.க.வில் இருக்கிறேன். பதினாறு வருடங்களாக பேரவை செயலாளர், மாவட்டச் செயலாளராக இருந்தேன். எனக்கு வேண்டாதவர்கள் சிலர் சூழ்ச்சி வலையில் என்னைச் சிக்க வைத்துவிட்டனர். என் மீதான எந்தக் குற்றச்சாட்டும் உண்மையில்லை. அம்மாவுக்கு என்னைப் பற்றி நன்கு தெரியும். விரைவில் நல்ல செய்திகளை எதிர்பார்க்கிறேன். இப்போது என்னை விமர்சிப்பவர்கள் அப்போது உண்மை நிலையை உணர்வார்கள்’’ என்றார் மிகுந்த நம்பிக்கையோடு!

ஸ்டாலினுக்கு அந்த ‘சாமி’... அழகிரிக்கு இந்த ‘சாமி’!‘
கலகலக்கும் கரூர் தி.மு.க. 

 

கடந்த 8&ம் தேதி தன் சுற்றுப் பயணத்தின் ஒரு பகுதியாக திருச்சியிலிருந்து கரூர் செல்ல துணை முதல்வர் மு.க.ஸ்டாலின் தயாராகிக் கொண்டிருந்த நேரத்தில்தான் ஆ.ராசா வீடுகளில் ரெய்டு என்ற தகவல் கிடைத்தது.

தர்மசங்கடத்துடன் பயணத்தைத் தொடர்ந்த அவர், அய்யர்மலை பகுதியில் நலத்திட்ட உதவிகள் வழங்கும் விழாவில் கலந்து கொண்டார். இதில், சீனியாரிட்டிபடி மகளிர் சுய உதவிக்குழுக்களுக்கு ரூ 25 ஆயிரம் முதல் ரூ 2 லட்சம் வரை சுழல் நிதி வழங்கினார். அப்போது பலர் தங்களுக்கு வழங்கப்பட்ட கவரை பிரித்து பார்த்தபோது அதில் செக்கிற்கு பதிலாக வங்கி பாஸ் புக் மட்டுமே இருந்தது. 

இதைக் கண்டு அதிர்ச்சி அடைந்த சிலர் அதிகாரிகளிடம் சென்று முறையிட நீங்க தான் ஏற்கனவே கடன் வாங்கி விட்டீர்களே, அதற்கு தான் இப்போது விழா என மழுப்பலான பதில் வந்துள்ளது. இதைக் கேட்டு கப்சிப் ஆனது கேள்வி கேட்ட குரூப். 

அடுத்து கரூர் கலெக்டர் அலுவலகம் அருகே உள்ள கெஸ்ட் ஹவுஸில் ஓய்வெடுத்த ஸ்டாலின், சின்னதாராபுரம் அருகில் உள்ள கூடலூரில் சமத்துவபுர திறப்பு விழாவில் கலந்து கொண்டார். அப்போது, அருகில் இருந்த முன்னாள் அமைச்சர் சின்னசாமியை தனது காரில் ஏற்றிக் கொண்டு யாரும் எதிர்பாராத விதமாக கரூர் கோதை நகரில் உள்ள சின்னசாமி வீட்டிற்கு சென்றார். அவரது வீட்டிலேயே மாலை டிபனை முடித்தார். 

‘‘தி.மு.க. மா.செ-.வாக இருந்த வாசுகி முருகேசன் படத் திறப்பு விழாவுக்காக கரூர் வருகை தந்த ஸ்டாலின், அடுத்து வருவது இப்போதுதான். வாசுகி மறைவுக்கு பின்பு ஸ்டாலின் ஆதரவாளர்களாக நன்னியூர் ராஜேந்திரன், எஸ்.பி.கனகராஜ் என சிலர் மட்டுமே உள்ளனர். 

இந்த நிலையில், கரூர் சின்னசாமி மூலம் தனது ஆளுமையைக் கரூரில் நிலைநிறுத்த முடிவு செய்திருக்கிறார் ஸ்டாலின். தி.மு.க.வுக்கு புதிதாக வந்த யாருக்கும் இதுவரை வார்டு செயலாளர் பதவி கூட கொடுத்ததில்லை. ஆனால், எடுத்த எடுப்பிலேயே சின்னசாமிக்கு மாநில விவசாய அணி செயலாளர் பதவி வழங்கப்-பட்டுள்ளது. இதில் இருந்து சின்னசாமிக்கும், மு.க. ஸ்டாலினுக்கும் உள்ள நெருக்கத்தைப் புரிந்து கொள்ளலாம். 

தி.மு.க.வுக்கு சின்னசாமி வருவதற்கு முன்பே, கரூர் செங்குந்தபுரத்தில் உள்ள தனது வீட்டை விற்றுவிட்டு அரவக்குறிச்சி தொகுதிக்கு உட்பட்ட கோதை நகரில் குடியேறிவிட்டார். ஸ்டாலினின் ஆசி இருக்கும் நிலையில் அவர் அரவக்குறிச்சி தொகுதியை குறிவைத்துதான் செயல்படுகிறார்’’ என்கிறார்கள்.

இதற்கிடையில், ஸ்டாலினின் கரூர் பயணத்தை அடுத்து, மு.க.அழகிரியும் கரூருக்கு விஜயம் செய்யவிருக்கிறாராம். 

‘‘ஸ்டாலினுக்கு சின்னசாமி என்றால், அழகிரிக்கு கே.சி.பழனிசாமி இருக்கிறார். சமீபத்தில் நடந்த தனது மகன் திருமணத்துக்கு கே.சி.பி. வீட்டுக்கே வந்து பத்திரிகை வைத்தார் அழகிரி. விரைவில் கரூரில் மு.க.அழகிரியை வைத்து ஒரு பிரமாண்ட விழா நடைபெறலாம். அதில் கே.சி.பி. முக்கிய பங்கு வகிப்பார்’’ என்கிறார்கள் தி.மு.க.வின் ஒரு பிரிவினர்.

அமைச்சர்கள் பனிப்போர்?
பறிபோன ‘குமரி ’ கோட்டங்கள்!

 

மழையில் மூழ்கி எழுந்து கொண்டிருக்கிறது கன்னியாகுமரி மாவட்டம். சாதாரணமாகவே சாலை வசதிகளில் பின் தங்கியுள்ள குமரி மாவட்டத்தில்... இந்த மழையை அடுத்து பல சாலைகள் அரித்துச் செல்லப்பட்டுவிட்டன. இந்த நிலையில், குமரி மாவட்டத்தில் சாலைப் பணிகளை மேற்கொள்வதற்கு என்று இருந்த நெடுஞ்சாலைத் துறை கோட்டங்கள் தாராபுரத்துக்கும், திருநெல்வேலிக்கும் மாற்றப்-பட்டதால் மேலும் அதிர்ச்சி அடைந்துள்ளனர் குமரி மக்கள். ‘‘குமரி மாவட்ட அமைச்சர் சுரேஷ்ராஜனுக்கும், நெடுஞ் சாலைத் துறை அமைச்சர் வெள்ளக்கோவில் சாமிநாதனுக்கும் இடையே நடக்கும் மோதலால்தான் குமரி மாவட்டத்தின் சாலைக் கோட்டங்கள் பறிபோயிருக்கிறது’’ என்றும் பரபரப்பாக பேசுகிறார்கள் விபரமறிந்த புள்ளிகள். 

தமிழகத்திலேயே அதிக மழை பெய்யும் மாவட்டமான குமரியில் சாலை சீரமைப்புக்காகவே தமிழக அரசின் நெடுஞ்சாலைத் துறை சார்பில் ஒரு கோட்டமும், நபார்டு கிராம சாலைகள் கோட்டமும்¢ செயல்பட்டு வந்தன. நாகர்கோவில், தக்கலை, மார்த்தாண்டம் ஆகிய இடங்களில் நபார்டு கிராம சாலைகளின் உட்கோட்டங்கள் இயங்கி வந்தன. நபார்டு வங்கி முலம் இந்தக் கோட்டங்களுக்கு ஒதுக்கப்படும் கோடிக்கணக்கான பணத்தைக் கொண்டு குமரி மாவட்டத்தில் சாலைப் பணிகள் நடைபெற்று வந்தன.

இந்த நிலையில், கடந்த மார்ச் 1-ம் தேதி முதல் நாகர்கோவிலில் செயல்பட்டு வந்த நெடுஞ்சாலைத் துறை கோட்டம், தாராபுரத்தில் புதியதாக உருவான நெடுஞ்சாலைத் துறை கோட்டத்துக்கு தாரை வார்க்கப்பட்டது. அடுத்தகட்ட அதிர்ச்சியாக குமரி மாவட்டத்தில் இயங்கிய நபார்டு கிராம சாலை கோட்டத்தை, திருநெல்வேலியுடன் இணைத்துவிட்டு தனித்தனி உட்கோட்டங்களாக செயல்பட்டு வந்த தக்கலை மற்றும் மார்த்தாண்டத்தை நாகர்கோவில் உட்கோட்டத்துடன் சேர்த்துவிட்டார்கள். இதனால், குமரி மாவட்டத்துக்கு வர வேண்டிய கோடிக்கணக்கான சாலை பராமரிப்பு நிதி ஒதுக்கீடு ரத்தானதால், ஏற்கனவே பயனற்றதாக இருக்கும் சாலைகளின் கதி கேள்விக்குறியாகியுள்ளது. 

இதுபற்றி, குமரி நெடுஞ்சாலைத் துறை வட்டாரத்தில் விசாரித்தோம். 

‘‘குமரி மாவட்ட நெடுஞ்சாலைத் துறை கோட்டங்களில் பொறுப்புகளில் இருக்கும் பொறியாளர்கள் துறை மேலிடத்துக்கு கொடுக்க வேண்டியதைக் கொடுக்காமல் இழுத்தடித்து வந்துள்ளனர். மேலும் துறை மேலிடத்தைக் கவனிப்பதை விட லோக்கல் அமைச்சரை சரிக்கட்டுவதில் குறியாக இருந்தனர். இதனால், குமரி மாவட்டத்திற்கு ஒதுக்கப்படும் தொகை அனைத்தும் இழுத்தடிக்கப்பட்டது. இரண்டு அமைச்சர்களும் வார்த்தைகளால் மோதிக் கொண்டதாகவும் ஒரு தகவல் உண்டு. விளைவு... சாலைகள் போதிய பராமரிப்பின்றி போக்குவரத்திற்கு பயனற்றதாகிவிட்டது’’ என்கிறார்கள்.

சாலைக் கோட்டங்கள் ரத்தானதைக் கண்டித்து குமரி மாவட்டம் முழுவதும் தினமும் சாலை மறியல் போராட்டங்கள் நடைபெற்று வரும் நிலையில், திருவட்டார் தொகுதி எம்.எல்.ஏ., லீமாரோஸிடம் பேசினோம். ‘‘குமரி மாவட்டச் சாலைகள் தமிழகத்திலேயே மிகவும் மோசமாக உள்ளது. இதனை பராமரிக்க நெடுஞ்சாலைத் துறை கோட்டங்களும், நிதியும் வேண்டும். நபார்டு மற்றும் கிராம சாலைகள் கோட்டத்தை மாற்றக்கூடாது என அரசு விழா மேடை ஒன்றில் கோரிக்கை வைத்தேன். எனக்கு பிறகு பேசிய அமைச்சர் சுரேஷ்ராஜன் கண்டிப்பாக இடம் மாறாது என மேடையில் உறுதி கூறினார். இது நடந்த மறுவாரமே நபார்டு கிராம சாலைகள் கோட்டம் மாற்றப்பட்டுள்ளது. இதிலிருந்து நெடுஞ்சாலைத் துறையால் குமரி மாவட்டம் புறக்கணிக்கப்படுகிறது என்பது தெளிவாகிறது’’ என்றார் கோபமாக. 

அ.தி.மு.க. மாநில அமைப்பு செயலாளரும், முன்னாள் அமைச்சருமான தளவாய் சுந்தரத்திடம் இதுபற்றி கேட்டபோது, 

‘‘அமைச்சர் சுரேஷ்ராஜனின் சாதனைகளில் இதுவும் ஒன்று. ஏற்கனவே, கடந்த மார்ச் மாதம் நாகர்கோவிலில் செயல்பட்டு வந்த நெடுஞ்சாலைத் துறை கோட்டம் தாராபுரத்திற்கு மாற்றப்பட்டது. தற்போது தக்கலை மற்றும் மார்த்தாண்டத்தில் உள்ள கிராம சாலைகள் உட்கோட்டம் குமரியிலிருந்து மாற்றப்பட்டதற்கான அரசாணை (ஸிuக்ஷீணீறீ ஸிஷீணீபீ கீஷீக்ஷீளீ நி.ளி.) எங்களிடம் உள்ளது. வெள்ளக்கோயில் சாமிநாதன் & சுரேஷ்ராஜன் இடையேயான பனிப்போர் தான் இதற்கெல்லாம் காரணம் என்ற நம்பகமான தகவல் எங்களுக்கு வந்துள்ளது. இவரது துறையான சுற்றுலாத் துறையின் மண்டல அலுவலகம் கூட குமரியிலா உள்ளது, மதுரையில்தானே உள்ளது?’’ என்றார் கேலியாக. 

விளவங்கோடு எம்.எல்.ஏ., ஜான் ஜோசப் நம்மிடம், 

‘‘குமரி கிராம சாலைகள் துறை திருநெல்வேலிக்கு மாற்றப்பட்டு ஆறு மாதங்கள் ஆகிவிட்டது. இந்நிலையில் தற்போது மீண்டும் மூன்று அலுவலகங்களை மூட நெடுஞ்சாலை மற்றும் சிறு துறைமுகங்கள் துறை மூலம் அரசு உத்தரவிட்டுள்ளது. ஏற்கனவே, மூடப்பட்ட கோட்ட அலுவலகத்தையும் சேர்த்து குமரி மாவட்டத்திலேயே இயக்க தமிழக அரசு நடவடிக்கை எடுக்க வேண்டும். இல்லையேல், மாவட்ட அளவில் மிகப்பெரிய போராட்டம் நடத்துவோம்’’ என்றார் ஆக்ரோஷத்தோடு. குமரியின் கோட்டங்கள் பறிபோனது பற்றி அமைச்சர் சுரேஷ்ராஜனிடமே பேசினோம். 

‘‘குமரி மாவட்டத்தில் புதியதாக நெடுஞ்சாலைப் பணிகள் இல்லாததால் தான், நெடுஞ்சாலைத் துறை கோட்டம் தாராபுரத்துக்கு மாற்றப்பட்டது. நபார்டு கிராம சாலைக் கோட்டங்கள் திருநெல்வேலிக்கு இடம் பெயருவதாக இருந்ததை தடுத்து, தற்போது செயல்பட்டுவரும் அலுவலகத்திலேயே செயல்பட வைத்துள்ளேன். இதுதானே தவிர தனிப்பட்ட முறையில் எனக்கும் நெடுஞ்சாலைத் துறை அமைச்சருக்கும் இடையே எந்தவிதமான மோதல் போக்கும் இல்லை’’என்றார் ஆணித்தரமாக. ஆனால், அமைச்சர் சுரேஷ்ராஜனின் கூற்றை பொய்யாக்கும் வகையில் டிசம்பர் 1&ம் தேதி முதல் தக்கலை மற்றும் மார்த்தாண்டத்தில் உள்ள கிராம சாலைகள் கோட்ட அலுவலகங்களில் பெரிய பூட்டு தொங்குகின்றன. 

என்ன செய்யப் போகிறார் அமைச்சர்?